ولجاس بەكتەنوۆ قازاق-قىتاي كەلىسىمدەرىن جۇزەگە اسىرۋ ماسەلەلەرى بويىنشا كەڭەس وتكىزدى
استانا. KAZINFORM - ولجاس بەكتەنوۆ جوعارى دەڭگەيدەگى كەلىسسوزدەر قورىتىندىسى بويىنشا قازاق- قىتاي كەلىسىمدەرىن جۇزەگە اسىرۋ ماسەلەلەرى بويىنشا كەڭەس وتكىزدى. بۇل تۋرالى ۇكىمەتتىڭ باسپا ءسوز قىزمەتى حابارلادى.
پرەمەر مينيستر ولجاس بەكتەنوۆ قىتاي حالىق رەسپۋبليكاسىمەن ىنتىماقتاستىق ماسەلەلەرى بويىنشا كەڭەس وتكىزدى. پرەزيدەنت قاسىم-جومارت توقايەۆ پەن ق ح ر ءتوراعاسى شي جينپيڭنىڭ تاياۋداعى ساپارى بارىسىنداعى كەلىسسوزدەرى اياسىندا قول جەتكىزىلگەن ۋاعدالاستىقتاردى ەسكەرە وتىرىپ، ينۆەستيتسيالىق جوبالاردى ىسكە اسىرۋ ماسەلەلەرى تالقىلاندى.
سىرتقى ىستەر مينيسترلىگى دەرەكتەرى بويىنشا، قازىر قازاقستاندا قىتايلىق ينۆەستورلاردىڭ قاتىسۋىمەن 50 مىڭعا جۋىق جۇمىس ورنى اشىلىپ، جالپى قۇنى $66,4 ميلليارد بولاتىن 224 يندۋستريالىق جوبا جۇزەگە اسىرىلۋدا. ق ح ر قازاقستان ەكونوميكاسىنداعى ەڭ ءىرى ينۆەستورلاردىڭ بەستىگىنە كىرەدى: 2005-2024 -جىلدار ارالىعىندا ينۆەستيتسيا كولەمى $26,4 ميلليارد.
پرەمەر-مينيستر ق ح ر ءتوراعاسىنىڭ تاياۋدا قازاقستانعا جاساعان ساپارى ىنتىماقتاستىققا ەلەۋلى سەرپىن بەرگەنىن اتاپ ءوتتى. سونداي-اق استانادا وتكەن «ورتالىق ازيا - قىتاي» يندۋستريالىق جانە ينۆەستيتسيالىق ىنتىماقتاستىق فورۋمىنىڭ ماڭىزدىلىعى اتاپ ءوتىلدى. فورۋم اياسىندا قازاقستان مەن قىتاي اراسىندا جالپى قۇنى $24 ميللياردتى قۇرايتىن 58 كوممەرتسيالىق كەلىسىمگە قول قويىلدى.
- مەملەكەت باسشىسى 2029 -جىلعا دەيىن كەمىندە $150 ميلليارد كولەمىندە شەتەلدىك ينۆەستيتسيا تارتۋ مىندەتىن قويدى. وسى تۇرعىدا جەتەكشى ەكونوميكالىق دەرجاۆالاردىڭ ءبىرى جانە ءبىزدىڭ نەگىزگى ينۆەستيتسيالىق سەرىكتەسىمىز قىتاي ەلىمەن تولىققاندى كووپەراتسيانى ودان ءارى تەرەڭدەتۋ - قازاقستاننىڭ اسا ماڭىزدى باسىمدىعى. سوندىقتان ينۆەستيتسيالار كولەمىن ارتتىرۋ، جاڭا بىرلەسكەن جوبالاردى ىسكە قوسۋ، اسىرەسە شيكىزاتتىق ەمەس ءارى ەكسپورتقا باعدارلانعان ونىمدەردى ءوندىرۋ بويىنشا جۇيەلى شارالار قاجەت. ق ح ر ءتوراعاسىنىڭ جاقىندا قازاقستانعا جاساعان ساپارى ەكى ەل اراسىنداعى ەكونوميكالىق ارىپتەستىكتىڭ جوعارى دەڭگەيىن دالەلدەپ، ودان ءارى نىعايتا ءتۇستى. ءاربىر جوبانىڭ جۇزەگە اسىرىلۋى مەنىڭ تىكەلەي باقىلاۋىمدا بولادى، تولىق قولداۋ كورسەتىلەدى، - دەپ تاپسىردى ولجاس بەكتەنوۆ.
