ولجاس بەكتەنوۆ جاڭا مينيسترلەرگە: از سويلەپ، كوپ ءىس تىندىرۋ كەرەك

government
Photo: primeminister.kz

استانا. KAZINFORM – ق ر پرەمەر-ءمينيسترى ولجاس بەكتەنوۆ ۇلتتىق ەكونوميكا، قارجى، توتەنشە جاعدايلار جانە دەنساۋلىق ساقتاۋ مينيسترلىكتەرىنىڭ جاڭا باسشىلارىن تانىستىردى.

ۇكىمەت باسشىسى جاڭادان تاعايىندالعان پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى نۇرلان بايبازاروۆقا ۆەدومستۆو الدىندا اۋقىمدى جانە امبيتسيالىق مىندەتتەر تۇرعانىن اتاپ ءوتتى.

«ۇلتتىق ەكونوميكا مينيسترلىگىن رەفورمالار مەن ەكونوميكالىق سەرپىلىسكە قول جەتكىزۋ بويىنشا العا قويىلعان مىندەتتەردى جۇزەگە اسىرۋداعى نەگىزگى كۇش دەپ ايتۋعا بولادى. بۇعان قاجەت بارلىق رەسۋرستار بار دەپ ويلايمىن. ەڭ باستىسى، مينيسترلىكتى فورماليزمسىز، بيۋروكراتياسىز، قاجەتسىز جيىندارسىز بەلسەندى جۇمىس ىستەۋگە باعىتتاعىم كەلەدى. از سويلەپ، كوپ ءىس تىندىرۋ كەرەك»، - دەدى ولجاس بەكتەنوۆ.

ءمادي تاكيەۆتى قارجى مينيسترلىگىنىڭ ۇجىمىنا تانىستىرۋ بارىسىندا پرەمەر-مينيستر ۆەدومستۆونى مەملەكەتتىك باسقارۋداعى ماڭىزدى ورگانداردىڭ ءبىرى ەكەنىن اتاپ ءوتتى.

«سول سەبەپتى مەملەكەت باسشىسى دا، پرەمەر-مينيستر رەتىندە مەن دە قارجى مينيسترلىگىنىڭ بارلىق باعىتتار بويىنشا ناقتى، بەلسەندى جۇمىس اتقاراتىنىنا سەنەمىز»، - دەدى ولجاس بەكتەنوۆ.

شىڭعىس ءارىنوۆتى توتەنشە جاعدايلار مينيسترلىگىنىڭ ۇجىمىنا تانىستىرىپ، پرەمەر-مينيستر ۆەدومستۆو جۇمىسىنىڭ نەگىزگى باعىتتارىن اتاپ ءوتتى.

«جاقىندا عانا الماتىدا مەملەكەت باسشىسى جەر سىلكىنىسىنەن كەيىن مينيسترلىككە ناقتى سىن ايتتى. توتەنشە جاعدايلار مينيسترلىگىنىڭ الدىندا توتەنشە جاعدايلارعا جەدەل ارەكەت ەتۋ جانە الدىن الۋ جۇيەلەرىن جاڭعىرتۋ بويىنشا وتە ماڭىزدى مىندەتتەر تۇر. پرەزيدەنت قويعان مىندەتتەردى شىڭعىس سايران ۇلى ابىرويمەن ورىندايدى دەپ ويلايمىن»، - دەدى ۇكىمەت باسشىسى.

ولجاس بەكتەنوۆ دەنساۋلىق ساقتاۋ مينيسترلىگىنىڭ ۇجىمىنا اقمارال ءالنازاروۆانى تانىستىرۋ كەزىندە ونىڭ تاجىريبەسى مەن جوعارى كاسىبي بىلىكتىلىگىن اتاپ ءوتتى.

مينيسترلىكتىڭ الدىندا دەنساۋلىق ساقتاۋ جۇيەسىن جاڭعىرتۋ جانە ودان ءارى ونىڭ تيىمدىلىگىن ارتتىرۋ مىندەتى تۇر.

«بۇل - مەملەكەتتىك ساياساتتىڭ ەڭ ماڭىزدى باعىتى. دەنساۋلىق ساقتاۋ جۇيەسىن جاڭا دەڭگەيگە كوتەرۋ ءۇشىن ءبارىمىز بىرىگىپ جۇمىس ىستەۋىمىز كەرەك. ءبىز بۇعان جان- جاقتى كومەكتەسەمىز»، - دەپ تۇيىندەدى ولجاس بەكتەنوۆ.

پرەمەر-مينيستر ۇكىمەتتىڭ جاڭا قۇرامىنا ەنبەگەن بارلىق بۇرىنعى مينيسترلەرگە اتقارعان جۇمىسى ءۇشىن العىس ايتتى.

سوڭعى جاڭالىقتار