پولشادا تراكتور جۇرگىزۋشىسى جەتىسپەيدى

استانا. KAZINFORM - پولشادا تراكتور جۇرگىزۋشىسى تاپشى. جۇك كولىگىن ايدايتىن 30 مىڭ مامان جەتىسپەيدى. جەرگىلىكتى جۇمىسپەن قامتۋ قاۋىمداستىعى كەلتىرگەن دەرەك وسىنداي. اسىرەسە وڭتۇستىك جانە باتىس ايماقتاردا ماسەلە وتكىر تۇر.

بيلىك تۇيتكىلدى شەشۋ ءۇشىن جىل سايىن جۇك كولىگى جۇرگىزۋشىلەرىنە الىس-جاقىن ەلدەرگە اشىق ۆاكانسيا جاريالايدى. پولشادا تراكتور ايداۋعا ازيا ەلدەرىنەن ادامدار كوپ كەلەدى. قازاقستان مەن قىرعىزستاننان دا ءوتىنىش بىلدىرۋشىلەر قاراسى قالىڭ. كەيىنگى دەرەككە سۇيەنسەك، قازىر پولشادا 160 مىڭ مامان سىرتتان كەلىپ جۇمىس ىستەيدى. ولاردىڭ جالاقىسى شامامەن 2100 دوللار، بۇل ءبىزدىڭ اقشامەن 1 ميلليون 60 مىڭ تەڭگە. جۇك كولىگىن جۇرگىزۋ - وتباسى مەن جاقىندارىنان ۇنەمى جىراقتا ءجۇرىپ، جاۋاپكەرشىلىكتى تالاپ ەتەتىن كۇردەلى جۇمىس. سول سەبەپتى كوبىسى مۇنداي اۋىر جۇمىستى اتقارۋعا ىنتالى ەمەس.

كادر تاپشىلىعى تەك كولىك جانە لوگيستيكا سالاسىندا عانا ەمەس، اۋىل، ورمان، بالىق شارۋاشىلىعى مەن قۇرىلىس سەكتورىندا دا قاتتى سەزىلەدى. جەمىس جيناۋ، كىرپىش قالاۋ، دانەكەرلەۋ، بالىق اۋلاۋ سياقتى ماۋسىمدىق جۇمىس جەتكىلىكتى. ءبىراق مامان جوق. قازىر مۇنداي جۇمىستاردى كوبىنە قاقتىعىستان قاشىپ كەلگەن ۋكراينالىقتار اتقاراتىن بولعان.

ماروككو ماۋسىمدىق جۇمىسشىلارعا ءزارۋ

ماروككوعا ماۋسىمدىق جۇمىسشىلار اۋاداي قاجەت. ويتكەنى مىڭداعان گەكتار اۋماقتى الىپ جاتقان ەگىستىك القاپتارىندا ءونىم تەرىلمەي تۇر. شارۋالاردىڭ الا جازداي ەككەن ەگىنىندە جيىن-تەرىن جۇمىستارى ۋاقىتىلى جۇرگىزىلمەسە، ەڭبەك دالاعا كەتكەلى تۇر. ساراپشىلار مۇنىڭ سەبەبىن جەرگىلىكتى تۇرعىنداردىڭ ءوز ەلىندە جۇمىس ىستەمەي، جاقسى ءومىر ىزدەپ ەۋروپاعا قاراي اعىلۋمەن بايلانىستىرادى. قول كۇشىنىڭ جوقتىعىنان كاسىپكەرلەر ەگىستىك اۋماعىن قىسقارتۋعا ءماجبۇر. 3700 گەكتار جەردى الىپ جاتقان شارۋاشىلىق القابىن بيىل 2300-گە دەيىن قىسقارتقان.

گرەكيادا قىزمەت كورسەتەتىن ماماندار جەتىسپەيدى

جاز باستالىسىمەن گرەكيادا تۋريستىك ماۋسىم قىزادى. ءبىراق ەلگە كەلگەن مەيماندى جايعاپ، قىزمەت كورسەتەتىن مامان از. اسىرەسە، قوناق ءۇي قىزمەتكەرلەرى مەن داياشىلار جوقتىڭ قاسى.

The Guardian باسىلىمى كەلتىرگەن دەرەككە سۇيەنسەك، وسىنداي 80 مىڭ جۇمىس ورنى بوس تۇر. سوندىقتان، گرەك بيلىگى مامانداردى مىسىر، ۆەتنام، بانگلادەش، گرۋزيا، ءۇندىستاننان شاقىرماق. وسى جازدا 30 مىڭ جۇمىسشى افيناعا بارادى. بۇل سول ەلدەرمەن گرەكيانىڭ ەڭبەك مينيسترلىگى جاساسقان ءوزارا كەلىسىم اياسىندا جۇزەگە اسىرىلادى.

فرانسيا شەتەلدىك جۇمىسشىلارعا ۆيزا بەرۋدى جەڭىلدەتەدى

ەۋروپادا جۇمىس كۇشىنە ءزارۋ گرەكيا عانا ەمەس. فرانسيا دا مۇنداي ماسەلەگە تاپ بولدى. ەلدىڭ دەنساۋلىق ساقتاۋ، قۇرىلىس، اۋىل شارۋاشىلىعى جانە تۋريزم سالاسىندا مامان جەتىسپەيدى. مىسالى، پاريجدە دەنساۋلىق ساقتاۋ قىزمەتكەرلەرىنىڭ %60- ى شەتەلدەن كەلگەن. قۇرىلىس سالاسىندا دا فيزيكالىق ەڭبەكتى قاجەت ەتەتىن جۇمىس كۇشى جوقتىڭ قاسى. ەل ۇكىمەتى جۇمىس كۇشى تاپشىلىعىن شەشۋ ءۇشىن يمميگراتسيا شارالارىن كۇشەيتتى. شەتەلدىك جۇمىسشىلاردى ەڭبەك ۆيزاسىمەن قامتۋدى قاراستىرىپ جاتىر. مۇنان بولەك ماۋسىمدىق ۆيزا بەرۋ كولەمى ارتادى.

جاڭا زەلانديادا ماۋسىمدىق جۇمىسشىلارعا ۋاقىتشا ۆيزا بەرىلەدى

جاڭا زەلانديادا شەتەلدەن كەلەتىن ماۋسىمدىق جۇمىسشىلارعا ۆيزا بەرۋ ءتارتىبىن جەڭىلدەتىپ جاتىر. جاڭا ۋاقىتشا ۆيزا اۋىل شارۋاشىلىعى، تۋريزم جانە قۇرىلىس سياقتى سالالاردا جۇمىس ىستەۋگە مۇمكىندىك بەرەدى. قۇجات 9 اي مەرزىمگە جارامدى. جۇمىس ۋاقىتى اپتاسىنا 30 ساعاتتان اسپايدى. ال ساعاتىنا 18 ا ق ش دوللارى كولەمىندە جالاقى تولەنەدى. بۇل ءبىزدىڭ تەڭگەگە شاققاندا 9 مىڭ تەڭگە.

24.kz