ولجاس بەكتەنوۆ پاراليمپيادا ۇلتتىق قۇراماسىنىڭ مۇشەلەرىنە مەملەكەتتىك تۋدى تابىستادى
استانا. قازاقپارات - 28-تامىزدا فرانسيا استاناسى پاريج قالاسىندا XVII جازعى پاراليمپيادا ويىندارى باستالادى.
بۇگىن استانادا ق ر پرەمەر- ءمينيسترى ولجاس بەكتەنوۆ پاراليمپيادا ۇلتتىق قۇراماسىنىڭ مۇشەلەرىنە مەملەكەتتىك تۋدى تابىستادى.
تورتكۇل دۇنيە كوز تىككەن پاريجدەگى دودادا قازاقستان تۋىن پاراليمپيادادان ازيا ويىندارىنىڭ جۇلدەگەرى، (ۆولەيبولدى وتىرىپ ويناۋدان) قازاقستاننىڭ ون دۇركىن چەمپيونى بەرىك ىزماعانبەوتۆ پەن پارا وق اتۋدان چەمپيون سيەۆدا اليەۆا الىپ شىعادى.
سالتاناتتى جيىن بارىسىندا ولجاس بەكتەنوۆ سپورتشىلارعا ىستىق ىقىلاسىن ءبىلدىرىپ، ساتتىلىك تىلەدى.
- پاراليمپيادا تەك سپورت ەمەس، بۇل ادامنىڭ شەكسىز قابىلەتتەرىنىڭ دالەلى. سىزدەردىڭ ەرىك- جىگەرلەرىڭىز بەن باتىلدىقتارىڭىز تاڭدانۋعا تۇرارلىق. ميلليونداعان ادامدار سىزدەردىڭ جانقيارلىقتارىڭىز بەن مىزعىماس رۋحتارىڭىزدان شابىت الادى، ومىردەگى كەدەرگىلەردى جەڭۋدى ۇيرەنەدى. بۇگىن سىزدەرگە تابىستالاتىن تۋ - بىرلىك پەن جەڭىستىڭ سيمۆولى. مەملەكەت باسشىسى الەمنىڭ باستى سپورت جارىستارىندا ەلدىڭ ار- نامىسىن قورعاۋ- قۇرمەتتى مىندەت، زور ابىروي مەن جاۋاپكەرشىلىك ەكەنىن اتاپ ءوتتى. سىزدەر قازاقستاندى حالىقارالىق ارەنادا لايىقتى تانىستىرىپ، جەڭىس تۇعىرىنان كورىنەتىندەرىڭىزگە سەنىمدىمىز، - دەپ اتاپ ءوتتى پرەمەر- مينيستر.
بيىلعى دودادا ۇلتتىق قۇراما پارا ءجۇرۋ، پارا پاۋەرليفتينگ، پارا جەڭىل اتلەتيكا، پارا كانوە، پارا تحەكۆوندو، وتىرىپ ۆولەيبول ويناۋ، پارا وق اتۋ، پارا ۇستەل تەننيسى جانە پارا دزيۋدودا باق سىنايدى. سپورتشىلار وزدەرىنە جۇكتەلگەن جاۋاپكەرشىلىك پەن مىندەتتەلگەن ميسسيانى ادال اتقارۋعا ءسوز بەردى.
- بۇگىنگى كۇن مەن ءۇشىن وتە ماڭىزدى. وسىنداي دەڭگەيدەگى جارىستاردا ەلىمىزدىڭ تۋىن كوتەرۋ - ۇلكەن جاۋاپكەرشىلىك. ءار سپورتشى پاراليمپيادا ويىندارىنا قاتىسۋدى ارماندايدى. قازاقستاننىڭ نامىسىن لايىقتى قورعاۋ ءۇشىن بار كۇشىمىزدى سالامىز. ءبىزدىڭ جۇرەگىمىزدە وتانعا دەگەن سۇيىسپەنشىلىك پەن جەڭىسكە دەگەن ەرەكشە ۇمتىلىس بار، - دەدى بەرىك ىزماعانبەتوۆ.
پاراليمپيادا ويىندارىنا باراتىن سپورتشىلار سانى جىل ساناپ ارتىپ كەلەدى. ماسەلەن، توكيوداعى تارتىسقا قازاقستاننان 26 سپورتشى قاتىسقان بولسا، بيىل ءباسى بيىك بايگەگە سپورتتىڭ 9 تۇرىنەن 44 سپورتشى 33 جولداما جەڭىپ العان. 1996 -جىلدان بەرى جازعى پاراليمپيادا ويىندارىندا دا قازاقستان قۇراماسى 7 مەدال يەلەنگەن.
ەرمۇرات زۇلقارناي
