ولجاس بەكتەنوۆ پەن سلوۆەنيا پرەزيدەنتى ءبىرقاتار ماسەلەنى تالقىلادى

استانا. KAZINFORM - پرەمەر-مينيستر ولجاس بەكتەنوۆ پەن سلوۆەنيا پرەزيدەنتى ناتاشا پيرتس-مۋسار ساۋدا-ەكونوميكالىق ىنتىماقتاستىق ماسەلەلەرىن تالقىلادى. بۇل تۋرالى ۇكىمەتتىڭ باسپا ءسوز قىزمەتى حابارلادى.

كەزدەسۋ بارىسىندا قازاقستان پرەزيدەنتى قاسىم-جومارت توقايەۆ پەن سلوۆەنيا پرەزيدەنتى ناتاشا پيرتس-مۋسار اراسىنداعى ساۋدا-ەكونوميكالىق جانە ينۆەستيتسيالىق ءوزارا ءىس-قيمىلدى نىعايتۋ تۋرالى قول جەتكىزىلگەن ۋاعدالاستىقتاردى جۇزەگە اسىرۋ ماسەلەلەرى قارالدى.

ساۋدا سالاسىندا ىسكەرلىك كەڭەستىڭ جۇمىسىنا نازار اۋدارىلدى، ول تاۋ-كەن، مۇناي-گاز جانە باسقا دا سالالاردا ارىپتەستىكتى تەرەڭدەتۋدىڭ جانە تاجىريبە الماسۋدىڭ قوسىمشا تەتىگى بولۋى ءتيىس. قازاقستاندا قولايلى بيزنەس- كليمات ورناتۋ ءۇشىن بارلىق شارا قابىلدانىپ جاتىر.

كولىك- لوگيستيكا سالاسىنداعى، ونىڭ ىشىندە ترانسكاسپي حالىقارالىق كولىك باعىتىن دامىتۋ اياسىنداعى ىنتىماقتاستىق تالقىلاندى. «ورتا ءدالىز» بويىنداعى بىرلەسكەن لوگيستيكالىق جانە ينفراقۇرىلىمدىق جوبالاردىڭ كەلەشەگى قاراستىرىلدى.

ەنەرگەتيكا سالاسىندا ينفراقۇرىلىمعا بىرلەسكەن ينۆەستيتسيالار تارتۋ، جاڭارتىلاتىن ەنەرگيا كوزدەرىن دامىتۋ جانە ەنەرگيا تيىمدىلىگىن ارتتىرۋ مۇمكىندىكتەرى قارالدى. سونداي-اق سۋ رەسۋرستارىن باسقارۋعا دا نازار اۋدارىلدى. سونىمەن قاتار جاڭا بۋىننىڭ سيفرلىق قىزمەتتەرىن دامىتۋ جانە ج ي ەلەمەنتتەرىن ەنگىزۋ بويىنشا بىرلەسكەن تەحنولوگيالىق جوبالاردى جۇزەگە اسىرۋ پەرسپەكتيۆالارى تالقىلاندى.

كەزدەسۋ سوڭىندا ەكى ەل پرەزيدەنتتەرى قول جەتكىزگەن ناقتى ۋاعدالاستىقتارى مەن بىرلەسكەن مالىمدەمەلەرىن جۇزەگە اسىرۋ ماسەلەلەرى ىنتىماقتاستىق جونىندەگى ۇكىمەتارالىق كوميسسيانىڭ ەرەكشە باقىلاۋىندا بولاتىنى اتاپ ءوتىلدى.

ايتا كەتەيىك، قاسىم-جومارت توقايەۆ پەن ناتاشا پيرتس-مۋسار قازاقستان-سلوۆەنيا بيزنەس-فورۋمىنا قاتىستى.