ولجاس بەكتەنوۆ شەتەلدىك ينۆەستورلار كەڭەسىنىڭ ارالىق وتىرىسىن وتكىزدى
استانا. KAZINFORM - وتىرىستا ەلىمىزدەگى ينۆەستورلار قىزمەتىنىڭ وزەكتى ماسەلەلەرى، ولاردىڭ ەلىشىلىك قۇندىلىقتى دامىتۋعا قوسقان ۇلەسى قارالدى، دەپ حابارلايدى ۇكىمەتتىڭ باسپا ءسوز قىزمەتى.
مەملەكەت باسشىسىنىڭ تاپسىرماسى بويىنشا ۇكىمەت بيزنەس احۋالدى جاقسارتۋ، ەكونوميكانى ءارتاراپتاندىرۋ قارقىنىن ارتتىرۋ بويىنشا جۇيەلى شارالار قابىلداپ جاتىر. بۇل كاپيتالدىڭ قوسىمشا اعىنىن قامتاماسىز ەتۋگە، رەسۋرستىق الەۋەتتى ارتتىرۋعا جانە جاڭا ونەركاسىپ ءوندىرىسىن ىسكە قوسۋعا مۇمكىندىك بەرەدى. پرەمەر-مينيستر ەكونوميكانىڭ باسىم سالالارىندا جاڭا جوبالاردى جۇزەگە اسىرۋ، تەرەڭ لوكاليزاتسيالاۋدى قامتاماسىز ەتۋ جانە حالىقتى جۇمىسپەن قامتۋدى كەڭەيتۋ ءۇشىن ينۆەستورلارمەن تىعىز ءوزارا ءىس- قيمىل جۇرگىزۋگە باسا نازار اۋداردى.
- مەملەكەت باسشىسى قازىرگى گەوساياسي جانە ەكونوميكالىق جاعدايدا جەكە ينۆەستيتسيالار تارتۋ ارقىلى كاسىپكەرلىك بەلسەندىلىكتى ارتتىرۋ ءۇشىن قولايلى ورتا قۇرۋ باسىم باعىت ەكەنىن اتاپ وتكەن بولاتىن. ءبىز سىزدەرمەن قازاقستاندا جۇمىسپەن قامتۋدى ارتتىرۋعا جانە تەرەڭ لوكاليزاتسيالاۋعا ىقپال ەتەتىن جاڭا ءوندىرىس ورىندارىن قۇرۋعا مۇددەلىمىز. ىنتىماقتاستىقتىڭ جاڭا باعىتتارىنىڭ الەۋەتىن اشۋ جانە ەكونوميكانىڭ باسىم سەكتورلارىندا سەرپىندى جوبالاردى ىسكە اسىرۋ ماڭىزدى. ول ءۇشىن بىزدە بارلىق جاعداي جاسالعان. قازاقستان ۇكىمەتى سىندارلى ديالوگقا اشىق جانە ەلىمىزدىڭ دامۋىنا ىقپال ەتەتىن شەشىمدەردى بىرلەسىپ جۇزەگە اسىرۋعا دايىن، - دەپ اتاپ ءوتتى ولجاس بەكتەنوۆ.
وتىرىس بارىسىندا ينۆەستيتسيالىق ساياساتتى جۇزەگە اسىرۋ؛ دەنساۋلىق ساقتاۋ جانە فارماتسيەۆتيكا ونەركاسىبىن دامىتۋ؛ ەنەرگەتيكا، ەكولوگيا جانە مۇناي-گاز سالاسى؛ ەڭبەك زاڭناماسى، ادامي كاپيتالدى دامىتۋ؛ تسيفرلاندىرۋ ماسەلەلەرى بويىنشا بىرلەسكەن جۇمىس توپتارىنىڭ باياندامالارى تىڭدالدى.
