ولجاس بەكتەنوۆ ءوزى تۋرالى قاڭقۋ سوزدەرگە پىكىر ءبىلدىردى
استانا. KAZINFORM – پرەمەر-مينيستر ولجاس بەكتەنوۆ ۇكىمەتتە وتكەن باسپا ءسوز ءماسليحاتىندا ءوزىنىڭ ۇلتتىق قاۋىپسىزدىك كوميتەتىن باسقارۋى مۇمكىن دەگەن سىبىستارعا پىكىر ءبىلدىردى.
- اكتيۆتەردى قايتارۋ جونىندە تەك انتيكور عانا ايتاتىن ەدى. ءبىراق ول ورگان نەگە ەكەنى بەلگىسىز ۇلتتىق قاۋىپسىزدىك كوميتەتىنە بەرىلدى. اكتيۆتەردىڭ قالاي قايتارىلىپ جاتقانى تۋرالى نەگە اقپارات جوق؟ اسحات جۇماعالي قايدا؟ قازىر ۇ ق ك كۇشەيىپ جاتىر دەگەن راس پا جانە ءسىزدىڭ تاجىريبەلى كۇشتىك قۇرىلىم وكىلى رەتىندە بۇل ۆەدومستۆونى باسقاراتىنىڭىز جايلى اڭگىمەلەر تاراپ جاتىر. بۇل قانشالىقتى شىندىققا جاناسادى، - دەپ سۇراق قويدى جۋرناليست.
ءوز جاۋابىندا ولجاس بەكتەنوۆ وزىنە قاتىستى اڭگىمەلەردىڭ قاڭقۋ ءسوز ەكەنىن ايتتى.
- اسحات جۇماعالي (انتيكوردىڭ بۇرىنعى باسشىسى) تۋرالى ەشتەڭە بىلمەيمىن، قازىر، قايتا ۇيىمداستىرۋ پروتسەدۋرالارى ءجۇرىپ جاتىر. سول ىستەردى تاپسىرۋمەن اينالىسىپ جاتقان بولار. ال وزىمە قاتىستى ايتىلىپ جاتقان اڭگىمەلەردىڭ ءبارى - تەك قاڭقۋ ءسوز. قازىر ۇكىمەتتە جۇمىس ىستەپ جاتىرمىز. ەگەر مەملەكەت باسشىسىنىڭ سەنىمى بولسا، ۇكىمەتتەگى جۇمىسىمدى جالعاستىرا بەرەمىن، - دەدى ولجاس بەكتەنوۆ.
بۇعان دەيىن بەكتەنوۆ ءوزى جەتەكشىلىك ەتەتىن «اكتيۆتەردى قايتارۋ كوميسسياسىنىڭ جۇمىسى نەگە كورىنبەيدى؟» دەگەن سۇراققا جاۋاپ بەرگەن ەدى.
سونىمەن بىرگە، پرەمەر-مينيستر 2022-جىلعى قاڭتار وقيعاسى تۋرالى تىلشىلەر سۇراعىنا جاۋاپ بەردى.
