16:28, 09 - اقپان 2024 | GMT +5
ولجاس بەكتەنوۆ بيۋدجەتتەگى باسى ارتىق شىعىنداردى قىسقارتۋدى تاپسىردى
استانا. KAZINFORM - پرەمەر- مينيستر ولجاس بەكتەنوۆ ۇكىمەتتىڭ كەڭەيتىلگەن وتىرىسىندا پرەزيدەنت قاسىم-جومارت توقايەۆ بەرگەن تاپسىرمالاردى ىسكە اسىرۋ ماسەلەلەرى جونىندە كەڭەس وتكىزدى.
كەڭەس كەزىندە ۇكىمەت باسشىسى قارجى-ەكونوميكالىق بلوك مينيسترلەرىنىڭ بايانداماسىن تىڭداپ، بيۋدجەتكە ريەۆيزيا جاساۋدى تاپسىردى.
«قارجى مينيسترلىگى 10 كۇن ىشىندە رەسپۋبليكالىق بيۋدجەتكە جانە ءبىر اي ىشىندە جەرگىلىكتى بيۋدجەتتەردىڭ بارلىعىنا ريەۆيزيا جۇرگىزىپ، اسا ماڭىزى جوق شىعىستاردى ايتارلىقتاي قىسقارتۋى ءتيىس. ەشكىم دە اقشانى ورىنسىز شاشپاۋى كەرەك»، - دەدى ولجاس بەكتەنوۆ.
ايتا كەتەيىك، ۇكىمەتتىڭ كەڭەيتىلگەن وتىرىسىندا ولجاس بەكتەنوۆ مەملەكەت باسشىسىنا تاپسىرمالاردىڭ ورىندالاتىندىعىنا ۋادە بەرگەن بولاتىن.
