ول ساتتە اتاقتى ويلاپ وتىراتىن شاما بولمادى – ا ق ش- تا ەرلىك كورسەتكەن اكتەرلەر
لوس-اندجەلەس. قازاقپارات - 27 جاستاعى اكتەر ساننۇرجان سۇلەيمەن لوس-اندجەلەس ماڭىندا جول اپاتىنا تۇسكەن امەريكالىق ازاماتتىڭ ءومىرىن امان الىپ قالدى. بولعان جاعداي تۋرالى اكتەردىڭ ارىپتەسى ايدانا ساحاري Jibek Joly ارناسىنىڭ «بۇگىن LIVE» باعدارلاماسىنا ونلاين بايلانىسقا شىعىپ ايتىپ بەردى.
-ءبىزدى بەلگىلى رەجيسسەر، كينوپروديۋسەر ەركىن يالگاشيەۆ ءوزىنىڭ ۇيىنە شاقىرعان ەدى. سول وتىرىس بولىپ جاتقان كەزدە قاتتى دىبىس شىقتى. ءۇيدىڭ تومەنگى جاعىندا كەلە جاتقان ماشينا جولدان شىعىپ كەتىپ، ۇلكەن تاۋدان شۇڭقىرعا قۇلاپ كەتكەن ەكەن. كورگەن كەزدە نە ىستەرىمىزدى بىلمەي قالدىق. سول ارادا ساننۇرجان ەكەۋمىز ءبىرىنشى بولىپ جۇگىرىپ باردىق. ءبىراق ول ماعان قىز بولعان سوڭ وسىندا قال دەدى. ساننۇرجان ءوزى بيىك قۇزدان ارەڭ دەگەندە ءتۇستى. ماشينا وزەنگە قۇلاپتى. كولىكتىڭ ىشىندە ءبىر عانا ادام بولعان ەكەن. ساننۇرجان سول جەردەن ادامدى قۇتقارىپ قالدى. جاسى ۇلكەن كىسى ەكەن. ساننۇرجان بارعاندا كولىك جانىپ جاتتى. ول كىسى ماشينادان شىعىپ ۇلگەرىپتى، ءبىراق كولىكتىڭ استىندا قالىپ قويعان. العاشىندا كولىكتەگى قاۋىپسىزدىك جاستىقتارى جارىلا باستادى. ساننۇرجان ۇيگە جۇگىرىپ كەلىپ، شەلەك سەكىلدى نارسە ىزدەدى. وزەننەن سۋ الىپ، ورتەنىپ جاتقان كولىككە قۇيماقشى بولدى، - دەيدى اكتريسا.
ايدانانىڭ ايتۋىنشا، دارىگەرلەر مەن قۇتقارۋشىلار 40 مينۋتتان سوڭ عانا كەلگەن.
- ول جاقتا بايلانىس تا ۇستامايدى ەكەن. ەركىن مىرزا Starlink بايلانىسى ارقىلى اۋرۋحاناعا حابارلاستى. ول كىسىنى جوعارىعا شىعارۋدىڭ ءوزى وڭاي بولعان جوق. ەركىن اعا ۇيىندە بار ارقانداردى اكەلىپ، ارەڭ شىعاردى. اۋرۋحانا قىزمەتكەرلەرى دە، ءورت سوندىرۋشىلەر دە الىستا بولعاندىقتان بىردەن كەلە قويمادى. سول ارادا ساننۇرجان ءوزى تالپىنىپ، قولدان كەلگەنشە كومەكتەستى، - دەيدى ول.
اكتريسا بۇل جاعدايدىڭ حايپ ەمەستىگىن ايتىپ، جۋرناليستەرگە قۇلاققاعىس جاسادى.
- ماعان ساننۇرجان وسى جاعدايلاردىڭ ءبارىن ءتۇسىرىپ تۇر دەدى. ويتكەنى، ءبىر جاعداي بولا قالسا، وسى ۆيدەولاردى دالەل رەتىندە كورسەتە الاتىنىمىزدى ايتتى. ماعان جۋرناليستەر مەن كوپ ادام حابارلاسىپ، «نەگە بۇلاي ىستەدىڭدەر؟ حايپ پا؟» دەپ سۇراپ جاتىر. بۇل حايپ ءۇشىن تۇسىرىلگەن جوق. ول ساتتە اتاقتى ويلاپ وتىراتىن دا شاما بولمادى، - دەيدى ايدانا ساحاري.
بۇعان دەيىن قازاق اكتەرى ساننۇرجان سۇلەيمەن، رەجيسسەر ءارى پروديۋسەر ەركەن يالگاشيەۆ، دىبىس رەجيسسەرى دۋمان جانە اكتريسا ايدانا ساحاري ا ق ش- تا جول اپاتىنا ۇشىراعان امەريكالىق جۇرگىزۋشىنى قۇتقارىپ قالعانىن جازعانبىز.
