گولوۆكين تايلاندتا ازيا چەمپيوناتىنىڭ فينالدىق باسەكەلەرىن تاماشالايدى

استانا. KAZINFORM - قازاقستان ۇلتتىق وليمپيادالىق كوميتەتىنىڭ پرەزيدەنتى گەننادي گولوۆكين حالىقارالىق بوكس فەدەراتسياسى World Boxing-كە مۇشە ازيالىق ەلدەردىڭ العاشقى جۇمىس وتىرىسىنا قاتىسادى.

بۇل جيىن تايلاندتىڭ چيانگماي قالاسىندا وتەدى.

كەزدەسۋدىڭ باستى ماقساتى - جاڭا ازيا بوكس كونفەدەراتسياسىن قۇرۋ.

ەسكە سالايىق، بۇعان دەيىن World Boxing ازيا ايماعىندا بوكستى دامىتۋ جانە ىلگەرىلەتۋمەن اينالىساتىن ۇيىمنىڭ قۇرىلعانىن رەسمي تۇردە جاريالاعان ەدى.

جيىن بارىسىندا World Boxing وليمپيادالىق كوميسسياسىنىڭ ءتوراعاسى گەننادي گولوۆكين تايلاند بوكس فەدەراتسياسى مەن ۇلتتىق وليمپيادالىق كوميتەتىنىڭ باسشىسى پيچاي چۋنحاۆادزيرامەن ەكىجاقتى كەزدەسۋ وتكىزەدى.

سونىمەن قاتار قازاقستان ۇ و ك باسشىسى چيانگمايدا 10-11-جەلتوقسان ارالىعىندا وتەتىن ازيا چەمپيوناتىنىڭ فينالدىق باسەكەلەرىن تاماشالايدى.

ەسكە سالايىق، قازاقستاندىق توعىز بوكسشى ازيا چەمپيوناتىنىڭ فينالىنا شىققان ەدى. فينالدىق جەكپە-جەكتەر 11-جەلتوقسان كۇنى وتەدى.

قازاقستان قۇراماسى 13 سالماقتا دا بوكسشى الا بارعان. وكىنىشكە قاراي، ساكەن بيبوسىنوۆ، مۇحاممەدسابىر بازارباي ۇلى مەن بيبارىس جەكسەن جارتىلاي فينالعا شىعا المادى.

ايەلدەر اراسىندا 5 بوكسشىمىز فينالدا جۇدىرىقتاسادى. ولاردىڭ فينالدىق جەكپە-جەگى 10-جەلتوقسان كۇنى وتەدى.