ولجاس بەكتەنوۆ مينسكىدە ەۋرازيالىق ۇكىمەتارالىق كەڭەس وتىرىسىنا قاتىستى
استانا. KAZINFORM - مينسك قالاسىندا قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ بەلارۋس رەسپۋبليكاسىنىڭ پرەزيدەنتى الەكساندر لۋكاشەنكونىڭ تاۋەلسىز مەملەكەتتەر دوستاستىعى ۇكىمەتتەرى مەن ەۋرازيالىق ۇكىمەتارالىق كەڭەس باسشىلارىنىڭ وتىرىستارىنا قاتىسۋشىلارمەن ۇجىمدىق كەزدەسۋىنە، سونداي-اق شاعىن جانە كەڭەيتىلگەن قۇرامداعى ە ۇ ا ك وتىرىسىنا قاتىستى.
بەلارۋس رەسپۋبليكاسىنىڭ پرەزيدەنتىمەن ۇجىمدىق كەزدەسۋ بارىسىندا ءوزارا ساۋدا مەن ەكونوميكالىق بايلانىستاردى دامىتۋ ماسەلەلەرى تالقىلاندى. ونەركاسىپتىك ىنتىماقتاستىقتى تەرەڭدەتۋگە جانە كەلەشەگى زور سالالاردا بىرلەسكەن يننوۆاتسيالىق جوبالاردى جۇزەگە اسىرۋعا نازار اۋدارىلدى.
ەۋرازيالىق ۇكىمەتارالىق كەڭەس وتىرىسىنا بەلارۋس رەسپۋبليكاسىنىڭ پرەمەر-ءمينيسترى الەكساندر تۋرچين، قىرعىز رەسپۋبليكاسى پرەزيدەنتى اكىمشىلىگىنىڭ باسشىسى - مينيسترلەر كابينەتىنىڭ ءتوراعاسى ادىلبەك كاسىماليەۆ، رەسەي فەدەراتسياسى ۇكىمەتىنىڭ ءتوراعاسى ميحايل ميشۋستين، ارمەنيا رەسپۋبليكاسىنىڭ ۆيتسە-پرەمەر-ءمينيسترى مگەر گريگوريان (بەينەكونفەرەنسيا ارقىلى)، ە ا ە و جانىنداعى باقىلاۋشى ەلدەردەن - وزبەكستان رەسپۋبليكاسىنىڭ پرەمەر-ءمينيسترى ابدۋللا اريپوۆ، يران رەسپۋبليكاسىنىڭ ونەركاسىپ، شاحتا جانە ساۋدا ءمينيسترى سەيەد موحامماد تاباك، كۋبا رەسپۋبليكاسىنىڭ ونەركاسىپ ءمينيسترى ەلوي الۆارەس مارتينەس، ءىس-شاراعا شاقىرىلعان ەلدەردەن - ازەربايجان رەسپۋبليكاسىنىڭ پرەمەر-ءمينيسترى الي اسادوۆ قاتىستى. سونداي-اق ە ە ك القاسىنىڭ ءتوراعاسى باقىتجان ساعىنتايەۆ، ت م د باس حاتشىسى سەرگەي لەبەديەۆ جانە باسقا دا وكىلدەر قاتىستى.
شاعىن قۇرامدا 2025-جىلعى 31-قاڭتاردا وتكەن ە ۇ ا ك وتىرىسىندا بەرىلگەن تاپسىرمالاردىڭ ورىندالۋ بارىسى قارالدى. ءبىرقاتار ۇيىمداستىرۋشىلىق ماسەلە شەشىلدى.
كەڭەيتىلگەن قۇرامدا قاتىسۋشىلار ە ا ە و- نىڭ ينتەگراتسيالانعان اقپاراتتىق جۇيەسىن، كولىك ينفراقۇرىلىمىن دامىتۋ جانە تاعى دا باسقا ماسەلەلەر بويىنشا پىكىر الماستى.
قازاقستان پرەمەر-ءمينيسترى ولجاس بەكتەنوۆ ءوز سوزىندە ەكونوميكالىق ۇدەرىستەردى تەرەڭدەتۋگە باسا نازار اۋداردى. كووپەراتسيادا، كولىك-ترانزيتتىك جانە سيفرلىق سالالاردا ەلەۋلى الەۋەت بارى اتاپ ءوتىلدى.
ە ا ە و- نىڭ جاھاندىق ەكونوميكاداعى ۇستانىمىن نىعايتۋدىڭ ماڭىزدى شارتى - حالىقارالىق ىنتىماقتاستىق جانە جاڭا نارىقتارعا شىعۋ ءۇشىن قولايلى جاعداي جاساۋ.
