ولجاس بەكتەنوۆ سەناتورلاردىڭ ا ە س- ءتى كۋرچاتوۆتا سالۋ ۇسىنىسىنا جاۋاپ بەردى
استانا. KAZINFORM - پرەمەر- مينيستر ولجاس بەكتەنوۆ سەناتتىڭ ءبىر توپ دەپۋتاتىنىڭ اتوم ەلەكتر ستانساسىن كۋرچاتوۆتا سالۋ ۇسىنىسىنا جاۋاپ بەردى.
- اتوم سالاسىن دامىتۋ ماسەلەلەرى جونىندەگى ۆەدومستۆوارالىق كوميسسيانىڭ شەشىمىنە سايكەس، اتوم ەلەكتر ستانساسى قۇرىلىسى ءۇشىن ورىندى الماتى وبلىسىنىڭ جامبىل اۋدانىنا قاراستى ۇلكەن اۋىلىنا تاقاۋ اۋدان بەلگىلەندى، - دەدى ۇكىمەت باسشىسى جاۋابىندا.
ايتا كەتەيىك، قاراشا ايىنىڭ باسىندا اباي وبلىسىنىڭ كۋرچاتوۆ قالاسىندا سەناتتىڭ حالىقارالىق قاتىناستار، قورعانىس جانە قاۋىپسىزدىك كوميتەتىنىڭ رادياتسيالىق جانە سەيسميكالىق قاۋىپسىزدىك ماسەلەلەرى جونىندەگى كوشپەلى وتىرىسى ءوتىپ، ستراتەگيالىق ماڭىزى بار وبەكتىلەردىڭ قورعانىسى تالقىلاندى.
وسى كوشپەلى وتىرىستان كەيىن سەناتور اندرەي لۋكين ۇكىمەت باسشىسىنىڭ اتىنا جولداعان دەپۋتاتتىق ساۋالىندا يادرولىق عىلىم ورتالىعى سانالاتىن كۋرچاتوۆ قالاسىنىڭ پروبلەمالارى تۋرالى ماسەلە كوتەردى.
- كۋرچاتوۆ قالاسىنا عىلىمي قالاشىق مارتەبەسىن بەرۋ ماسەلەسى كوپتەگەن جىلدار بويى كوتەرىلىپ كەلەدى. 2012 -جىلى پرەمەر- ءمينيستردىڭ وكىمىمەن عىلىم قالاشىعى تۋرالى زاڭنامانى ازىرلەۋ بويىنشا ۇسىنىس دايىنداۋ ماقساتىندا جۇمىس توبى قۇرىلعان بولاتىن. سونىمەن قاتار، «كۋرچاتوۆ عىلىمي قالاشىعى» كلاستەرىنىڭ تۇجىرىمداماسى جانە «عىلىمدى قاجەت ەتەتىن اۋماقتار تۋرالى» زاڭ جوباسى دا ازىرلەندى. شىن مانىندە، كۋرچاتوۆتىڭ عىلىمي قالاعا اينالۋىنا بارلىق نەگىز بار، ءبىراق ماسەلە بۇگىنگى كۇنگە دەيىن شەشىلگەن جوق. «عىلىم تۋرالى» ارنايى زاڭنىڭ قابىلدانۋى كۋرچاتوۆ قالاسىنىڭ ءوزىن دە، وندا ورنالاسقان عىلىمي ورتالىقتاردى دا دامىتۋعا قۋاتتى سەرپىن بەرەدى دەپ سەنەمىز. وسىلايشا، ەلىمىزدىڭ پرەزيدەنتى قاسىم-جومارت توقايەۆتىڭ قازاقستان حالقىنا جولداۋىندا ايتىلعان «مونوقالالارعا دەم بەرۋ» جانە «وڭىرلەردى بەلسەندى دامىتۋ» تۋرالى تاپسىرماسىن ورىنداۋعا مۇمكىندىك بەرەدى، - دەدى سەناتور لۋكين.
سونداي- اق ول ءبىر توپ سەناتوردىڭ اتىنان ا ە س- ءتى كۋرچاتوۆ قالاسىندا سالۋ مۇمكىندىگىن قاراستىرۋدى ۇسىنعان بولاتىن.
اۆتور
مارلان جيەمباي
