ولجاس بەكتەنوۆ ورتالىق ازيا ەلدەرى دەلەگاتسيالارى باسشىلارىمەن ارالدى قۇتقارۋ قورىنىڭ باسىم مىندەتتەرىن تالقىلادى

استانا. KAZINFORM - مەملەكەت باسشىسىنىڭ تاپسىرماسى بويىنشا پرەمەر- مينيستر ولجاس بەكتەنوۆ قازاقستان رەسپۋبليكاسىنىڭ توراعالىعىمەن وتكىزىلەتىن حالىقارالىق ارالدى قۇتقارۋ قورى باسقارماسىنىڭ ءبىرىنشى وتىرىسىنا قاتىسۋشى ەلدەر دەلەگاتسيالارى باسشىلارىمەن كەزدەسۋ وتكىزدى.

بۇل تۋرالى ۇكىمەتتىڭ باسپا ءسوز قىزمەتى حابارلادى.

كەزدەسۋ بارىسىندا ترانسشەكارالىق سۋ رەسۋرستارىن بىرلەسىپ پايدالانۋ ماسەلەلەرى، سونداي- اق ارال تەڭىزى باسسەينىندەگى ەكولوگيالىق جانە الەۋمەتتىك- ەكونوميكالىق ماسەلەلەردى ودان ءارى شەشۋ شارالارى قارالدى.

قازاقستان 2024-2026 -جىلدار ارالىعىندا حالىقارالىق ارالدى قۇتقارۋ قورىنىڭ ءتوراعاسى بولىپ سانالادى.

«بۇگىندە مەملەكەتتەرىمىزدىڭ باسشىلارى سۋ سالاسىنا ەرەكشە كوڭىل ءبولىپ وتىر. قازاقستان پرەزيدەنتى قاسىم-جومارت توقايەۆ ارالدى قۇتقارۋ ۇزاقمەرزىمدى حالىقارالىق ىنتىماقتاستىقتىڭ باسىم باعىتىنا اينالۋى ءتيىس ەكەنىن باسا ايتتى. قوردىڭ باستى مىندەتى - ورتالىق ازيانىڭ سۋ-ەنەرگەتيكالىق رەسۋرستارىن قورعاۋ، ولاردىڭ الەۋمەتتىك- ەكونوميكالىق، ەنەرگەتيكالىق، يرريگاتسيالىق جانە ەكولوگيالىق ماڭىزدىلىعىن ەسكەرە وتىرىپ، ولاردى كەشەندى ءارى ۇتىمدى پايدالانۋ. ورتاق كۇش- جىگەرىمىزدىڭ ارقاسىندا ەلدەرىمىز ءۇشىن ماڭىزدى سانالاتىن بىرەگەي سۋ ايدىنىنىڭ جاعدايىن ساپالى تۇردە جاقسارتا الامىز دەپ ۇمىتتەنەمىن»، - دەپ اتاپ ءوتتى ولجاس بەكتەنوۆ.

قابىلدانىپ جاتقان شارالارعا قاراماستان، ارال تەڭىزى باسسەينىندەگى سۋ رەسۋرستارىنىڭ، ونىڭ ىشىندە كليماتتىڭ وزگەرۋىنە بايلانىستى ءوسىپ كەلە جاتقان تاپشىلىعىن ەسكەرە وتىرىپ، ح ا ق ق الدىندا مۇددەلى مەملەكەتتەردىڭ شوعىرلانۋىن كۇشەيتۋ مىندەتى تۇر.

ق ر پرەمەر- مينيستر ولجاس بەكتەنوۆ وڭىرلىك ىنتىماقتاستىق ينستيتۋتىنىڭ ماڭىزدى رولىنە توقتالىپ، حاقق مۇشە مەملەكەتتەرى باسشىلارى قازاقستاننىڭ ءتوراعالىق ەتۋ كەزەڭىندە قوردىڭ الدىنا قويعان باسىم مىندەتتەرىن اتاپ ءوتتى.

