ولجاس بەكتەنوۆ ەكونوميكانىڭ دامۋىنا كەدەرگى كەلتىرۋى مۇمكىن فاكتورلاردى اتادى

استانا. KAZINFORM - پارلامەنت پالاتالارىنىڭ بىرلەسكەن وتىرىسىندا پرەمەر- مينيستر ولجاس بەكتەنوۆ ەكونوميكانىڭ وسۋىنە كەدەرگى كەلتىرۋ مۇمكىن فاكتورلاردى اتادى.

«مەملەكەت باسشىسى 2029 -جىلعا قاراي ەكونوميكانى ەكى ەسە ارتتىرۋ مىندەتىن قويعانىن بىلەمىز. بۇل ءۇشىن ەكونوميكامىز كەمىندە جىلىنا 6 پايىز ءوسۋ كەرەك. الايدا قازاقستاننىڭ جالپى ءونىمىنىڭ ناقتى ورتاشا جىلدىق ءوسۋىنىڭ قارقىنى 4-5 پايىزدان اسپايدى. ەكونوميكانىڭ بەلگىلەنگەن ءوسۋ قارقىنىنا قول جەتكىزۋ ءۇشىن قانداي شارالار قابىلدانادى؟» - دەپ سۇرادى دەپۋتات نۇرتاي سابيليانوۆ.

ونىڭ ايتۋىنشا، ەكونوميكانىڭ وسۋىنە سىرتقى فاكتورلار كوبىرەك اسەر ەتۋى مۇمكىن.

«راسىندا دا مەملەكەت باسشىسى قويعان مىندەت وتە اۋقىمدى. وسىنداي ءوسۋ قارقىنىنا جەتۋگە بىرنەشە فاكتور كەدەرگى بولۋى مۇمكىن. ول - كۇردەلى گەوساياسي جاعداي، نەگىزگى ساۋدا سەرىكتەستەرىمىزدىڭ ەكونوميكالارىنداعى احۋال جانە تاعى باسقالار»، - دەدى ۇكىمەت باسشىسى.

ولجاس بەكتەنوۆ ءوزى باسقارىپ وتىرعان ۇكىمەت بار رەزەرۆتەر مەن كۇشتەردى جۇمىلدىرىپ، بەلسەندى جۇمىس اتقارىپ جاتقانىن ايتادى.

«قازىردىڭ وزىندە قاراساق ەكونوميكانىڭ كەيبىر سالالارىندا ءوسۋ قارقىنى جامان ەمەس. مىسالى، قۇرىلىس، كولىك پەن بايلانىس سالاسىندا ءوسۋ قارقىنى 8 پايىزعا جۋىق. ساۋدا سالاسىندا كورسەتكىشتەر تومەن بولىپ وتىر. وعان تاسقىن سالدارى اسەر ەتتى دەپ ويلايمىز. ءبىراق قازىرگى تاڭدا كورسەتكىشتەر قالپىنا كەلە باستادى. ءبىزدىڭ پىكىرىمىزشە، ەكونوميكانىڭ كەيبىر سالالارى وتە جوعارى ءوسۋ الەۋەتىنە يە. اتاپ ايتساق، قۇرىلىس، ينفراقۇرىلىم، وڭدەۋ ءوندىرىسى جانە اگروونەركاسىپ كەشەنى»، - دەدى ول.

اۆتور

ەسىمجان ناقتىباي