پوليتسيا «حاكەرلىك شابۋىل» جاساپ، 350 ميلليون تەڭگەنى ۇرلاعان كۇدىكتىنى ۇستادى

استانا. KAZINFORM - وتكەن جىلى جامبىل وبلىستىق بالالار اۋرۋحاناسىنا «حاكەرلىك شابۋىل» جاسالىپ، سالدارىنان ونىڭ ەسەپشوتىنان 350 ميلليون تەڭگە ۇرلانعان بولاتىن.

بۇل وقيعاعا بايلانىستى پوليتسەيلەر سوتقا دەيىنگى تەرگەۋ امالدارىن جۇرگىزدى.

جۇرگىزىلگەن جەدەل-ىزدەستىرۋ ءىس-شارالارىنىڭ ناتيجەسىندە اتالعان قىلمىستىق قۇقىق بۇزۋشىلىقتى جاسادى دەگەن كۇدىكپەن بۇرىن سوتتالعان 33 جاستاعى ەر ادام ۇستالدى.

- ۇرلانعان 305 ميلليون تەڭگە اۋرۋحانا شوتتارىنا قايتارىلدى، - دەلىنگەن جامبىل وبلىسى پ د حابارلاماسىندا.

قىلمىستىق ءىستىڭ ماتەريالدارى قوسىمشا تەرگەۋ جۇرگىزۋ ءۇشىن جامبىل وبلىسى بويىنشا ەكونوميكالىق تەرگەۋ دەپارتامەنتىنە جىبەرىلدى.

ق پ ك-نىڭ 201-بابىنا سايكەس، تەرگەۋ مۇددەسىندەگى وزگە دە مالىمەتتەر جاريا ەتىلمەيدى.