پوليتسەيلەردىڭ بىرەۋدىڭ جەكەمەنشىك كولىگىن پايدالانۋعا قاقىسى بار ما
وسكەمەن. KAZINFORM - پوليتسيا قىزمەتكەرلەرىنىڭ ازاماتتاردىڭ جەكە مەنشىك كولىگىن ايداۋىنا زاڭ بويىنشا جول بەرىلەتىن-بەرىلمەيتىنىن ءبىلىپ كوردىك.
شىتىرمانعا تولى شەتەلدىك كينولاردا قىلمىسكەردى قۋىپ كەلە جاتقان پوليتسەيلەردىڭ كوشەدەگى كولىكتەرگە دە مىنىپ الاتىنىن كورىپ ءجۇرمىز. ال كينوداعى جاعداي ومىردە دە قايتالانۋى مۇمكىن، قايتالانىپ جاتىر دا.
وسى رەتتە «قازاقستاندا پوليتسيا قىزمەتكەرلەرى ازاماتتاردىڭ جەكە مەنشىك كولىگىن پايدالانا الا ما، جوق پا؟ بۇل زاڭ بويىنشا رەتتەلگەن بە؟» دەگەن سۇراق تۋىندايدى.
سول ساۋالدىڭ جاۋابىن ءبىلۋ ءۇشىن Kazinform ءتىلشىسى ش ق و پوليتسيا دەپارتامەنتىنە حابارلاسىپ كوردى.
ماتەريالدىق شىعىن وتەلەدى
- پوليتسيا قىزمەتكەرلەرى 2014-جىلعى 23-ساۋىردەگى ىشكى ىستەر ورگاندارى تۋرالى زاڭنىڭ 6-بابى 2-بولىگى 17-تارماقشاسىنا سايكەس قىلمىس جاسادى دەگەن كۇدىككە ىلىنگەن ادامنىڭ ىزىنە ءتۇسۋ، وقيعا ورنىنا بارۋ، توتەنشە نەمەسە سوعىس جاعدايى كەزەڭىندە، قارۋلى قاقتىعىس جاعدايىندا، توتەنشە جاعدايلاردى جويۋ كەزىندە ازاماتتاردىڭ جەكە مەنشىك كولىگىن تىزگىندەۋگە قۇقىلى. سونداي-اق ەگەر كىدىرتۋ ادامداردىڭ ءومىرى مەن دەنساۋلىعىنا ناقتى قاتەر ءتوندىرۋى مۇمكىن بولسا، جەدەل مەديتسينالىق كومەككە مۇقتاج ادامداردى مەديتسينا ۇيىمدارىنا جەتكىزۋ ءۇشىن دە كولىكتىڭ كەز كەلگەن ءتۇرىن پايدالانا الادى. ءبىراق بۇعان ديپلوماتيالىق يممۋنيتەتى بار شەت مەملەكەتتەر وكىلدىكتەرى مەن حالىقارالىق ۇيىمداردىڭ كولىكتەرى جاتپايدى، - دەپ جاۋاپ بەردى دەپارتامەنتتىڭ باسپا ءسوز قىزمەتىنەن.
ال ەگەر كولىك يەلەرىنە ماتەريالدىق زالال كەلتىرىلگەن جاعدايدا قازاقستان رەسپۋبليكاسىنىڭ ۇكىمەتى ايقىنداعان تارتىپپەن شىعىن تولىقتاي وتەلەدى.
دەمەك، پوليتسەيلەر كوشەدە كەلە جاتقان كولىكتەردى توقتاتىپ، ايداپ كەتە الادى. ءبىراق ءول ۇشىن جوعارىدا ايتقان سەبەپتەر بولۋى كەرەك. سوندىقتان ءتارتىپ ساقشىسىنىڭ تالابى زاڭعا سايكەس بولسا باعىنۋعا ءتيىسپىز.
ەسكە سالساق، بۇعان دەيىن قىزىلوردادا پوليتسيا قىزمەتكەرىنە دورەكىلىك كورسەتكەن جاس وسپىرىمگە قاتىستى قىلمىستىق ءىس قوزعالعانى حابارلانعان.
