پوليتسيا 4 تۋىسىن ءولتىردى دەپ كۇدىككە ىلىنگەن اقمولالىقتىڭ ءىزىن سۋىتپاي ۇستادى

استانا. KAZINFORM - اقمولا وبلىسى پوليتسيا دەپارتامەنتىنىڭ باسشىلىعى ارشالى اۋدانىندا جاسالعان كىسى ءولتىرۋ قىلمىسىن تەرگەۋ بارىسىن باقىلاۋىنا الدى.

الەۋمەتتىك جەلىلەردە ارشالى اۋدانىنىڭ جىبەك جولى اۋىلىندا قاتىگەزدىكپەن كىسى ءولتىرۋ تۋرالى حابارلامالار پايدا بولدى. ەر ادام وتباسى مۇشەلەرىن ءولتىرىپ، ولاردىڭ دەنە مۇشەلەرىن بولشەكتەپ تاستاعان.

بەيرەسمي دەرەككوزدەردەن بىردەن ءتورت ادامنىڭ ولتىرىلگەنى بەلگىلى بولدى.

اقمولا وبلىستىق پوليتسيا دەپارتامەنتى باسپا ءسوز قىزمەتىنىڭ حابارلاۋىنشا، ءتارتىپ ساقشىلارى ارشالى اۋدانىنداعى جىبەك جولى اۋىلىندا كىسى ءولتىردى دەگەن كۇدىككە ىلىنگەن ەر ادامدى ۇستاپ، ول ۋاقىتشا ۇستاۋ يزولياتورىنا قامالدى.

- كىسى ءولتىرۋ فاكتىسى بويىنشا قىلمىستىق ءىس قوزعالدى. پوليتسيا دەپارتامەنتىنىڭ باسشىلىعى تەرگەۋ بارىسىن ءوز باقىلاۋىنا الدى. باسقا اقپارات تەرگەۋ مۇددەسى ءۇشىن جاريالانبايدى، - دەپ ءتۇسىندىردى ۆەدومستۆو.

پوليتسيا سونىمەن قاتار ايماق تۇرعىندارىن الەۋمەتتىك جەلىلەردە جالعان اقپارات تاراتپاۋعا شاقىردى.

- جىبەك جولى اۋىلىندا كىسى ءولتىرۋ فاكتىسىنە بايلانىستى مەسسەندجەرلەر مەن الەۋمەتتىك جەلىلەردە ءارتۇرلى بولجامدار مەن جالعان اقپارات تاراپ جاتىر. پوليتسيا ازاماتتاردى تەك رەسمي اقپارات كوزدەرىنە سەنۋگە جانە تەكسەرىلمەگەن اقپاراتتى تاراتپاۋعا شاقىرادى. كورىنەۋ جالعان اقپاراتتى تاراتقاندارعا قازاقستان رەسپۋبليكاسىنىڭ زاڭناماسىنا سايكەس جاۋاپكەرشىلىك قاراستىرىلعانىن ەسكە سالامىز، - دەپ قوستى ۆەدومستۆو.

وسىعان دەيىن شىمكەنتتە جول ورتاسىندا توبەلەسىپ، كىسى ولتىرگەن كۇدىكتىلەر ۇستالعانىن جازدىق.