تەگىن ۇيىرمەلەر مەن سەكسيالار: استانادا جاڭا سيفرلىق ۆاۋچەرلىك جۇيە ىسكە قوسىلدى
استانا. KAZINFORM - استانادا قوسىمشا ءبىلىم بەرۋ سالاسىندا ماڭىزدى باستاما قولعا الىندى. ەلوردادا بالالارعا ارنالعان ۆاۋچەرلىك قارجىلاندىرۋ جۇيەسىن ءادىل ءارى اشىق جۇرگىزۋگە باعىتتالعان QOSYMSHA. KZ جاڭا سيفرلىق پلاتفورماسىن ەنگىزۋ بويىنشا پيلوتتىق جوبا ەنگىزىلدى.
بۇل - مەملەكەت ەسەبىنەن ۇيىرمەلەرگە، سپورت سەكتسيالارىنا جانە شىعارماشىلىق ستۋديالارعا تەگىن قاتىسۋعا مۇمكىندىك بەرەتىن بۇرىنعى جۇيەنى تولىق جاڭعىرتۋ. جوبانىڭ جۇمىسى تۋرالى استانا قالاسى ءبىلىم باسقارماسىنىڭ باسشىسى قاسىمحان سەنعازىيەۆتىڭ قاتىسۋىمەن استانانىڭ كوممۋنيكاتسيالار قىزمەتىندە وتكەن بريفينگتە بەلگىلى بولدى، دەپ جازدى ەلوردا اكىمدىگىنىڭ رەسمي سايتى.
2021-جىلدان بەرى قازاقستاندا قوسىمشا ءبىلىم بەرۋگە ارنالعان ۆاۋچەرلىك قارجىلاندىرۋ جۇيەسى جۇزەگە اسىرىلىپ كەلەدى. پرەزيدەنتتىڭ تاپسىرماسىنا سايكەس، بۇل باستاما بالالارعا ساباقتان تىس ۋاقىتتا ءبىلىم الۋعا تەڭ مۇمكىندىك بەرۋ ماقساتىندا ەنگىزىلگەن. قاعيدا قاراپايىم: مەملەكەت ءار بالاعا ءبىر ۇيىرمەگە قاتىسۋىنا قارجى بولەدى، ال اتا-انا بالاسىنىڭ قىزىعۋشىلىعى مەن كەستەسىنە ساي باعىتتى ءوزى تاڭدايدى.
2025-جىلى استانادا 25000 نان استام بالا وسى باعدارلاما ارقىلى تەگىن قوسىمشا بىلىممەن قامتىلعان. ەل بويىنشا 500000 نان استام بالا قامتىلعان. الايدا بۇرىنعى جۇيەنى ىسكە اسىرۋ كەزىندە اتا-انالار تاراپىنان ورىندى الاڭداۋشىلىق تۋدىرعان ءبىرقاتار كەمشىلىك انىقتالدى.
ءۇش ءتۇرلى كەزەك: ءبىلىم، سپورت جانە مادەنيەت باسقارمالارىنىڭ جەكە كەزەكتەرى بولدى - بۇل جۇيەسىزدىك پەن تەڭسىزدىككە اكەلدى.
«تىركەلگەنى وتەدى» قاعيداسى: الەۋمەتتىك وسال توپتاعى بالالاردىڭ وتىنىمدەرى كەيىنگە ىسىرىلىپ، ۆاۋچەرلەر ءبىرىنشى تىركەلگەندەرگە بەرىلدى.
جۇيەلەر بىرىكتىرىلمەگەن: كەي بالالار ەكى ۆاۋچەر الىپ، باسقالارى مۇلدە تىس قالدى. استانا اكىمدىگى اتالعان ولقىلىقتاردى جويۋ ءۇشىن E- ORDA ينفراقۇرىلىمىنا نەگىزدەلگەن QOSYMSHA. KZ مەملەكەتتىك سيفرلىق جۇيەسىن ەنگىزدى. جۇيە قورعالعان دەرەكتەر ورتالىعىندا ورنالاسقان جانە ءۇشىنشى تۇلعالاردان تولىق وقشاۋلانعان.