بارلىق تاراپتىڭ مۇددەسىن ەسكەرە وتىرىپ، ورتالىق ازياداعى سۋ-ەنەرگەتيكالىق ىنتىماقتاستىقتىڭ كەشەندى جانە ءوزارا ءتيىمدى تەتىگىن ودان ءارى پىسىقتاۋ قاجەتتىگى اتاپ ءوتىلدى. اتاپ ايتقاندا، جاڭا سيفرلىق تەحنولوگيالاردى ەنگىزۋ، جەردى قاشىقتان زوندتاۋدىڭ سپۋتنيكتىك دەرەكتەرىن پايدالانۋ - ىنتىماقتاستىقتى نىعايتۋعا جانە سۋ رەسۋرستارىنىڭ ەداۋىر كولەمىن ۇنەمدەۋگە مۇمكىندىك بەرەدى.

بۇدان باسقا، ەنەرگەتيكالىق جانە يرريگاتسيالىق پروتسەستەردى رەتتەۋدىڭ تيىمدىلىگىن ارتتىرۋ ماقساتىندا ءوڭىر ەلدەرىنىڭ ارال تەڭىزى باسسەينىندە سۋ رەسۋرستارىن ەسەپكە الۋدىڭ، مونيتورينگ جۇرگىزۋدىڭ، باسقارۋدىڭ جانە ءبولۋدىڭ ءبىرىڭعاي اۆتوماتتاندىرىلعان جۇيەسىن ازىرلەۋ ءارى ەنگىزۋ جونىندەگى جۇمىس جانداناتىن بولادى. بۇل شارالار مەملەكەتتەردىڭ قاجەتتىلىگىن جابۋداعى تەپە- تەڭدىككە قول جەتكىزۋگە جانە كۇزگى- قىسقى كەزەڭدە ەلەكتر ەنەرگياسىنىڭ، جازعى كەزەڭدە سۋارمالى سۋدىڭ تاپشىلىعىنا جول بەرمەۋگە باعىتتالعان.

سونداي- اق باسىم مىندەتتەر قاتارىندا – ح ا ق ق ۇيىمدىق قۇرىلىمىن جانە شارتتىق- قۇقىقتىق بازاسىن جەتىلدىرۋ پروتسەسىن اياقتاۋ تۇر. بۇگىنگى تاڭدا ساراپشىلاردىڭ جۇمىس توبى ءتيىستى جۇمىس جۇرگىزۋدە.

كەزدەسۋ بارىسىندا تاجىكستان پرەمەر- ءمينيسترىنىڭ ورىنباسارى زيزودا سۋلايمون، تۇرىكمەنستان مينيسترلەر كابينەتى ءتوراعاسىنىڭ ورىنباسارى تانگرىگۋلي اتاحاللىيەۆ، وزبەكستان پرەزيدەنتىنىڭ كەڭەسشىسى شۋحرات گانيەۆ ۇسىنىستارىن ايتتى.

تالقىلاۋ قورىتىندىسى بويىنشا ولجاس بەكتەنوۆ ءوڭىردىڭ ەكوجۇيەسىن جاقسارتۋ جونىندەگى جالپى ىسكە قوسقان ۇلەسى ءۇشىن دەلەگاتسيا باسشىلارىنا العىسىن ءبىلدىرىپ، قازاقستان ۇكىمەتىنىڭ بىرلەسكەن جوسپارلاردى ىسكە اسىرۋ ءۇشىن سىندارلى ديالوگقا مۇددەلى ەكەنىن اتاپ ءوتتى.

انىقتاما:

حالىقارالىق ارالدى قۇتقارۋ قورىن 1993 -جىلى ورتالىق ازيانىڭ بەس مەملەكەتى - قازاقستان، قىرعىزستان، وزبەكستان، تاجىكستان جانە تۇرىكمەنستان قۇردى. ۇيىمدى قۇرۋداعى ماقسات ارالدىڭ قۇرعاۋىنىڭ قورشاعان تابيعي ورتاعا جانە ءوڭىر حالقىنا تەرىس اسەرىن ازايتۋ جونىندەگى ەلدەردىڭ كۇش- جىگەرىن بىرىكتىرۋ بولدى. قور بىرلەسكەن مەملەكەتارالىق ەكولوگيالىق جانە عىلىمي- پراكتيكالىق باعدارلامالار مەن جوبالاردى ىسكە اسىرادى.