تەڭىز تۇبىمەن جىلدام ينتەرنەت تارتۋ جوباسى باستالدى

استانا. قازاقپارات - الداعى جىلى ينتەرنەت جىلدامدىعى سەكۋندىنا 200-دەن 500 مەگابيتكە دەيىن جەتەدى. بۇعان كاسپي تابانىمەن تارتىلاتىن تالشىقتى-وپتيكالىق كابەل مۇمكىندىك بەرەدى. ونىڭ جالپى وتكىزۋ قابىلەتى سەكۋندىنا 400 تەرابيت.

پرەزيدەنت جوبانىڭ جۇزەگە اسىرىلا باستاعانىن ايتقان بولاتىن. قازاقستان مەن ازەربايجان بىرلەسكەن كومپانيا قۇرىپ، جۇمىس جۇرگىزىپ جاتىر. بۇدان بولەك تەڭىز ارقىلى جاسىل ەنەرگيانى ەۋروپاعا جەتكىزۋ جوسپارلانعان. جەلدەن جۇيرىك ينتەرنەت ءۇشىن اراقاشىقتىق ماڭىزدى. شالعاي بولعان سايىن شابانداي بەرەدى. سوندىقتان سىمدى جارىق كومەگىمەن جانە كاسپي تۇبىمەن تارتۋ جولى قاراستىرىلىپ جاتىر. ياعني تالشىقتى- وپتيكالىق كابەل جۇرگىزىلەدى. بۇعان قازاقستان مەن ازەربايجان ەلدەرىنىڭ باسشىلارى كەلىستى.

ازامات سەرىكتايەۆ، ق ر تەلەكوممۋنيكاتسيالار كوميتەتى باسقارماسىنىڭ باسشىسى:

- وڭتۇستىك-شىعىس ازيا مەن باتىس ەلدەرىنىڭ جالپى 100 پايىز دەپ الساق ۇلەسىن. قازاقستاننىڭ ۇلەسى وسى اقپاراتتى وتكىزۋدە تەك قانا 1,5 پايىز بولىپ تۇر. ەندى وسى جوبا ىسكە اسقاننان كەيىن ءبىز بۇل كورسەتكىشتى كەمى 5 پايىزعا دەيىن كوتەرمەكشىمىز. ياعني بۇل 3-4 ەسە جىلدام بولادى. اقپاراتتى جەتكىزۋ جانە وڭدەۋ جاعىنان.

ەلىمىزگە تيىمدىلىگى

بۇل ەندى ەڭ باستىسى ەلىمىزدىڭ اۋماعىمەن وتە كوپتەگەن تەرابايت اقپاراتتى وتكىزەمىز. ولار اقىلى بايلانىس وپەراتورلارىمىز اقشا تابادى. ەكونوميكامىز داميدى. تەڭىز تۇبىمەن تالشىقتى-وپتيكالىق كابەل تارتۋ ەۋروپاعا تىكە شىعۋدىڭ بالاما باعىتى. ازەربايجاننان ءارى اسسا جەتكىلىكتى. قازىر ينتەرنەت جولىمىز قۇرلىق ارقىلى رەسەيمەن تۇيىسەدى. شاقىرىمى دا شالعاي. ال، جاڭا جەلى ەداۋىر قىسقا، 400 كيلومەترگە جۋىق. جىلدامدىعى سەكۋندىنا 400 تەرابيت. جالپى، تالشىقتى- وپتيكا ازىرگە الەمدەگى ەڭ تەز ينتەرنەت سانالادى.

تاعى ءبىر تارتىمدى جوبا بار. كاسپي تابانىمەن «جاسىل» ەنەرگيا ەۋروپاعا تاسىمالدانباق. بالامالى قۋاتتى قازاقستان، وزبەكستان جانە ازەربايجان وندىرەدى. ءبىزدىڭ ەل كولەمدى 7 گيگاۆاتقا دەيىن كوبەيتۋدى كوزدەگەن.

يلحام شابان، ەنەرگەتيكا سالاسى بويىنشا ساراپشى:

- بۇل اقتاۋدان اپشەرون تۇبەگىنە قارايعى باعىت. شامامەن 370 شاقىرىم. ەگەر سارالساق، ورتالىق ازيادا جاڭارتىلاتىن ەنەرگيا كوزدەرىن ەڭ كوپ وندىرەتىن قازاقستان. جەل مەن كۇننەن 3 ميلليارد كيلوۆاتت-ساعات قۋات الادى. ەندى قازاقستان مەن وزبەكستاندا جاسىل ەنەرگيانىڭ جەتكىلىكتى كولەمىن يگەرىپ، ونى باكۋگە وتكىزۋ ماسەلەسى قارالىپ جاتىر.

وعان دەيىن ءبىز Black Sea Project Energy قۇرىلىسىن دا اياقتايمىز. وسىلايشا ەنەرگيانى ۇلكەن نارىقتارعا، ەۋروپالىق وداققا ەكسپورتتاۋدىڭ بالاما نۇسقاسى پايدا بولادى. وسىلايشا تىڭنان تۇرەن سالىپ، تەڭىزدىڭ ءتۇبىن دە پايدالانۋعا كوشتىك. جاسىل ەنەرگيا جايىن ايتتىق. ينتەرنەت جەلىگە كەلسەك، ەل اۋماعىنا 130 مىڭ شاقىرىمنان اسا تالشىقتى-وپتيكالىق كابەل تارتىلعان. الداعى جىلدارى باتىس-شىعىس گيپەرماگيسترالى سالىنادى. ماقسات - زامان تالابىنا قاراي تەحنولوگيالىق جانە ەكونوميكالىق تۇرعىدان قالىس قالماۋ.

24.kz