ولجاس بەكتەنوۆ وتاندىق ماشينا سالاسىن دامىتۋ بويىنشا تاپسىرما بەردى

استانا. KAZINFORM - «سامۇرىق-قازىنا» قورىنا 2025-جىلدىڭ سوڭىنا دەيىن ساتىپ الۋ راسىمىندەگى جەرگىلىكتى قامتۋ ۇلەسىن %89 عا دەيىن ارتتىرۋ تاپسىرىلدى. بۇل تۋرالى ق ر پرەمەر-ءمينيسترى ولجاس بەكتەنوۆ ۇكىمەت وتىرىسىندا ايتتى.

«وتاندىق وندىرۋشىلەردى قولداۋ ءۇشىن ءبىز ءبىرقاتار ماشينا جاساۋ تاۋارلارىن مەملەكەتتىك ساتىپ الۋ تىزىمىنەن شىعاردىق. وسىعان قاراماستان، مەردىگەر ۇيىمداردىڭ جاسىرىن تۇردە يمپورتتىق تاۋارلاردى ساتىپ الۋ فاكتىلەرى جالعاسۋدا. سوندىقتان ونەركاسىپ جانە قارجى مينيسترلىكتەرىنە جۇمىستار مەن كورسەتىلەتىن قىزمەتتەردەگى وتاندىق ۇلەس تالاپتارىنىڭ ورىندالۋىنا باقىلاۋدى كۇشەيتۋدى تاپسىرامىن. سونىمەن بىرگە، پرەمەر جابدىقتاردىڭ توزۋ دەڭگەيىن تومەندەتۋدى تاپسىردى. ماشينا جاساۋدا بۇل كورسەتكىش ورتا ەسەپپەن %40 عا جۋىقتايدى. «ماشينا جاساۋ كاسىپورىندارى ءوندىرىستى جاڭعىرتىپ، تاۋارلاردىڭ جاڭا تۇرلەرىن شىعارۋ ءۇشىن جەڭىلدىكتى نەسيەلەرمەن قامتىلۋعا ءتيىس. ونەركاسىپ، قارجى، ۇلتتىق ەكونوميكا مينيسترلىكتەرىنە جانە «بايتەرەك» حولدينگىنە ماقۇلدانعان قارجى-ەكونوميكالىق نەگىزدەمەلەر شەڭبەرىندە ماشينا جاساۋداعى جوبالاردى قوسىمشا قارجىلاندىرۋدى تاپسىرامىن»، - دەدى ولجاس بەكتەنوۆ.

سونداي-اق «سامۇرىق-قازىنا» قورى جانە ونىڭ ەنشىلەس ۇيىمدارى - وتاندىق ماشينا جاساۋ سالاسى ونىمدەرىنىڭ ءىرى تۇتىنۋشىلارىنىڭ ءبىرى. بيىلعى جىل قورىتىندىسى بويىنشا حولدينگتىڭ ساتىپ الۋ راسىمىندەگى جەرگىلىكتى قامتۋ ۇلەسىن %82 عا دەيىن ۇلعايتۋ كۇتىلۋدە.

«سامۇرىق-قازىنا» قورىنا 2025-جىلدىڭ سوڭىنا دەيىن بۇل كورسەتكىشتى %89 عا دەيىن ارتتىرۋدى تاپسىرامىن. كاسىپورىنداردى قولداۋ ءۇشىن ءارى قاراي دا وففتەيك جانە ۇزاق مەرزىمدى كەلىسىمشارتتار مەحانيزمىن پايدالانۋ كەرەك. مۇنداي شارتتاردى بەكىتۋ كەزىندە بيزنەستىڭ قارسى مىندەتتەمەلەرىن كوزدەۋ قاجەت. ولار لوكاليزاتسيالاۋ دەڭگەيىن ارتتىرىپ، جاڭا جۇمىس ورىندارىن قۇرۋعا، ءىرى كاسىپورىنداردىڭ اينالاسىندا شاعىن جانە ورتا كاسىپورىندار اشۋعا باسا نازار اۋدارۋعا ءتيىس. بۇل ماشينا جاساۋ سالاسىمەن قاتار، بۇكىل ونەركاسىپتىڭ وسۋىنە مۋلتيپليكاتيۆتىك اسەر بەرەدى»، - دەدى پرەمەر-مينيستر.