وليمپيادا ويىندارىن بوكسسىز ەلەستەتۋ مۇمكىن ەمەس - باقىت سارسەكبايەۆ
استانا. KAZINFORM - ءوز باسىم وليمپيادا ويىندارىن بوكسسىز ەلەستەتە المايمىن. بۇل اقىلعا سىيمايتىن، كوڭىلگە قونبايتىن، مۇمكىن ەمەس دۇنيە سياقتى. بۇل تۋرالى استانادا وتكەن «ۇزدىك-2024» پرەمياسىنىڭ ماراپات كەشىندە بەيجىڭ وليمپياداسىنىڭ چەمپيونى باقىت سارسەكبايەۆ ايتىپ بەردى.
- باقىت ءابدىراحمان ۇلى، ءسىزدى جاقىندا «ەلىمىزدىڭ بوكس فەدەراتسياسىنان جاڭا قىزمەت الدى» دەپ ەستىپ جاتىرمىز. بۇل قانشالىقتى راس؟
- بۇيىرسا الداعى ۋاقىتتا ۋاقىتتا ەسكپەريمەنتالدى قۇرامانى باپتاپ، 18-22 جاس ارالىعىنداعى قىز-جىگىتتەرگە ءوز تاجىريبەممەن بولىسەتىن بولامىن. باستى نەگىزگى مىندەتىم - قۇراماعا رەزەرۆ جاساقتاۋ. بۇل مىندەت مەن ءۇشىن اسا جاۋاپتى بولماق. قازىرگى تاڭدا بۇعان قاتىستى ارنايى جوسپارىم بار. ناقتى قاي باعىتتا جۇمىس ىستەيتىنىمىزدى اقىلدىسىپ، شەشەتىن بولامىز.
- ءسىز بيىلعى وليمپيادا ويىندارىنا دەيىن دە، وليمپيادا ويىندارىنان كەيىن دە ۇلتتىق قۇراماداعى ولقىلىقتار تۋرالى ايتىپ، ءوز پىكىرلەرىڭىزدى ايتىپ كەلدىڭىز. سول كەمشىلىكتەرمەن قانداي جۇمىس اتقارىپ جاتسىز؟
- وليمپيادادان كەيىن ۇلتتىق قۇرامادا كوپتەگەن وزگەرىستەر ورىن الدى. بۇكىل باپكەرلەر قۇرامى وزگەردى. ەل بىرىنشىلىگى كەشە عانا اياقتالدى. ەندى جاڭا قۇرام جاساقتالادى. كەيبىر بوكسشىلار سالماق ساناتتارىن وزگەرتىپ جاتىر. جاڭا جىلدان كەيىن جاڭاشا جوسپارلار مەن جاڭاشا جۇمىستار جۇرگىزىلەدى دەپ ويلايمىن.
- قازىرگى تاڭدا بوكس الەمىندە نەشە ءتۇرلى داۋ-داماي ءجۇرىپ جاتىر. ءتىپتى، كەلەسى 2028-جىلى وتەتىن كەزەكتى وليمپيادا ويىندارىنىڭ جارىس كەستەسىنە بوكس ەنبەي قالۋى مۇمكىن دەگەن قاۋەسەتتەر بار. بۇل مۇمكىن بە؟
- بىرىنشىدەن - وليمپيادا ويىندارىنا دەيىن ءالى ءتورت جىل بار. ەكىنشىدەن - ول قاۋەسەت. سوندىقتان شىندىققا جاناساسپايتىن، ناقتىلى شەشىمىن تاپپاعان دۇنيەگە باس قاتىرۋدىڭ قاجەتى شامالى. ءوز باسىم وليمپيادا ويىندارىن بوكسسىز ەلەستەتە المايمىن. بۇل اقىلعا سىيمايتىن، كوڭىلگە قونبايتىن، مۇمكىن ەمەس دۇنيە سياقتى. ءبىزدىڭ باستى مىندەتىمىز - تالانتتى بوكسشى دايىنداۋ. ءبىز ءوز ءىسىمىزدى جۇيەلى جۇرگىزىپ، مىقتى شاكىرتتەر تاربيەلەي بەرەيىك. قالعانىن ۋاقىت كورسەتەدى.
ەستەرىڭىزگە سالا كەتەيىك، كەشە استانادا «ۇزدىك-2024» پرەمياسىنىڭ ماراپاتتاۋ ءراسىمى وتكەن بولاتىن.
اۆتور كۇنسۇلتان وتارباي
