پوليتسيا اسكەرگە شاقىرىلعانداردى ماجبۇرلەپ جەتكىزۋگە قۇقىلى - قورعانىس مينيسترلىگى

استانا. KAZINFORM - قورعانىس مينيسترلىگى كامەلەت جاسىنا تولعان ازاماتتاردىڭ اسكەري مىندەتىن وتەۋ ءتارتىبىن تاعى دا ءتۇسىندىردى.

«بۇقارالىق اقپارات قۇرالدارى مەن الەۋمەتتىك جەلىلەردە جاستاردى ەرىكسىز ۇستاپ الىپ، جەرگىلىكتى اسكەري باسقارۋ ورگاندارىنا جەتكىزىپ جاتقان بەينەماتەريالدار تاراتىلۋدا. شاقىرۋ ناۋقاندارى بارىسىندا كەيبىر ازاماتتاردىڭ اسكەري قىزمەتتەن جالتارىپ، جەرگىلىكتى اسكەري باسقارۋ ورگاندارىنا ۋاقىتىلى كەلمەۋ فاكتىلەرى بايقالادى. سونىمەن قاتار اسكەرگە شاقىرۋ جاسىنداعى ازاماتتاردى ەسەپكە الۋدا دا قيىندىقتار تۋىندايدى. ويتكەنى، كوپشىلىگى تىركەلگەن جەرىندە تۇرمايدى. ال قونىس اۋدارعان جاعدايدا جاڭا تۇرعىلىقتى مەكەنجايىنا تىركەلمەيدى»، - دەپ ءتۇسىندىردى مينيسترلىكتەن.

اسكەرگە شاقىرۋ قاعازى كامەلەت جاسىنا (18 جاس) تولعانداردىڭ قولىنا بەرىلەدى، ال ولاردىڭ اسكەري بولىمگە جەتكىزۋ جاعى ىشكى ىستەر ورگاندارىنا جۇكتەلەدى.

«رەيد كەزىندە كەيبىر ازاماتتار ىشكى ىستەر ورگاندارى قىزمەتكەرلەرىنىڭ زاڭدى تالاپتارىنا باعىنباي، قارسىلىق كورسەتىپ جاتادى. مۇنداي جاعدايدا پوليتسيا قىزمەتكەرلەرى ولاردى ءماجبۇرلى تۇردە ۇستاپ، شاقىرۋ پۋنكتىنە جەتكىزۋدى جۇزەگە اسىرۋعا قۇقىلى. شاقىرۋ كوميسسياسى جەتكىزىلگەن اسكەر جاسىنداعى ازاماتتاردىڭ مارتەبەسىن سول جەردە انىقتايدى. مەرزىمدى اسكەري قىزمەتكە شاقىرۋعا نەگىز بولماعان جاعدايدا ولاردى بوساتادى. ال شاقىرۋعا نەگىز بولسا، مەديتسينالىق كوميسسيادان وتۋگە جانە شاقىرۋ شەڭبەرىندەگى باسقا دا ءىس- شارالاردى وتكىزۋگە جىبەرەدى»، - دەيدى ۆەدومستۆودان.

ەسكە سالساق، قورعانىس مينيسترلىگى بۇعان دەيىن دە جاسوسپىرىمدى اسكەرگە كوشەدەن ەرىكسىز الىپ كەتۋگە قاتىستى مالىمدەمە جاساعان ەدى.

اۆتور

داۋلەت ىزتىلەۋ