پوليتسيا جول اپاتى جيىلەگەن سامارا - شىمكەنت تاسجولىندا باقىلاۋدى كۇشەيتەتىن بولدى

اقتوبە. KAZINFORM - اقتوبە پوليتسياسى سامارا- شىمكەنت تاسجولىندا باقىلاۋدى كۇشەيتتى. ەندى قوزعالىس كوبەيگەن كەزدە الىپ ءجۇرۋدى ۇيىمداستىرادى.

پوليتسيا سامارا - شىمكەنت تاسجولىندا جەڭىل اۆتوكولىكتەردى جانە جۇك كولىكتەرىن الىپ ءجۇرۋدى باستادى. اسىرەسە جول-كولىك اپاتى ءجيى تىركەلەتىن اقتوبە- قارابۇتاق ارالىعى نازاردا بولادى.

- ەكى كۇندە وبلىستا 12 ادام كوز جۇمدى. جۇك كولىگى قارسى باعىتقا شىعىپ، جەڭىل كولىكپەن سوقتىعىستى. بارلىعى 8 ادام، ونىڭ ىشىندە 5 بالا قازا تاپتى. جول اپاتىنىڭ نەگىزگى سەبەبى - باسىپ وزۋ ەرەجەسىن بۇزۋ. پوليتسيا جولدى بىرنەشە بولىككە ءبولىپ الىپ، قوزعالىس كۇشەيگەن كەزدە الىپ ءجۇرۋدى ۇيىمداستىرادى. جۇرگىزۋشىلەر، ادامدار كەپتەلىس تۋدىرادى دەپ ايتىپ جاتىر. ءبارى قاۋىپسىزدىك ءۇشىن ەكەنىن ۇمىتپاعان دۇرىس. قازىرگى كەزدە 107 جۇك كولىگىن الىپ ءجۇردى. بۇل جولدا 16 توپ ءجۇر. ءاربىر 30-40 شاقىرىمعا ءبىر پوليتسيا توبىنان كەلەدى، - دەدى اقتوبە وبلىستىق پ د جەرگىلىكتى پوليتسيا قىزمەتى باسقارماسىنىڭ باستىعى ايدوس قۇلجانوۆ.

ول ادامداردىڭ پوليتسياعا كىنا ارتاتىنىن، ال شىن مانىندە جولداعى بارلىق ادام ەرەجەگە باعىنۋى قاجەت ەكەنىن ءتۇسىندىردى.

- ساراپتاپ كەلە تاڭەرتەڭ 8:00-11:00 اراسىندا كولىكتىڭ كوپ جۇرەتىنى انىقتالدى. تۇستە ۇيىقتايتاپ، تاماقتاناتىن سەكىلدى. 15:00-18:00 اراسىندا دا قوزعالىس جيىلەيدى. قازىر كولىكتەردى جيىپ- جيىپ الىپ جۇرەمىز. كەپتەلىستى قولدان جاساپ جاتىر دەگەن ادامدارعا ءبارى باس اماندىعى ءۇشىن دەپ ايتقىم كەلەدى، - دەدى ايدوس قۇلجانوۆ.

ەسكە سالساق، وتكەن اپتادا فۋتبولدان تۋرنيرگە بارا جاتقان بالالار سامارا- شىمكەنت تاسجولىندا مەرت بولدى. بىردەن جۇك كولىگىنىڭ جۇرگىزۋشىسى قامالدى.

كەيىن وسى جولدا تاعى دا جۇك كولىگى جانە جەڭىل كولىك سوقتىعىستى. وندا ەكى ادام كوز جۇمدى.

ال اقتوبە قالاسى اۋماعىندا جەڭىل كولىك جۇك كولىگىنىڭ استىندا قالىپ، ەكى ادام جان تاپسىردى.

اۆتور
التىناي ساعىندىقوۆا