وكسفورد ۋنيۆەرسيتەتىندە قازاق ءتىلى وقىتىلا باستادى

استانا. KAZINFORM - وكسفورد ۋنيۆەرسيتەتىندە ارنايى باعدارلاما نەگىزىندە قازاق ءتىلى رەسمي تۇردە وقىتىلا باستادى. Oxford Birsِz Initiative جوباسى اياسىندا ءلايلا سۇلتان قىزى ءۇش اي بويى شەتەلدىك ستۋدەنتتەرمەن تىكەلەي جۇمىس ىستەمەك.

Jibek Joly تەلەارناسىنىڭ «بۇگىن LIVE» باعدارلاماسىنا قوناق بولعان تەلەجۇرگىزۋشى ءوزىنىڭ بۇل ۇسىنىستى قالاي العانىن ايتىپ بەردى.

- بۇل مەن ءۇشىن دە ۇلكەن توسىن سىي بولدى. ازيا جانە تاياۋ شىعىس زەرتتەۋلەر فاكۋلتەتىنىڭ پروفەسسورى لەيلا حانىم حابارلاسقاندا قاتتى قۋاندىم. ول كىسى: «قازاق ءتىلىنىڭ اياسى كەڭەيىپ، جاستاردىڭ اراسىندا قازاق تىلىنە دەگەن قىزىعۋشىلىق ارتىپ وتىر. ءبىز «بولاشاق» باعدارلاماسىمەن بارعان ستۋدەنتتەرمەن كوپتەگەن زەرتتەۋلەر جاسادىق. سولاردى كوپشىلىككە تانىستىرۋدى جانە قازاقشا سويلەگىسى كەلەتىن جاستارعا ورتا قۇرۋدى جوسپارلاپ وتىرمىز»، - دەپ ۇسىنىس ايتتى. ارينە، مەن بۇل ۇسىنىستى بىردەن قابىلدادىم، - دەيدى ستۋديا قوناعى.

تەلەجۇرگىزۋشى بۇعان دەيىن شەتەلدە اكادەميالىق ءبىلىمىن جەتىلدىرۋدى ارمانداپ جۇرگەنىن جاسىرمادى.

- مەنىڭ ۇلكەن ۇلىم نيدەرلاندىدا وقيدى. ءبىز وقىعان كەزدەگى اكادەميالىق ءبىلىم مۇلدە باسقا ەدى. قازىرگى بالالاردىڭ وقۋ باعدارلاماسى مۇلدە وزگەشە. بالالارىما بىردەڭە تۇسىندىرەيىن دەسەم، كەيدە ءوز ءبىلىمىم جەتپەي قالعانىن بايقايمىن. سول كەزدە: «نەگە مەن دە وقىماسقا؟» - دەپ ويلادىم. ىشىمدە «شەتەلدە وقىسام» دەگەن ارمان بۇرىننان بار بولاتىن. بۇعان دەيىن شۆەيتساريادا وقىپ كوردىم. ءبىراق بۇل جولى تۇراقتى تۇردە تۇرىپ، وقىسام دەگەن ەدىم. مەن ءۇشىن ەڭ باستىسى - بىلىكتى پروفەسسورلارمەن پىكىر الماسىپ، اكادەميالىق ءبىلىمىمدى تولىقتىرۋ. سوندىقتان كۇزدە ءۇش ايعا جول جۇرەمىن. ال كەلىسىمشارت جالپى ەكى جىلعا جاسالدى. قالعان ۋاقىتتا كەلىپ-كەتىپ، ءتۇرلى شارالار ۇيىمداستىرىپ جۇرەمىن، - دەيدى ءلايلا سۇلتان قىزى.

ءتىل مامانى قازاق ءتىلىن ۇيرەنۋگە نيەتتى جاستاردىڭ باسىن قوسىپ، Spiking Club اشۋدى جوسپارلاپ وتىرعانىن جەتكىزدى.

- العاشقى ماقساتىم - Spiking Club اشۋ. بۇل تەك قازاق جاستارى ءۇشىن ەمەس، قازاق تىلىنە قىزىعاتىن باسقا ەل جاستارىن دا بىرىكتىرەتىن الاڭ بولادى. ول جاقتا «بولاشاق» باعدارلاماسىمەن وقىپ جاتقان، دوكتورلىق ديسسەرتاتسياسىن قورعاپ جۇرگەن قازاق جاستارى بار. ۇستازدار اراسىندا وزبەك، ازەربايجان تىلدەرىنە قىزىعۋشىلىق بايقالادى. ال تۇرىك ءتىلى ول جاقتا بۇرىننان وقىتىلادى. سوندىقتان، ەگەر قازاق تىلىنە دە قىزىعۋشىلىق تۋىپ، ۇسىنىستار ءتۇسىپ جاتسا، نەگە بۇل باعىتتا جۇمىس ىستەمەسكە؟ - دەيدى ول.

ستۋديا قوناعى جاڭا ۇسىنىسقا قاتىستى وزگە دە جوسپارلارىمەن ءبولىستى.

- Spiking Club ناقتى ءبىر باعىتپەن شەكتەلمەيدى. ءتۇرلى سالانى قامتيمىز. بولاشاقتا ەلىمىزدىڭ ءتۇرلى سالاداعى ۇزدىك ماماندارىن وكسفوردقا شاقىرىپ، ءدارىس وقىتۋ - ۇلكەن ماقساتتارىمنىڭ ءبىرى. ول جاقتاعى جاستارعا ءبىزدىڭ مامانداردى نەگە تانىتپاسقا؟ - دەيدى ءلايلا سۇلتان قىزى.

ءلايلا سۇلتان قىزى شەتەلدە، اسىرەسە قازاق مۋزىكاسى اسا تانىمال ەكەنىن تىلگە تيەك ەتتى.

- بايقاساڭىزدار، قازاق مادەنيەتىنە، اندەرىنە دەگەن سۇرانىس وتە جوعارى. اسىرەسە، قازىرگى بۋىن وكىلدەرى شەتەلدە دە اسا تانىمال. ولار مەنەن ءبىرىنشى بولىپ قازاق مۋزىكاسى تۋرالى سۇرادى. «سىزدەردىڭ مۋزىكالارىڭىزدى جاستار تىڭدايدى، كينولارىڭىزدى جاقسى كورەدى»، - دەدى. بۇل - جاڭا سەرپىن. جاس بۋىن الەمدىك ساحنانى جاۋلاپ جاتىر دەگەن ءسوز، - دەيدى تەلەجۇرگىزۋشى.

ايتا كەتەيىك، وتكەن جولى عىلىمدى قازاق تىلىندە تۇسىندىرەتىن Qazaq Bubble جوباسى تۋرالى جازعان ەدىك.