گولوۆكين حالىقارالىق وليمپيادا كوميتەتى پرەزيدەنتىمەن كەزدەستى

استانا. KAZINFORM - قازاقستان ۇلتتىق وليمپيادالىق كوميتەتىنىڭ پرەزيدەنتى گەننادي گولوۆكين وسى كۇندەرى اسۋنسوندە (پاراگۆاي) ءوتىپ جاتقان Panam Sports باس اسسامبلەياسىنا قاتىستى، - دەپ حابارلايدى ق ر ۇ و ك باسپا ءسوز قىزمەتى.

شارا اياسىندا قازاقستان ۇ و ك باسشىسى مەن حالىقارالىق وليمپيادالىق كوميتەت پرەزيدەنتى توماس باحتىڭ كەزدەسۋى بولىپ ءوتتى.

باح مىرزا گەننادي گولوۆكيننىڭ الەمدىك بوكسقا قوسقان ۇلەسىنە جوعارى باعا بەرىپ، ونى World Boxing وليمپيادالىق كوميسسيا ءتوراعاسى بولىپ سايلانۋىمەن قۇتتىقتادى. سونىمەن بىرگە الداعى ىنتىماقتاستىق جەمىستى بولاتىنىنا سەنىم ءبىلدىردى.

گەننادي گولوۆكين ح و ك پرەزيدەنتىنە كوميسسيانىڭ ەگجەي-تەگجەيلى جۇمىس جوسپارىن تانىستىرىپ، الداعى ۋاقىتقا جوسپارلانعان مىندەتتەردى اتاپ ءوتتى. قوس تاراپ تا بوكستىڭ وليمپيادا باعدارلاماسىندا قالۋىنىڭ، سونىڭ ىشىندە 2028-جىلى لوس-اندجەلەستە وتەتىن الداعى وليمپيادا ويىندارىنا ەنۋىنىڭ ماڭىزى زور ەكەنىن باسا ايتتى.

سونىمەن بىرگە قازاقستان ۇ و ك پرەزيدەنتى جاڭا تاعايىندالعان Panam Sports پرەزيدەنتى جانە چيلي ۇ و ك باسشىسى نيەۆەن يليچپەن كەزدەستى.

گەننادي گولوۆكين نيەۆەن يليچتى Panam Sports باس اسسامبلەياسى اياسىندا وليمپيادالىق كوميسسيانىڭ جۇمىسىنا ۇسىنعان الاڭ ءۇشىن العىس ءبىلدىردى. نيەۆەن يليچ ءوز كەزەگىندە تولىقتاي قولداۋ كورسەتۋگە جانە بىرلەسە جۇمىس ىستەۋگە دايىن ەكەنىن جەتكىزدى.

ايتا كەتەيىك، Panam Sports باس اسسامبلەياسى اياسىندا World Boxing وليمپيادالىق كوميسسياسى وڭتۇستىك جانە سولتۇستىك امەريكا ۇلتتىق وليمپيادالىق كوميتەتتەرىمەن ءبىرقاتار كەزدەسۋ وتكىزەدى.