ون ۇشاق پەن 133 لوكوموتيۆ، 2 مۇناي تانكەرى ساتىپ الىندى: كولىك مينيسترلىگى جىلدى قورىتىندىلادى

جىل قورىتىندىسى بويىنشا كولىك سالاسىنىڭ بارلىق نەگىزگى ينديكاتورلارى جاقسى كورسەتكىشتەرگە جەتىپ، ءوسىم 7 پايىزدى قۇرادى. ينۆەستيتسيالار كولەمى 1,6 ەسە ءوسىپ، 1,8 تريلليون تەڭگەگە جەتتى.

بۇل تۋرالى Kazinform ق ر كولىك مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.

مينيسترلىك تاراپىنان ماڭىزدى سۇراقتار بويىنشا ناقتى شارالار قابىلداندى. اتاپ ايتقاندا:

- ۇزاققا سوزىلعان جول جوبالارىن جەدەلدەتۋ؛

- ترانسكاسپيي حالىقارالىق كولىك مارشرۋتىن دامىتۋ؛

- تەڭىز پورتتارىنىڭ ينفراقۇرىلىمىن نىعايتۋ؛

- ترانزيتتىك تەمىر جول جۇك تاسىمالدارىن ۇلعايتۋ؛

- قازاقستان- قىتاي شەكاراسىنداعى شەكارالىق وتكەلدەردىڭ وتكىزۋ قابىلەتىن ارتتىرۋ؛

- اۋە ساپارلارىنا دەگەن ءوسىپ كەلە جاتقان سۇرانىستى قاناعاتتاندىرۋ.

ناتيجەسىندە «تالدىقورعان- وسكەمەن»، «استانا- الماتى» اۆتوجولدارىمەن جول ءجۇرۋ قامتاماسىز ەتىلدى، «قاندىاعاش- ماقات» ۋچاسكەسىنىڭ قۇرىلىسى اياقتالدى، «ءۇشارال- دوستىق» تاس جولى تولىعىمەن سالىندى. سونىمەن قاتار بيىل باكاد پايدالانۋعا بەرىلدى.

تەمىرجول سالاسىندا 133 جاڭا لوكوموتيۆ پەن 275 جارتىلاي ۆاگون ساتىپ الىندى. دوستىق - مويىنتى ۋچاسكەسىندە ەكىنشى جولداردىڭ قۇرىلىسى جۇرگىزىلىپ، قىتايدىڭ شيان قالاسىندا جەكە تەرمينال اشىلدى.

جىل ىشىندە 10 جاڭا ۇشاق ساتىپ الىنىپ، 23 باعىت بويىنشا 13 ەلگە جاڭا رەيستەر جاڭارتىلدى جانە اشىلدى. ىشكى تاسىمالداۋ كولەمى قالپىنا كەلتىرىلىپ، تاسىمالداۋشىلاردىڭ جۇمىسى جانە جولاۋشىلاردىڭ قۇقىقتارىن قورعاۋ تەتىكتەرى جاقسارتىلدى.

بيىل ترانسكاسپي حالىقارالىق كولىك مارشرۋتى بويىنشا 2 ميلليون 750 مىڭ توننا جۇك تاسىمالداندى، بۇل 2022 -جىلمەن سالىستىرعاندا %64- عا ارتىق.

«مارشرۋتتىڭ الەۋەتىن دامىتۋ ءۇشىن پوتي پورتىندا تەرمينال قۇرىلىسى باستالىپ، 2 مۇناي تانكەرى ساتىپ الىندى. سونىمەن بىرگە قۇرىق پورتىندا Abu Dhabi پورتتارىمەن بىرلەسىپ استىق تەرمينالى ىسكە قوسىلدى، تازا سۋتەگى مەن اممياكتى ەۋروپاعا تاسىمالداۋ جونىندە كەلىسىمگە قول قويىلدى»، - دەلىنگەن حابارلامادا.

اۆتور

ايدار وسپاناليەۆ