وڭدەۋشى سەكتورداعى يمپورتتىق شيكىزات 50 پايىزدان استى - سەنات ءتوراعاسى

استانا. KAZINFORM - سەنات ءتوراعاسى ماۋلەن اشىمبايەۆ وڭدەۋ ونەركاسىبىندەگى ماسەلەلەردى اتادى.

«الدىمىزدا 2029 -جىلعا قاراي ۇلتتىق ەكونوميكانىڭ كولەمىن ەكى ەسەگە ۇلعايتىپ، 450 ميلليارد دوللارعا جەتكىزۋ مىندەتى تۇر. ول ءۇشىن ەلدىڭ جالپى ىشكى ءونىمى جىل سايىن 6 پايىزدان كەم ەمەس دەڭگەيدە ءوسۋى كەرەك. وسى باعىتتا قۋاتتى ونەركاسىپتى قالىپتاستىرۋ، جۇمىس ىستەپ تۇرعان كاسىپورىنداردى بارىنشا جۇكتەۋ جانە جاڭالارىن اشۋدى قامتاماسىز ەتۋ قاجەت. جالپى، وڭدەۋ ونەركاسىبى تۇراقتى ءوسۋ قارقىنىن كورسەتە وتىرىپ، ۇلتتىق ەكونوميكانىڭ فلاگمانىنا اينالۋى ءتيىس. كەيىنگى بەس جىلدا ج ءى و- دەگى وڭدەۋ ونەركاسىبىنىڭ ۇلەسى 11,4 پايىزدان 12 پايىزعا دەيىن ءوسىپ، تاۋ- كەن سەكتورىنا جاقىندادى. 2018-2023 -جىلدار ارالىعىندا وڭدەۋ ونەركاسىبىندەگى ءوندىرىس كولەمى ەكى ەسەدەن استام ءوسىپ، 22 تريلليون تەڭگەنى قۇرادى»، - دەدى م. اشىمبايەۆ سەناتتا ءوتىپ جاتقان وڭدەۋ ونەركاسىبىن دامىتۋ تاقىرىبىنداعى پارلامەنتتىك تىڭداۋدا.

ونىڭ ايتۋىنشا، ستراتەگيالىق ماقساتتارعا جەتۋ ءۇشىن وسى سالاداعى قارقىندى كۇشەيتۋ كەرەك. بۇل رەتتە، جالپى كورسەتكىشتەردى ۇلعايتىپ قانا قويماي، وسى سالانىڭ ساپالى دامۋىن قامتاماسىز ەتۋگە ۇمتىلۋ قاجەت.

«قازىر وڭدەۋ ونەركاسىبىنىڭ 40 پايىزعا جۋىعى مەتاللۋرگياعا تيەسىلى. بۇل نەگىزىنەن تومەن دەڭگەيدە وڭدەلگەن ونىمدەر، ياعني ونەركاسىپتىك شيكىزات دەڭگەيىندە. وسىنداي كورىنىستى شيكىزاتتىق ەمەس ەكسپورت قۇرىلىمىندا دا كورىپ وتىرمىز. ەكونوميكالىق كۇردەلىلىك يندەكسىندە قازاقستان الەمدەگى 130 ەلدىڭ ىشىندە 88-ورىندا. بۇل رەتتە، قازاقستاننان وڭدەلگەن تاۋارلار ەكسپورتى 2023 -جىلى 6 پايىزعا جۋىق، ال بيىلعى ءبىرىنشى توقساندا 6,5 پايىزعا، ونىڭ ىشىندە ۋران - 24 پايىزدان استام، فەرروقورىتپالار بويىنشا 15,5 پايىزعا تومەندەدى. وڭدەۋ ونەركاسىبىندە جۇمىس ىستەپ تۇرعان زاڭدى تۇلعالاردىڭ سانى 10 جىل ىشىندە ەكى ەسە ءوستى. ونىڭ 96 پايىزى شاعىن بيزنەسكە، 2,5 پايىزى ورتا بيزنەسكە، 1 پايىزعا جۋىعى ءىرى بيزنەسكە تيەسىلى. جاناما تۇردە بۇل كومپانيالاردىڭ جاساندى تۇردە بولشەكتەنۋىن جانە بيزنەستىڭ ءوسۋى مەن ىرىلەنۋى ءۇشىن ىنتالاندىرۋدىڭ جەتكىلىكسىزدىگىن كورسەتۋى مۇمكىن»، - دەدى سەنات ءتوراعاسى.

سونىمەن قاتار، سالا يمپورتقا تاۋەلدى بولىپ وتىر. بۇل ءوز كەزەگىندە تەحنولوگيالىق ونىمدەرگە دە، شيكىزاتقا دا قاتىستى. بىلتىر وڭدەۋشى سەكتورداعى يمپورتتىق شيكىزات پەن بولشەكتەردىڭ ۇلەسى 50 پايىزدان استام بولدى. وسى جاعداي ەلىمىزدى جاھاندىق كونيۋنكتۋرا الدىندا وسال ەتەدى.

«كادر ماسەلەسى دە وزەكتى. قازىرگى كەزدە وڭدەۋ ونەركاسىبىندە 613 مىڭعا جۋىق ادام نەمەسە جالپى جۇمىسپەن قامتىلعانداردىڭ 6,7 پايىزى جۇمىس ىستەپ جاتىر. سونىمەن قاتار، كەيىنگى 10 جىلدا سالادا جۇمىس ىستەيتىندەر سانى نەبارى 10 پايىزعا وسكەن. اتاپ ايتقاندا، ءبىراز باعىتتا بىلىكتى ماماندار تاپشى»، - دەدى ماۋلەن اشىمبايەۆ.

سەنات سپيكەرى ەل ەكونوميكاسى ءالى دە بولسا تاۋ-كەن جانە مۇناي سالاسىنا، شيكىزات باعاسىنا جانە تومەن دەڭگەيدە وڭدەلگەن تاۋارلار ەكسپورتىنا تاۋەلدى بولىپ وتىرعانىن ايتتى.

«وسىعان بايلانىستى مەملەكەت باسشىسى الداعى اۋقىمدى مىندەتتەردى بەلگىلەپ بەردى. سونى ەسكەرىپ، ەكونوميكانىڭ وڭدەۋشى سەكتورىن دامىتۋعا ارنالعان تىڭ جانە ءتيىمدى شەشىمدەر قاجەت دەپ ەسەپتەيمىز. بۇل باعىتتا سەناتورلار ءوز تاراپىنان زاڭنامالىق تۇرعىدان ءتيىستى قولداۋ كورسەتىپ، بەلسەندى جۇمىس ىستەۋگە دايىن»، - دەدى ول.

اۆتور

رۋسلان عابباسوۆ