WBO ۇيىمى جانىبەك ءالىمحان ۇلىنا چەمپيوندىق اتاعىن ساقتاپ قالۋ ءۇشىن 5 كۇن ۋاقىت بەردى

استانا. KAZINFORM - دۇنيەجۇزىلىك بوكس ۇيىمى (WBO) قازاقستاندىق بوكسشى جانىبەك ءالىمحان ۇلىنا (16-0، 11 ك و) جانە ونىڭ كومانداسىنا كەزەكتى جەكپە-جەگىندە نە ءۇشىن WBO چەمپيوندىق بەلدىگىن قورعاماعانى تۋرالى ءتۇسىندىرۋدى سۇرادى.

WBO ۇيىمى چەمپيوندىق بەلدىكتى ەرىكتى قورعاۋ تيتۋلدان ايىرۋعا سەبەپشى بولۋى مۇمكىن ەكەنىن ەسكەرتتى. سونداي-اق، ۇيىم قازاقستاندىق بوكسشىنىڭ كومانداسىنا وسى جاعدايدى تۇسىندىرۋگە 5 كۇن ۋاقىت بەردى.

ەگەر جانىبەك ءالىمحان ۇلىنىڭ تۇسىنىكتەمەسى WBO ەرەجەلەرىنە سايكەس كەلمەسە، قازاقستاندىق بوكسشى چەمپيوندىق تيتۋلىنان ايىرىلۋى مۇمكىن. بۇل جاعدايدا تيتۋل بوس قالادى جانە ول ءۇشىن WBO رەيتينگىنىڭ ءبىرىنشى جانە ەكىنشى نومىرلەرى: بريتاندىق بوكسشىلار حامزا شيراز (21-0، 17 ك و) جانە دەنزەل بەنتلي (20-3-1، 17 ك و) جۇدىرىقتاسادى.

ايتا كەتەيىك، وتانداسىمىز جۇما كۇنى سيدنەيدە جاڭازەلانديالىق اندرەي ميحايلوۆيچتى 9-راۋندتا تەحنيكالىق نوكاۋتپەن جەڭىپ، ورتا سالماقتاعى IBF الەم چەمپيونى تيتۋلىن ءساتتى قورعادى.

بۇعان دەيىن حابارلاعانىمىزداي، WBO ۇيىمى جەكپە- جەككە ءبىر كۇن قالعاندا، جانىبەك- ميحايلوۆيچ ايقاسىندا قازاقستاندىق بوكسشىعا WBO تيتۋلىن قورعاۋعا وردەر بەردى. الايدا، ميحايلوۆيچتىڭ كومانداسى تەك IBF تيتۋلى ءۇشىن جۇدىرىقتاساتىنىن العا تارتىپ، بوكس كەشىندە WBO تيتۋلى ساراپقا سالىنبادى.

اۆتور
مۇحتار قاليموللا ۇلى