ولجاس بەكتەنوۆ پاۆلودار وبلىسىنداعى ونەركاسىپتەردى ارالادى
استانا. KAZINFORM - ولجاس بەكتەنوۆ پاۆلودار وبلىسىندا پرەزيدەنتتىڭ ونەركاسىپتى دامىتۋ جونىندەگى تاپسىرمالارىنىڭ ورىندالۋ بارىسىمەن تانىستى. بۇل تۋرالى ق ر ۇكىمەتىنىڭ باسپا ءسوز قىزمەتى ءمالىم ەتتى.
پرەمەر-مينيستر ولجاس بەكتەنوۆ پاۆلودار وبلىسىنا جۇمىس ساپارى اياسىندا «KAZ Minerals Bozshakol» ج ش س جانە «قازاقستاننىڭ ۆاگون جاساۋ كومپانياسى» ج ش س-عا بارىپ، كاسىپورىن وكىلدەرىمەن كەزدەستى. وندا مەملەكەت باسشىسىنىڭ ونەركاسىپتى دامىتۋ، وتاندىق تاۋار وندىرۋشىلەردى قولداۋ جانە تسيفرلىق شەشىمدەردى ەنگىزۋ جونىندەگى تاپسىرمالارىنىڭ ىسكە اسىرىلۋ بارىسى مەن شارالارى تالقىلاندى.
پرەمەر-مينيستر «بوزشاكول» مىس كەنىشى الاڭىندا تەحنولوگيالىق ۇدەرىستەرمەن تانىستى. زاۋىت جىلىنا 30 ميلليون توننا كەن وڭدەيدى. وتكەن جىلى 105 مىڭ توننا مىس ءوندىرىلدى، سونىمەن قاتار مۇندا مىس، التىن، كۇمىس جانە كونتسەنتراتتاعى مىرىش وندىرىلەدى. دايىن ءونىم قىتاي، تۇركيا، وزبەكستان مەن بەلگياعا ەكسپورتتالادى. مەملەكەت باسشىسىنىڭ باستاماسىمەن قولعا الىنعان جۇمىسشى ماماندىقتارى جىلى اياسىندا جاس ماماندار دايارلاۋعا ەرەكشە كوڭىل بولىنۋدە. بيىل كاسىپورىن اقىلى تاعىلىمدامادان ءوتۋ ءۇشىن 200 دەن استام ستۋدەنت تارتۋدى جوسپارلاا وتىر. بۇگىندە كومپانيادا 14 مىڭنان استام جۇمىس ورنى اشىلدى.
پرەمەر-مينيسترگە وندىرىستىك الاڭداردا زاماناۋي تەحنولوگيالاردى ەنگىزۋ، ونىڭ ىشىندە جاساندى ينتەللەكت جۇيەلەرىن دامىتۋ بويىنشا جۇرگىزىلىپ جاتقان جۇمىستار تۋرالى اقپارات بەرىلدى. تولىق ديسپەتچەرلەۋ كەندى ۇساقتاۋدان باستاپ كونسەنترات شىعارۋعا دەيىنگى بارلىق كەزەڭدەردى قامتيدى. سونداي-اق كارەرلەردى 3D مودەلدەۋ ءۇشىن وندىرىستىك پروتسەستەردى مودەلدەۋ جۇيەلەرى مەن دروندار قولدانىلادى. بۇل جۇمىستىڭ دالدىگى مەن تيىمدىلىگىن ەداۋىر جاقسارتادى.
- ەلىمىز وڭدەۋ سالاسىنا كوشۋ كەرەك، جوعارى وڭدەلگەن تاۋارلار ءوندىرۋدى ارتتىرۋ قاجەت. مەملەكەت باسشىسى وسىنداي مىندەت قويىپ وتىر. سالىق كودەكسىندە جوعارى وڭدەلگەن تاۋارلار وندىرەتىندەر سالىقتى از تولەيتىن قوسىمشا جەڭىلدىكتەر قاراستىرىلعان. بۇنىڭ بارلىعى وڭدەۋ سالاسىن ىنتالاندىرۋ ءۇشىن جاسالىپ جاتقان قادامدار. ياعني، قاراجات ءوز ەلىمىزدە قالادى دەگەن ءسوز. قازىر كوپتەگەن ەلدەر قازاقستاندىق شيكىزات وڭدەۋدى دامىتۋدا. ول وزىمىزگە كەرەك. ونىڭ ۇستىنە «قازاقمىس» جانە «KAZ Minerals» سياقتى ءىرى كاسىپورىنداردىڭ ينۆەستيتسيا سالۋعا مۇمكىندىگى بار، - دەپ اتاپ ءوتتى ولجاس بەكتەنوۆ.
