ولجاس بەكتەنوۆ اكىمدەردى قۇرىلىس ماۋسىمىن ۇتىمدى پايدالانۋعا شاقىردى

استانا. KAZINFORM - پرەمەر-مينيستر ولجاس بەكتەنوۆ ءوڭىر اكىمدەرىنە قۇرىلىس ماۋسىمىن ۇتىمدى پايدالانىپ، كەستەدەن كەشىگىپ جاتقان مەديتسينالىق نىسانداردىڭ قۇرىلىسىن جەدەلدەتۋدى تاپسىردى.

- اۋىلدا دەنساۋلىق ساقتاۋ جۇيەسىن جاڭعىرتۋ» ۇلتتىق جوباسى 650 دەن استام اۋىلدىق ەلدى مەكەندە زاماناۋي مەديتسينالىق پۋنكتتەر اشۋعا مۇمكىندىك بەرەدى. جەتىسۋ، ۇلىتاۋ، جامبىل، اقتوبە، اقمولا جانە قاراعاندى وبلىستارىندا قۇرىلىس قارقىنى تىم باياۋ. مىسالى، اقتوبە، جامبىل، جەتىسۋ جانە شىعىس قازاقستان وبلىستارىندا وسى كۇنگە دەيىن 6 وبەكت بويىنشا جوبالىق قۇجاتتاما ازىرلەنبەگەن. قاراعاندى، قوستاناي، اقمولا، ۇلىتاۋ، باتىس قازاقستان، سولتۇستىك قازاقستان وبلىستارىندا 8 جوبا بويىنشا مەملەكەتتىك ساراپتاما دايىن ەمەس. ءوڭىر اكىمدەرى تاراپىنان ءدال وسى جوبالاۋ جانە قۇرىلىس جۇمىستارىنا باقىلاۋدىڭ كەمشىن بولۋى ۇلتتىق جوبانى ىسكە اسىرۋ مەرزىمدەرىنىڭ سوزىلىپ كەتۋىنە الىپ كەلەدى. نىسانداردى ۋاقىتىلى تاپسىرۋ ءۇشىن قۇرىلىس ماۋسىمىن ءتيىمدى پايدالانۋ كەرەك، - دەدى ۇكىمەت باسشىسى.

ولجاس بەكتەنوۆ دەنساۋلىق ساقتاۋ مينيسترلىگىنە قالعان 188 مەديتسينالىق نىساندى سالۋ جۇمىسىنا اپتا سايىن مونيتورينگ جۇرگىزىپ وتىرۋدى تاپسىردى.

بۇعان دەيىن پاۆلودار اۋىلدارىندا قايتارىلعان اكتيۆتەر ەسەبىنەن امبۋلاتوريالار سالىناتىنىن جازعان ەدىك.