ەندى ءوتىنىم بەرۋ، ۆاۋچەر ءبولۋ جانە قاتىسۋدى باقىلاۋ ءبىر تەرەزە قاعيداتىمەن جۇزەگە اسادى - اشىق جانە ءادىل تۇردە. ەڭ باستى جاڭالىق - الەۋمەتتىك جىكتەۋ ەنگىزىلدى. وتىنىمدەر ەندى بەرىلگەن ۋاقىتىنا ەمەس، بالانىڭ الەۋمەتتىك مارتەبەسىنە قاراي سۇرىپتالادى. 12 سانات بەكىتىلگەن، ءارقايسىنا بولەك كوەففيتسيەنت بەلگىلەنگەن:
• ەرەكشە ءبىلىمدى قاجەت ەتەتىن بالالار - كوەففيتسيەنت 5؛
• ا ا ك الاتىن وتباسىلارداعى، مۇگەدەكتىگى بار اتا-اناسى بار، جەتىم بالالار - كوەففيتسيەنت 3-4؛
• كوپبالالى وتباسىنداعى بالالار - كوەففيتسيەنت 2؛
• 4-18 جاس ارالىعىنداعى باسقا بالالار - كوەففيتسيەنت 1.
وسىلايشا، كوپبالالى نەمەسە الەۋمەتتىك جاعدايى تومەن وتباسىنداعى بالا ءوتىنىمدى كەيىنىرەك بەرگەن كۇننىڭ وزىندە، ول جالپى تىزىمدە وزگەلەرمەن سالىستىرعاندا جوعارى ورىنعا كوتەرىلەدى. بۇل «كىم ءبىرىنشى باتىرمانى باسسا - سوعان بەرىلەدى» دەگەن جارىستى بولدىرماي، شىنايى تەڭ قولجەتىمدىلىكتى قامتاماسىز ەتەدى.
ەندى ۆاۋچەر ناقتى ءبىر ۇيىرمەگە ەمەس، تىكەلەي بالاعا بەرىلەدى. بۇل اتا-انالار ۆاۋچەر العان سوڭ وزدەرى بالاسىنا جاسىنا، قىزىعۋشىلىعىنا جانە كەستەسىنە ساي ۇيىرمەنى ەركىن تاڭداي الادى دەگەندى بىلدىرەدى. مۇنداي ءتاسىل جۇيەنى اناعۇرلىم يكەمدى ەتىپ، وتباسىلاردىڭ مۇددەسىنە بەيىمدەيدى. تەگىن قوسىمشا ءبىلىم بەرۋ قۇقىعىن پايدالانۋ ءۇشىن QOSYMSHA. KZ سايتىنا تىركەلىپ، اتا- انا مەن بالانىڭ ج س ن- ءىن كورسەتۋ، دەرەكتەردىڭ دۇرىستىعىن راستاۋ قاجەت.
مەملەكەتتىك قارجىلاندىرۋدى جالعاستىرۋ ءۇشىن اي سايىن جەكە كابينەتكە كىرىپ، بالانىڭ ۇيىرمەگە قاتىسۋىن راستاۋ ماڭىزدى. ەگەر بالا قازىردىڭ وزىندە قانداي دا ءبىر ۇيىرمەگە بارىپ جۇرسە، سول ۇيىمعا بارىپ، ونىڭ دەرەكتەرىن جۇيەگە ەنگىزۋدى سۇراۋ قاجەت. ءوتىنىمدى تەك استانا قالاسىندا تىركەلگەن (تۇراقتى نەمەسە ۋاقىتشا) وتباسىلار عانا بەرە الادى.
ايتا كەتەيىك، وسكەمەندە اتا-انالار مەكتەپتەردەگى تەگىن شىعارماشىلىق ۇيىرمەلەردىڭ جابىلىپ قالۋىنا الاڭداپ وتىر.
