وليمپيادا چەمپيونى ميحايل شايدوروۆ: قازاقستاندىقتاردىڭ قولداۋىن سەزىندىم

ميلان. KAZINFORM - مانەرلەپ سىرعاناۋدان 2026 -جىلعى قىسقى وليمپيادا ويىندارىنىڭ چەمپيونى ميحايل شايدوروۆ قازاقستاندىقتارعا العىس ايتتى.

ميلاندا ءوتىپ جاتقان وليمپيادا ويىندارىنىڭ ماراپاتتاۋ سالتاناتىنان كەيىن سپورتشى ب ا ق وكىلدەرىنە شاعىن سۇحبات بەرىپ، وتانداستارىنا سالەمىن جولدادى.

- شىنىمدى ايتسام، قولداۋ وتە كەرەمەت بولدى. اسىرەسە تريبۋناداعى قولداۋ ماعان ەرەكشە اسەر ەتتى. بارلىق ەكراننان تاماشالاعان جانە ارنايى وسىندا كەلگەن جانكۇيەرلەرگە، سونىمەن قاتار الەۋمەتتىك جەلىدە قولداۋ ءبىلدىرىپ جاتقان بارلىق قازاقستاندىقتارعا كوپ راحمەت ايتامىن، — دەدى شايدوروۆ.

سونداي-اق ول كوماندامىزداعى وزگە دە سپورتشىلارعا ساتتىلىك تىلەدى.

— ءدال قازىرگى ساتتە نە بولىپ جاتقانىن سوزبەن ايتىپ جەتكىزە المايمىن. تەك وسى ساتتەن ءلاززات العىم كەلەدى. قازاقستاندىق سپورتشىلارعا ساتتىلىك تىلەيمىن. الداعى جارىستارعا بارىپ قولداۋ كورسەتەمىن دەپ ويلايمىن، — دەدى وليمپيادا چەمپيونى.

سپورتشى وسى ماۋسىم اسا اۋىر بولعانىن، وليمپيادا ويىندارى ءۇشىن ۇزاق دايىندالعانىن جاسىرمادى.

— ماۋسىم بويى ءوز- وزىممەن كۇرەستىم. جارىستاردا بەس بىردەي تورتتىك سەكىرۋدى شامامەن ءۇش رەت ورىنداپ كورۋگە تىرىستىم، ءبىراق بىردە- ءبىر رەت ءساتتى شىقپادى. ال بۇگىن ءبارى ءساتتى ورىندالدى. ءساتى ءتۇسىپ، قولىمنان كەلدى. وليمپياداعا ۇزاق دايىندالدىم. ماۋسىم بويى بار ويىم — ءوز ءىسىمدى ادال اتقارۋ بولدى. ەندى ەڭبەگىمنىڭ جەمىسىن كورىپ وتىرمىن. بۇل مەدالدى قازاقستان حالقىنا ارنايمىن، — دەدى ول.

سونىمەن قاتار م. شايدوروۆ دەنيس تەننىڭ ەلىمىزدە مانەرلەپ سىرعاناۋ سپورتىنىڭ دامۋىنا قوسقان ۇلەسىن اتاپ ءوتتى.

— قازاقستاندا مانەرلەپ سىرعاناۋدىڭ دامىعانىن قالايمىن. مەنىڭ مەدالىم دەنيس تەن ءۇشىن دە ماڭىزدى بولار ەدى دەپ ويلايمىن. ول بىزگە جول اشتى. ونىڭ دا جولى وڭاي بولعان جوق، مەنىكى دە جەڭىل بولمادى. ەلىمىزدەگى مانەرلەپ سىرعاناۋ سپورتىنىڭ دامۋىنا قوسقان ۇلەسى ءۇشىن دەنيسكە العىس ايتامىن، — دەدى وليمپيادا چەمپيونى.

وسىعان دەيىن حابارلاعانىمىزداي، ميحايل شايدوروۆ اراعا 32 جىل سالىپ، ەل قورجىنىنا قىسقى وليمپيادا ويىندارىنىڭ كەزەكتى التىن جۇلدەسىن سىيلادى.

اۆتور

مۇحتار قاليموللا ۇلى