پۋتين: رەسەي ۋكراينامەن بەيبىت كەلىسىم جاساۋعا دايىن

استانا. قازاقپارات -  ماسكەۋ ۋكراينامەن بەيبىت كەلىسىم تۋرالى مەموراندۋم ازىرلەۋگە دايىن، دەپ حابارلايدى 24kz.

 رەسەي كوشباسشىسى ۆلاديمير پۋتين ا ق ش پرەزيدەنتى دونالد ترامپپەن تەلەفون ارقىلى سۇحباتىندا وسىلاي دەدى. ەكى ساعاتقا سوزىلعان ەكەۋارا اڭگىمەدە كرەمل باسشىسى ترامپقا تىكەلەي كەلىسسوزدى قايتا جالعاعانى ءۇشىن العىس ايتىپ، قاقتىعىستى توقتاتىپ، بەيبىت كەلىسىمگە كەلۋدە ءتيىمدى جولداردى ىزدەستىرۋ كەرەكتىگىن اتاپ ءوتتى. سونىمەن قاتار ۋكراينامەن ءتيىستى كەلىسىم ورىندالعان سوڭ عانا وق اتۋدى دوعارۋ مۇمكىن ەكەنىن جەتكىزدى.

ۆلاديمير پۋتين، رەسەي پرەزيدەنتى:

- ىستامبۇلداعى كەزدەسۋ مەن كەلىسسوزدەرگە قاتىسۋشىلاردىڭ بايلانىسى قايتا جالعاستى. بۇل ءبىز دۇرىس جولدا كەلە جاتقانىمىزدى كورسەتەدى. تاعى دا اتاپ وتكىم كەلەدى، ترامپپەن بولعان اڭگىمە كونسترۋكتيۆتى ءوتتى. ا ق ش پرەزيدەنتىمەن كەلىسكەنىمىز، رەسەي ۋكراينا تاراپىمەن بولاشاق بەيبىت كەلىسىم تۋرالى مەموراندۋم جوباسىن ۇسىنۋعا جانە ازىرلەۋگە دايىن. بۇل قۇجاتتا رەتتەۋ پرينتسيپتەرى، مۇمكىن بولاتىن بەيبىت كەلىسىمنىڭ شارتتارى جانە كەلىسىلگەن جاعدايدا بەلگىلى ءبىر ۋاقىتقا سوعىستى توقتاتۋ ماسەلەلەرى قاراستىرىلادى.

ال اق ءۇي باسشىسى الەۋمەتتىك جەلىدەگى پاراقشاسىندا ۇزاققا سوزىلعان اڭگىمە وتە جاقسى ءوتتى دەپ جازدى. «رەسەي مەن ۋكراينا سوعىستى توقتاتۋ مەن بەيبىتشىلىك ورناتۋ بويىنشا كەلىسسوزدى دەرەۋ باستايدى»، - دەيدى ول. 

ماڭىزدى كەلىسسوز وتكىزۋگە ۆاتيكاندى قولايلى جەر دەپ سانايتىنىن دا ايتقان. ءسويتىپ، كەزدەسۋ ۆاتيكاندا ءوتۋى مۇمكىن. سونىمەن قاتار ترامپ ا ق ش- تىڭ كەلىسسوزگە قاتىسۋىن قايتا قاراستىرۋى مۇمكىن ەكەنىن، ەگەر پروگرەسس بايقالماسا، وعان قاتىسۋدان باس تارتاتىنىن ءبىلدىردى. بۇعان دەيىن ترامپ رەسەيگە قىسىم جاساپ، سوعىستى ءبىر كۇندە توقتاتا الاتىنىن ايتقان ەدى. ءبىراق بۇل جولى ول جايىندا اۋىز اشقان جوق.

 دونالد ترامپ، ا ق ش پرەزيدەنتى:

- مەنىڭشە، كەلىسسوزدەردى ۆاتيكاندا جۇرگىزۋ وتە دۇرىس شەشىم. تاراپتار ءۇشىن بۇل جەردە كەزدەسۋ اراداعى اشۋ-ىزادان ارىلتىپ، دۇرىس شەشىم قابىلداۋعا كومەكتەسەدى. پۋتين دە تۇپتەپ كەلگەندە، بارلىعىنىڭ اياقتالعانىن قالايدى. ەگەر ول شىن مانىندە مۇنى قالاماسا، بۇنى جاھانعا جار سالىپ ايتپاس ەدىم. ءبىر جاقسىلىقتىڭ بولاتىنىن سەزەمىن.

 ترامپ پۋتينمەن اڭگىمەسىنەن كەيىن ۋكراينا پرەزيدەنتى ۆلاديمير زەلەنسكيمەن سويلەستى. تاراپتاردىڭ قاشىقتان بايلانىسىنان سوڭ كيەۆ باسشىسى جۋرناليستەرگە سۇحبات بەردى. ول ۋكراينا، رەسەي، ا ق ش، ەۋرووداق جانە ۇلى بريتانيا اراسىندا جوعارى دەڭگەيدە كەزدەسۋ وتكىزۋ مۇمكىندىگىن قاراستىرىپ جاتقانىن ايتتى. ول بۇل شارانى تۇركيا، ۆاتيكان نەمەسە شۆەيساريادا ۇيىمداستىرۋدى جوسپارلاپ وتىر.

سونداي-اق زەلەنسكي رەسەيگە قارسى سانكسيالار ەنگىزۋ قاجەتتىگىن اتاپ ءوتىپ، حالىقارالىق قاۋىمداستىقتى ۋكرايناسىز ەشقانداي كەلىسىمگە كەلمەۋگە شاقىردى. تۇتقىن الماسۋ ماسەلەسىن شەشۋدى جانە رەسەيدىڭ ەنەرگەتيكالىق ءارى بانكتىك سەكتورلارىنا سانكسيالار سالۋدى ۇسىندى.

ۆلاديمير زەلەنسكي، ۋكراينا پرەزيدەنتى:

- بۇگىن مەندە پرەزيدەنت ترامپپەن ەكى ءتۇرلى فورماتتا ەكى تەلەفون اڭگىمەسى بولدى. ءبىرىنشى اڭگىمەدە ءبىز ۋكراينا ءۇشىن وتە ماڭىزدى ماسەلە - سوعىستىڭ توقتاتىلۋى تۋرالى سويلەستىك. ءبىز بۇل ماسەلەنى ستامبۇلدا جانە ودان بۇرىن دا تالقىلاعان بولاتىنبىز. ەكىنشى ماسەلە، ول - ا ق ش- تىڭ سانكسيالار سالۋعا دايىن بولۋى. مەن ونىمەن بۇل ماسەلەنى قاراستىرۋدى جانە ەگەر رەسەي سوعىستى توقتاتۋدى قولداماسا، سانكسيالار ەنگىزۋدى سۇرادىم.