وليگارحتاردان تاركىلەنگەن زەرگەرلىك بۇيىمدار اۋكسيوندا ساتىلدى
- 23 -ساۋىردە E- Qazyna ەلەكتروندى پلاتفورماسىندا بەس بىردەي زەرگەرلىك بۇيىم بويىنشا اۋكسيون تۇرىندەگى ساۋدا-ساتتىق ءوتتى. بۇل تۋرالى قايتارىلعان اكتيۆتەردى باسقارۋ كومپانياسى مالىمدەدى.
ساتىلعان زەرگەرلىك بۇيىمداردىڭ قاتارىندا قايتارىلعان اكتيۆتەر بولاتىن «CARTIER LOVe» بىلەزىگى مەن جۇزىگى، يزۋمرۋد تاسى بار سىرعالار، اكۆامارين تاسى بار جۇزىك، گاۋھار تاستى التىن جۇزىك جانە ءىنجۋ مەن گاۋھار تاستارمەن كومكەرىلگەن سىرعالار بار.
رەاليزاتسيالانعان اكتيۆتەردىڭ جالپى سوماسى - 5425246 تەڭگە.
- زەرگەرلىك بۇيىمداردى ساتۋ ازاماتتاردىڭ الەۋمەتتىك باستامالاردى دامىتۋعا سانالى تۇردە قاتىسۋىنىڭ جارقىن مىسالى. اۋكسيون ارقىلى اكتيۆتەردى ساتىپ الا وتىرىپ، ءاربىر قاتىسۋشى ەل بولاشاعىنا ۇلەس قوسادى. سەبەبى تۇسكەن قاراجات ارنايى مەملەكەتتىك قورعا اۋدارىلىپ، ماڭىزدى قوعامدىق جوبالاردى قولداۋعا جۇمسالادى، - دەپ حابارلادى قايتارىلعان اكتيۆتەردى باسقارۋ كومپانياسى.
ەسكە سالساق، 14-ناۋرىزدا وتكەن ۇلتتىق قۇرىلتايدا قاسىم-جومارت توقايەۆ سوڭعى ءۇش جىلدا ەلگە 2 تريلليون تەڭگەدەن استام اكتيۆ قايتارىلعانىن مالىمدەگەن ەدى.
ال 14-ساۋىردە پرەمەر-مينيستر ولجاس بەكتەنوۆ مەملەكەت مەنشىگىنە زاڭسىز الىنعان اكتيۆتەردى قايتارۋ جونىندەگى كوميسسيا وتىرىسىن وتكىزدى.
جيىندا شامامەن 610 ميلليارد تەڭگە كولەمىندەگى اكتيۆتەردىڭ قايتارىلعانى ايتىلدى.