پرەمەر- مينيستر جاڭا جوبالارى جوق وڭىرلەردە، ونىڭ ىشىندە اباي، شىعىس قازاقستان، باتىس قازاقستان وبلىستارىندا جۇمىستى جانداندىرۋ قاجەتتىگىن باسا ايتتى ولجاس بەكتەنوۆ اتالعان ءوڭىر باسشىلىعىنا قىسقا مەرزىمدە سەرىكتەستەرمەن ءوزارا ءىس- قيمىل ورناتۋدى جانە ناقتى باستامالار ۇسىنۋدى تاپسىردى.
ۇزاقمەرزىمدى سەرىكتەستىك ورناتۋ جانە ينۆەستيتسيا تارتۋ ماقساتىندا ايماقتىق دەلەگاتسيالاردىڭ قىتاي پروۆينتسيالارىنا ساپارلارىن جانداندىرۋ جونىندەگى تاپسىرمانى ىسكە اسىرۋعا نازار اۋدارىلدى. ولجاس بەكتەنوۆ الماتى قالاسى، جامبىل، قىزىلوردا، اتىراۋ، پاۆلودار، اقتوبە، س ق و، ش ق و، ب ق و، الماتى جانە اباي وبلىستارى سياقتى ءبىرقاتار وڭىردە وڭ ديناميكاعا توقتالىپ، وندا كەزدەسۋلەر وتكىزىلىپ، كەلىسىمدەر جاسالىپ، الدىن الا ۋاعدالاستىقتار بەلگىلەنگەنىن اتاپ ءوتتى. قالعان وڭىرلەرگە وسى باعىتتا جۇمىس ىستەۋ تاپسىرىلدى.
سونداي-اق كەڭەس بارىسىندا «ورتالىق ازيا - قىتاي» فورۋمى اياسىندا وڭىرلەردىڭ قىتايلىق سەرىكتەستەرمەن جاساسقان جاڭا كەلىسىمدەرىن جۇزەگە اسىرۋ ماسەلەلەرى قارالدى. ماسەلەن، الماتى وبلىسىندا «جاسىل» ەنەرگەتيكا، لوگيستيكا، اوك جانە ونەركاسىپ سالاسىنداعى جوبالاردى قوسا العاندا، $6 ميللياردتان استام سومانى قۇرايتىن 7 قۇجاتقا قول قويدى. استانا قالاسى، قىزىلوردا جانە تۇركىستان وبلىستارى ينفراقۇرىلىم، اگروونەركاسىپ جانە ونەركاسىپ سالالارىندا باستامالار ۇسىندى.
كەڭەس قورىتىندىسى بويىنشا مەملەكەتتىك جانە جەرگىلىكتى اتقارۋشى ورگاندارعا قول قويىلعان كەلىسىمدەردى ءىس جۇزىندە جۇزەگە اسىرۋدى، ءاربىر كەزەڭدە بارلىق جوبانى سۇيەمەلدەۋدى، سونداي-اق ءبىرىڭعاي مەملەكەتتىك ينۆەستيتسيالىق ساياسات شەڭبەرىندە ءىس- قيمىلداردى ۇيلەستىرۋدى قامتاماسىز ەتۋ تاپسىرىلدى.
ايتا كەتەلىك بۇعان دەيىن ولجاس بەكتەنوۆ ۆەگەتاتسيالىق كەزەڭدە سۋ تاۋەكەلدەرىن باسقارۋ جونىندەگى وڭىرلىك شتابتار قۇرۋدى تاپسىرعان ەدى.
