تەگىن ۇيىرمەلەر ءبىر ۆاۋچەرگە بىرىكتىرىلۋى مۇمكىن

استانا. KAZINFORM - بيۋدجەت ەسەبىنەن قارجىلاندىرىلاتىن ءبىلىم بەرۋ، سپورت جانە شىعارماشىلىق باعىتتاعى بالالار ۇيىرمەلەرى ءبىرىڭعاي ۆاۋچەرگە بىرىكتىرىلۋى مۇمكىن. سول ءۇشىن ۇكىمەت اۋەلى ەكى قالا مەن ءۇش وبلىستا قاناتقاقتى جوبانى ىسكە اسىرماقشى.

بۇل تۋرالى پرەمەر-مينيستر ولجاس بەكتەنوۆتىڭ سەنات دەپۋتاتىنىڭ ساۋالىنا جولداعان جاۋابىندا ايتىلعان.

- بيىل قىزمەتتەردى اۆتوماتتاندىرۋ جۇمىستارى اياسىندا ءبىلىم بەرۋ، سپورت جانە شىعارماشىلىق باعىتتارى بويىنشا مەملەكەتتىك ءۇش تاپسىرىس بىرىكتىرىلىپ، بىرەگەي ۆاۋچەر ارقىلى پيلوتتىق جوبا ىسكە قوسىلادى. جوبانى بيىلعى 1- شىلدەدەن باستاپ ەكى وڭىردە (استانا، شىمكەنت ق.)، 1- قىركۇيەكتەن باستاپ ءۇش وڭىردە (اقتوبە، قىزىلوردا، اتىراۋ وبلىستارى) ىسكە قوسۋ جوسپارلانىپ وتىر، - دەپ جازىلعان جاۋاپتا.

جوبا اياسىندا ۇيىرمەگە قاتىساتىن بالالاردىڭ ەسەبىن QR- كودتار مەن بيومەتريالىق سايكەستەندىرۋ (اتا-انالاردىڭ كەلىسىمىمەن) ارقىلى جۇرگىزۋ كوزدەلىپ وتىر.

- جوبانى «الەۋمەتتىك ءاميان» اقپاراتتىق جۇيەسىمەن ينتەگراتسيالاۋ كوزدەلگەن. بۇل بيۋدجەت قاراجاتىن ءبولۋدىڭ اشىقتىعى مەن تيىمدىلىگىن، سپورت سەكسيالارى مەن شىعارماشىلىق ۇيىرمەلەردىڭ شىعىستارىن اۆتوماتتى تۇردە باقىلاۋدى قامتاماسىز ەتىپ، مەملەكەت قاراجاتىنىڭ ماقساتسىز جۇمسالۋىن بولدىرماۋعا مۇمكىندىك بەرەدى، - دەيدى ولجاس بەكتەنوۆ.

ۇكىمەت باسشىسىنىڭ جاۋابىندا مەملەكەتتىك سپورتتىق تاپسىرىستى قارجىلاندىرۋدى اۋداندىق جانە قالالىق دەڭگەيگە بەرىلسە، باقىلاۋ دەڭگەيى تومەندەيتىنى ايتىلعان. سوندىقتان قارجىلاندىرۋ فۋنكسياسى وبلىستىق باسقارمالاردىڭ قۇزىرەتىندە قالا بەرمەك.

ەسكە سالساق، ءساۋىر ايىنىڭ اياعىندا الماتىدا «Damubala» باعدارلاماسىنا قىزمەت كورسەتۋشىلەرگە قايتا ىرىكتەۋ باستالعان بولاتىن.

اۆتور

ەسىمجان ناقتىباي