«قازاقستاندىق شەتەلدىك ينۆەستورلار كەڭەسى» قاۋىمداستىعىنىڭ باسقارما ءتوراعاسى، ورتالىق ازيا مەن كاۆكاز ەلدەرىندەگى EY باسقارۋشى سەرىكتەسى ەرلان دوسىمبەكوۆ، ExxonMobil Kazakhstan Inc. باسقارۋشى ديرەكتورى سەسيل رولين، «كناۋف گيپس قاپشاعاي» ج ش س قازاقستان، قىرعىزستان جانە تاجىكستان رەسپۋبليكالارىندا ماركەتينگ جانە وتكىزۋ جونىندەگى ديرەكتورى ديميتري پروپپ، KPMG Caucasus and Central Asia باسقارۋشى سەرىكتەسى ءارى اتقارۋشى ديرەكتورى ساكەن جۇماشەۆ، «حيمفارم» ا ق باس ديرەكتورى ادام الەكسەيۋك، ەۋروپا قايتا قۇرۋ جانە دامۋ بانكىنىڭ باسقارۋشى ديرەكتورى حۋسەين ءوزحان ءسوز سويلەدى. سپيكەرلەر الداعى جۇمىس ەكولوگيالىق رەتتەۋدى، بۇلتتى تەحنولوگيالار مەن جاساندى ينتەللەكتىنى، كوشى-قون نورمالارىن جەتىلدىرۋگە، جەر قويناۋىن پايدالانۋ سالاسىنداعى پروتسەستەردى سيفرلاندىرۋعا، كاسپي تەڭىزى دەڭگەيىنىڭ تومەندەۋى ماسەلەسى بويىنشا ۆەدومستۆوارالىق ۇيلەستىرۋدى كۇشەيتۋگە، دەنساۋلىق ساقتاۋعا ينۆەستيتسيالار مەن تەحنولوگيالاردى تارتۋعا باعىتتالاتىنىن اتاپ ءوتتى.
ينۆەستورلار كوتەرگەن ماسەلەلەر بويىنشا ۇلتتىق ەكونوميكا، ەنەرگەتيكا، ەڭبەك جانە حالىقتى الەۋمەتتىك قورعاۋ، سيفرلىق دامۋ، يننوۆاتسيالار جانە اەروعارىش ونەركاسىبى، دەنساۋلىق ساقتاۋ مينيسترلىكتەرىنىڭ باسشىلارى تۇسىندىرمە بەردى. ماسەلەن، قازاقستاندا بيزنەس احۋالدى جاقسارتۋ بويىنشا ءبىرقاتار جۇيەلى شارالار جۇزەگە اسىرىلۋدا. جەرگىلىكتى جەتكىزۋشىلەردى قولداۋدى جانە ولاردى قوسىلعان قۇن تىزبەگىنە بىرىكتىرۋدى كوزدەيتىن «ونەركاسىپتىك ساياسات تۋرالى» زاڭ قابىلداندى.
تۇراقتى بيزنەس-ەكوجۇيەنى قالىپتاستىرۋعا باعىتتالعان 2029 -جىلعا دەيىنگى ينۆەستيتسيالىق ساياسات تۇجىرىمداماسى وزەكتەندىرىلدى. جوبالاردى ىسكە اسىرۋ كەزەڭدەرىن جەڭىلدەتەتىن ۇلتتىق سيفرلىق ينۆەستيتسيالىق پلاتفورما ىسكە قوسىلدى. ينفراقۇرىلىمدىق قولداۋ قامتاماسىز ەتىلدى - ينۆەستورلارعا ارنايى ەكونوميكالىق، يندۋستريالىق جانە شاعىن ونەركاسىپتىك ايماقتارداعى دايىن وندىرىستىك الاڭدار ۇسىنىلادى. جۇمىس ىستەپ تۇرعان وندىرىستەردى جۇكتەۋ جانە جاڭا قاتىسۋشىلاردى تارتۋ ءۇشىن ۇزاقمەرزىمدى شارتتار مەن وففتەيك- كەلىسىمشارتتار جاساسۋ بويىنشا جۇمىس جۇرگىزىلىپ جاتىر.
وتىرىس قورىتىندىسى بويىنشا پرەمەر-مينيستر مەملەكەتتىك ورگاندار مەن ۇيىمدارعا ايتىلعان ماسەلەلەر مەن ۇسىنىمداردى پىسىقتاۋدى تاپسىردى.
بۇعان دەيىن پرەمەر-مينيستر ولجاس بەكتەنوۆ قوستاناي وبلىسىنداعى ءبىلىم بەرۋ نىساندارىنا بارعانىن جازدىق.
