وليمپيادادا ءساتسىز ونەر كورسەتكەن بوكسشى كارەراسىنا قاتىستى تاعى دا مالىمدەمە جاسادى

استانا. KAZINFORM - بوكستان قازاقستان قۇراماسىنىڭ مۇشەسى ساكەن بيبوسىنوۆ پاريج وليمپياداسىنان سوڭ كارەراسىن ءارى قاراي جالعاستىراتىنىن ايتتى، - دەپ حابارلايدى olympic.kz.

ايتا كەتەلىك، الەۋمەتتىك جەلىدە مىرزاعالي ايتجانوۆتىڭ سوڭىنان بيبوسىنوۆتىڭ دا قۇرامادان كەتەتىنى تۋرالى اقپار تاراعان. سپورتشى بۇل جاڭالىقتىڭ شىندىققا جاناسپايتىنىن جەتكىزدى.

«ەشتەڭە وزگەرگەن جوق. بۇرىنعىداي ءالى دە بوكستامىن. وليمپيادادا ويداعىداي ناتيجە كورسەتە المادىم. ەلگە كەلىپ، بىردەن جاتتىعۋعا كىرىسىپ كەتتىم.

جەلىدە ءبىراز ادام مەنىڭ قۇرامادان كەتەتىنىم تۋرالى حابار تاراتىپتى. بۇل شىندىققا جاناسپايدى، جالعان مالىمەت.

ءيا، قازىر باپكەرلەر قۇرامى اۋىسقان سوڭ، الداعى جارىس جوسپارلارىنا قاتىستى ناقتى ەشتەڭە ايتا المايمىن. الايدا ۇلكەن سپورتتان ءالى كەتپەگەنىمدى، ءارى قاراي جۇدىرىقتاساتىنىمدى ايتقىم كەلەدى.

ال وليمپياداعا كەلەر بولساق، ءبىزدىڭ ءبىراز جىگىتتەر 2:3 ەسەبىمەن قارسىلاسقا ەسە جىبەردى. بۇل ساتسىزدىك ءبىزدى شىڭداي تۇسەرىنە سەنەمىن.

مىرزاعالي ايتجانوۆ اعايىمىز ۇلتتىق قۇرامادان كەتسە دە، ونىڭ ەڭبەگىن ەشكىم جوققا شىعارمايدى. باپكەرىممەن ءاردايىم بىرگەمىن»، - دەدى بيبوسىنوۆ.

ساكەن بيبوسىنوۆ بوكستان الەم چەمپيونى ءارى الەم بىرىنشىلىگىنىڭ قولا جۇلدەگەرى (2021، 2019)، توكيو وليمپياداسىنىڭ قولا جۇلدەگەرى (2020).