جيىندا ازىق-تۇلىكپەن قامتاماسىز ەتۋ جانە ورنىقتى دامۋدىڭ ستراتەگيالىق نەگىزى رەتىندە اگروونەركاسىپ كەشەنىنە ارنايى نازار اۋدارىلدى. بۇعان دەيىن بىرلەسكەن ونەركاسىپتىك جوبالار سالاسىندا قولدانىلىپ كەلگەن ە ا ە و بيۋجەتى ەسەبىنەن اۋىل شارۋاشىلىعى سالاسىنا قارجىلاي جاردەمدەسۋ تەتىكتەرىن تارتۋ ماسەلەسى پىسىقتالدى. بۇل ءتاسىل وزىق تەحنولوگيالاردى ەنگىزۋدى جەدەلدەتىپ، تۇراقتى جەتكىزۋ تىزبەگىن نىعايتادى جانە ە ا ە و ەلدەرى ونىمدەرىنىڭ سىرتقى نارىقتارداعى باسەكەگە قابىلەتتىلىگىن ارتتىرادى.
ءوز كەزەگىندە، تەحنيكالىق رەگلامەنتتەردى ازىرلەۋ سالاسىنداعى سيفرلاندىرۋ جۇمىستارى قاۋىپسىزدىككە قويىلاتىن ءبىرىڭعاي تالاپتاردى وزەكتەندىرۋگە، جەدەلدەتۋگە جانە اشىقتىعىن ارتتىرا تۇسۋگە سەپتىگىن تيگىزەدى. ال بىرلەسكەن «سيفرلىق تەحنيكالىق رەتتەۋ» جوباسىن جۇزەگە اسىرۋ ينتەگراتسياعا جاڭا سەرپىن بەرەدى.
«قازاقستان پرەزيدەنتى قاسىم-جومارت كەمەل ۇلى توقايەۆ تاياۋداعى جولداۋىندا الداعى ءۇش جىل ىشىندە قازاقستاندى شىنايى سيفرلىق ەلگە اينالدىرۋ تۋرالى ستراتەگيالىق مىندەت قويدى. قازاقستان ۇكىمەتى قازىر سيفرلاندىرۋ، جاساندى ينتەللەكت تەحنولوگيالارىن ەنگىزۋ بويىنشا قارقىندى جۇمىستار جۇرگىزۋدە. ءبىز جاقىن ارادا Alem.ai حالىقارالىق جاساندى ينتەللەكت ورتالىعىن اشامىز، ول سيفرلىق ەكونوميكانى، شىعارماشىلىق يندۋستريانى ىلگەرىلەتۋدە جانە جاساندى ينتەللەكت ەكوجۇيەسىن قۇرۋدا درايۆەرگە اينالماق. قازاقستاندىق IT شەشىمدەردىڭ ەكسپورتىن ۇلعايتۋ بويىنشا دا جۇمىس ىستەپ جاتىرمىز. بارلىق ارىپتەسىمدى ج ي سالاسىنداعى جوبالاردى قارقىندى جۇزەگە اسىرۋعا شاقىرامىن. بۇل ءبىز ازىرلەپ جاتقان جول كارتاسىندا ەلەۋلى ورىن الۋى ءتيىس»، - دەپ اتاپ ءوتتى ولجاس بەكتەنوۆ.
ە ۇ ا ك وتىرىسىنىڭ قورىتىندىسى بويىنشا ءبىرقاتار قۇجاتقا قول قويىلدى. قابىلدانعان شەشىمدەر ونەركاسىپتىك جانە اگروونەركاسىپتىك كووپەراتسيانى، سيفرلىق ىنتىماقتاستىق قۇرالدارىن دامىتۋعا، وتكىزۋ نارىقتارىن كەڭەيتۋگە جانە وداققا مۇشە مەملەكەتتەردىڭ ەكونوميكالىق ورنىقتىلىعىن نىعايتۋعا باعىتتالعان.
ەۋرازيالىق ۇكىمەتارالىق كەڭەستىڭ كەلەسى وتىرىسى وسى جىلدىڭ جەلتوقسان ايىندا ماسكەۋ قالاسىندا (رەسەي فەدەراتسياسى) وتەدى.
وسىعان دەيىن ولجاس بەكتەنوۆتىڭ مينسكىدە «يننوپروم. بەلارۋس» حالىقارالىق ونەركاسىپ كورمەسىن ارالاپ، «جاڭا تەحنولوگيالار وداعى: بولاشاق ونەركاسىپتى قۇرۋ» تاقىرىبىنداعى پلەنارلىق سەسسيادا ءسوز سويلەگەنى تۋرالى جازدىق.
