پوليتسيا قۇرامىندا ەسىرتكى بار التى مىڭ تابلەتكا مەن امپۋلا تاركىلەدى

  13-قاراشادان باستاپ ىشكى ىستەر ورگاندارى رەسپۋبليكا بويىنشا “دارمەك” كەڭ اۋقىمدى جەدەل- الدىن الۋ شاراسىن وتكىزىپ جاتىر، دەپ حابارلايدى kazinform Polisia.kz-كە سىلتەمە جاساپ.

ونىڭ ماقساتى - دارىلىك زاتتاردىڭ زاڭسىز اينالىمعا كەتپەۋىن، كونتراباندالىق جولمەن تارالماۋىن قاداعالاۋ، بولعان جاعدايدا-جولىن كەسۋ.

پوليسەيلەر ەسىرتكى، پسيحوتروپتىق زاتتار مەن پرەكۋرسورلاردى پايدالاناتىن كاسىپورىندار مەن ۇيىمداردى، دالىرەك ايتقاندا، مەديتسينالىق مەكەمەلەردى، ءدارىحانالاردى، قويمالاردى، ونەركاسىپتىك كاسىپورىنداردى جانە باسقا دا وبەكتىلەردى تەكسەرۋدى باستادى. رەيدتىڭ العاشقى كۇنىندە اتالعان سالادا 11 قىلمىس پەن 63 اكىمشىلىك قۇقىق بۇزۋشىلىق انىقتالدى.

اكىمشىلىك جاۋاپكەرشىلىككە 63 ادام تارتىلدى، ونىڭ ىشىندە 11 مەديتسينا قىزمەتكەرى بار.

دۇرىس ساقتالماعان، قۇرامىندا ەسىرتكى جانە پسيحوتروپتىق زاتتار بار التى مىڭعا جۋىق تابلەتكا مەن مەديتسينالىق پرەپاراتتاردىڭ امپۋلالارى تاركىلەندى. 13,4 توننادان استام پرەكۋرسورلاردىڭ اينالىمى ليسەنزيالىق نورمالاردىڭ جانە ولاردى ساقتاۋ قويمالارىنىڭ تەحنيكالىق جاعدايلارى تالاپتارىنىڭ بۇزىلۋىنا بايلانىستى شەكتەلدى. مىسالى، اتىراۋ وبلىسىندا كومپانيالاردىڭ بىرىنە جۇرگىزىلگەن تەكسەرۋ بارىسىندا تەحنيكالىق تالاپتاردىڭ بۇزىلۋى، ياعني كۇزەت- دابىل جۇيەسىنىڭ جانە تەرەزەلەردەگى تەمىر تورلاردىڭ جوقتىعى انىقتالدى.

وندا بولعان 7,3 توننا پرەكۋرسور پلومبالانىپ، ارنايى ورىنعا ساقتاۋعا تاپسىرىلدى.