پرەمەر-مينيستر ەكىباستۇزداعى «قازاقستاننىڭ ۆاگون جاساۋ كومپانياسى» ج ش س اۋماعىندا امبەباپ جارتىلاي جۇك ۆاگوندارىن، جابىق ۆاگونداردى، ۆاگون-پلاتفورمالاردى وتاندىق ءوندىرۋشىنىڭ اعىمداعى وندىرىستىك قۋاتتارىمەن، سونداي-اق جۇك تاسىمالى كولەمىنىڭ جىل سايىنعى ءوسۋىن ەسكەرە وتىرىپ، كورسەتكىشتەردى ودان ءارى ارتتىرۋ جوسپارلارىمەن تانىستى.
«SMP Group» ج ش س باس ديرەكتورى ەرجان قۋانعاننىڭ ايتۋىنشا، كاسىپورىن قۇرىلعالى بەرى 9 مىڭنان استام جارتىلاي ۆاگون، 26 پلاتفورما جانە 2 جابىق ۆاگون شىعارعان. وندىرىستىك قۋاتى ايىنا 100-دەن 240 ۆاگونعا دەيىن ارتتى. بۇگىندە 3 مىڭ جارتىلاي ۆاگون جەتكىزۋگە جاسالعان كەلىسىمشارت مەرزىمىنەن بۇرىن ورىندالدى. شارت مامىر ايىندا اياقتالادى دەپ جوسپارلانعان. كولىك- لوگيستيكالىق كەشەندى دامىتۋ تۇجىرىمداماسىن ىسكە اسىرۋ شەڭبەرىندە ءوزارا ءىس- قيمىل ماسەلەلەرىنە نازار اۋدارىلدى.
- ءبىزدىڭ ەلىمىز ترانزيت پەن لوگيستيكادا وراسان زور ءارى تولىق اشىلماعان الەۋەتكە يە. تەمىرجول جۇيەسى ۆاگونداردى جاڭارتۋدى قاجەت ەتەدى. سوندىقتان ءبىز كاسىپورىنداردىڭ ءوندىرىستى كەڭەيتۋ باستامالارىن قولدايمىز، - دەپ اتاپ ءوتتى پرەمەر-مينيستر.
بۇعان قوسا كولىك، ۇلتتىق ەكونوميكا مينيسترلىكتەرىنە، «ق ت ج» مەن «بايتەرەك» حولدينگىنە كاسىپورىندى قولداۋ ماسەلەلەرىن پىسىقتاۋدى، ونىڭ ىشىندە جارتىلاي ۆاگوندار مەن جابىق ۆاگونداردى جەتكىزۋگە ۇزاق مەرزىمدى وففتەيك-كەلىسىمشارتتارىن جاساسۋ مۇمكىندىگىن قاراستىرۋدى تاپسىردى.
سونىمەن قاتار، كاسىپورىن باسشىلىعى جەرگىلىكتى قامتۋ ۇلەسىن كەەڭەيتۋ قاجەت، بۇگىندە ول %57 دى قۇرايدى.
- ەڭ باستىسى - لوكاليزاتسيالاۋدى ارتتىرۋ. ىشكى ءوندىرىستى ودان ءارى ىنتالاندىرۋ كەرەك»، - دەپ اتاپ ءوتتى ولجاس بەكتەنوۆ.
ەسكە سالا كەتەيىك، بۇعان دەيىن بەكتەنوۆ كەدەن قىزمەتىنە قۇقىق قورعاۋ ورگانىنىڭ فۋنكتسيالارىن بەرۋ قاجەت ەكەنىن ايتقان بولاتىن.
