پولشا قالالارىندا ميگراتسياعا قارسى جۇزگە جۋىق شەرۋ ءوتتى

استانا. KAZINFORM - پولشادا يمميگراتسيالىق ساياساتتى قاتاڭداتۋدى جانە شەكارالاردى جابۋدى تالاپ ەتكەن اۋقىمدى نارازىلىق اكسيالارى ءوتتى، دەپ حابارلايدى Euronews.

ەل بويىنشا 80 نەن استام قالادا «يمميگراتسيانى توقتاتايىق» ۇرانىمەن شەرۋلەر ءوتتى. بارلىعى 100 گە جۋىق قوعامدىق اكسيا تىركەلگەن.

نارازىلىق شارالارىن ۋلتراوڭشىل باعىتتاعى «بوستاندىق پەن تاۋەلسىزدىك كونفەدەراتسياسى» پارتياسى ۇيىمداستىرعان.

الاڭعا شىققانداردىڭ نەگىزگى تالاپتارى - پولشانىڭ ليتۆا، ۋكراينا، بەلارۋس جانە سلوۆاكيامەن اراداعى شەكاراسىن جابۋ جانە شەكارالىق باقىلاۋدى قاتاڭداتۋ. پارتيا كوشباسشىلارىنىڭ ءبىرى كشيشتوف بوساك ۆارشاۆادا وتكەن شەرۋ كەزىندە ءسوز سويلەپ، ەل ۇكىمەتىنىڭ وتستاۆكاسىن تالاپ ەتتى. سونىمەن قاتار ول شەكارانى زاڭسىز كەسىپ وتكەندەرگە اسكەريلەرگە وق اتۋ قۇقىعىن بەرۋدى ۇسىندى.

انتييمميگراتسيالىق شەرۋلەر ۆارشاۆا، كراكوۆ، پوزنان، ۆروتسلاۆ، بەلوستوك جانە باسقا دا قالالاردا ءوتتى. كوشەگە قاتاڭ كوشى-قون ساياساتىن جاقتايتىندار عانا ەمەس، ۋلتراوڭشىل ۇراندارعا قارسى شىققان بەلسەندىلەر دە جينالدى.

ۆارشاۆا، كاتوۆيتسە جانە ولشتىندا وتكەن اكسيالار بارىسىندا جۇرت بوسقىنداردىڭ قۇقىقتارىن قورعاۋدى جانە تولەرانتتىلىقتى قولداۋ قاجەتتىگىن دە ۇرانداتتى.

نارازىلىقتار 7 شىلدەدە پولشا گەرمانيا جانە ليتۆامەن بىرگە شەكارالىق باقىلاۋدى ەنگىزگەننەن كەيىن كۇشەيگەن. قازىرگى تاڭدا پولشا- گەرمانيا شەكاراسىندا 52 باقىلاۋ پۋنكتى، پولشا- ليتۆا شەكاراسىندا 13 باقىلاۋ پۋنكتى جۇمىس ىستەپ تۇر. بۇعان قوسا، پولشا ەو- نىڭ بەس ەلىمەن بىرگە باسپانا بەرۋ شارتتارىن قاتاڭداتۋ تۋرالى كەلىسىمگە قول قويعان بولاتىن.

وسىعان دەيىن حابارلاعانىمىزداي، ترامپ وبامانى 2016 -جىلعى سايلاۋدا الاياقتىق جاسادى دەپ ايىپتادى.

اۆتور

تالعاتجان مۇحامەتبەك ۇلى