پۋتين توقايەۆقا ورىس ءتىلىن دامىتۋ قورىن قۇرۋعا اتسالىسقانى ءۇشىن العىس ايتتى
استانا. KAZINFORM - رەسەي پرەزيدەنتى ۆلاديمير پۋتين مەملەكەت باسشىسى قاسىم-جومارت توقايەۆقا ورىس ءتىلىن دامىتۋ قورىن قۇرۋعا اتسالىسقانى ءۇشىن العىس ءبىلدىردى.
«رەسەي جوعارى وقۋ ورىندارىندا 60 مىڭعا جۋىق قازاقستاندىق ستۋدەنت وقيدى. قازاقستاندا كوپتەگەن جەتەكشى رەسەيلىك ۋنيۆەرسيتەتتەردىڭ، سونىڭ ىشىندە لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ فيليالدارى ۇزاق ءارى تابىستى جۇمىس ىستەپ كەلەدى. ال بۇگىن قوستاناي قالاسىنداعى چەليابى مەملەكەتتىك ۋنيۆەرسيتەتى فيليالىن ۇيىمداستىرۋ تۋرالى ۇكىمەتارالىق كەلىسىمگە قول قويىلدى. جاقىن ارادا استانادا مگيمو فيليالى دا جۇمىس ىستەي باستايدى. ايتپاقشى، م گ ي م و- عا بيىل 80 جىل تولىپ وتىر. قىركۇيەك ايىندا استانادا وسى مەرەيتويعا ارنالعان ءىرى حالىقارالىق كونفەرەنتسيا ءوتتى. وندا قازاقستان پرەزيدەنتى قاسىم-جومارت كەمەل ۇلى ءسوز سويلەدى. ونىڭ وسى جوعارى وقۋ ورنىن بىتىرگەنى بەلگىلى»، — دەدى ۆلاديمير پۋتين بىرلەسكەن بريفنگتە.
سونداي-اق، ول قازاقستان باسشىلىعى ورىس ءتىلىن دامىتۋعا ەرەكشە كوڭىل ءبولىپ وتىرعانىن اتاپ ءوتتى. قولدايتىنىن كورىپ وتىرمىز.
«قازاقستان پرەزيدەنتىنە ورىس ءتىلى دامىتۋعا ارنالعان حالىقارالىق ۇيىم قۇرۋ تۋرالى باستاما كوتەرگەنى ءۇشىن ريزامىن»، — دەدى رەسەي پرەزيدەنتى.
ۆلاديمير پۋتين رەسەيدىڭ قازاقستاندا ورىس ءتىلدى مەكتەپتەر سالىپ، جالپى ورىس تىلىندەگى ءبىلىمنىڭ ساپاسىن ارتتىرۋعا كومەكتەسەتىنىن اتاپ ءوتتى.
«جاقىن ارادا قازاقستاندا وسىنداي ءۇش مەكتەپتى اشۋدى جوسپارلاپ وتىرمىز، — دەدى ۆ. پۋتين.
