پۋتين ەكى ەل اراسىنداعى سەرىكتەستىك، تاۋار اينالىمى، ىنتىماقتاستىق تۋرالى ايتتى

رەسەي فەدەراتسياسىنىڭ پرەزيدەنتى ۆلاديمير پۋتين قازاقستاندىق «كازپراۆدا» گازەتىنە بەرگەن سۇحباتىندا قازاقستان مەن رەسەي اراسىنداعى سەرىكتەستىك، تاۋار اينالىمى جانە ىنتىماقتاستى تۋرالى ايتتى، دەپ حابارلايدى Kazinform.

«بۇگىندە رەسەي مەن قازاقستاننىڭ سەرىكتەستىگى ەرەكشە سيپاتقا يە جانە بەلسەندى دامىپ كەلەدى. ول ءوزارا سىيلاستىق، ەگەمەندىكتى مويىنداۋ، اۋماقتىق تۇتاستىق جانە ىشكى ىستەرگە ارالاسپاۋ پرينتسيپتەرىنە نەگىزدەلگەن. مۇنى ءبىزدىڭ ەلدەرىمىز اراسىنداعى قاتىناستاردى رەتتەيتىن قۇجاتتاردىڭ كەڭ بازاسى (350 دەن استام) راستايدى. بىزدە مەملەكەتارالىق قارىم-قاتىناستىڭ ءارتۇرلى تەتىكتەرى جۇمىس ىستەيدى. ەڭ الدىمەن پرەزيدەنتتەر اكىمشىلىگى، سىرتقى ىستەر مينيسترلىگى، قۇقىقتىق ءتارتىپ، ادىلەت ورگاندارى جانە پارلامەنتتەر جەلىسى بويىنشا بايلانىستار»، - دەپ جاۋاپ بەردى رەسەي پرەزيدەنتى سۇحبات ساۋالىنا.

سونداي-اق ۆلاديمير پۋتين قازاقستان مەن رەسەي اراسىنداعى تاۋار اينالىمىنا توقتالدى.

«ءوزارا تاۋار اينالىمى جاقسى قارقىنمەن ءوسىپ كەلە جاتقانىن ەرەكشە اتاپ وتەمىن. وتكەن جىلى ول 10,2 پايىزعا ءوسىپ، رەكوردتىق 28,2 ميلليارد دوللارعا جەتتى، ال وسى جىلدىڭ قاڭتار - تامىزىندا ول تاعى 7,6 پايىزعا ءوسىپ، 18,9 ميلليارد دوللاردى قۇرادى. رەسەي - قازاقستان ەكونوميكاسىنداعى ءىرى ينۆەستورلاردىڭ ءبىرى. قازاقستاندا جيناقتالعان رەسەيلىك ينۆەستيتسيالار شامامەن 17 ميلليارد دوللاردى قۇرايدى. قازاقستاندا رەسەيدىڭ قاتىسۋىمەن 6 مىڭعا جۋىق كاسىپورىن جۇمىس ىستەيدى»، - دەيدى ول.

ول وسكەلەڭ ۇرپاقتى بولاشاقتىڭ باعا جەتپەس بايلىعىنا تەڭەدى.

«عاسىرلار بويعى تاتۋ كورشى، ىنتىماقتاستىق، ناتسيزممەن كۇرەس حالىقتارىمىزدى جاقىنداستىرادى، ءداستۇرلى تۇردە ءوزارا ءتيىمدى بايلانىستاردى نىعايتادى. قازاقستاندىق جاستار ورىس ءتىلىن ۇيرەنۋگە، ءبىلىم الۋعا قىزىعۋشىلىق تانىتاتىنىن ەرەكشە اتاپ وتەمىن. سەرىكتەستەرگە جانە ۆولونتەرلىك، مادەنيەت جانە گۋمانيتارلىق قىزمەت سالاسىنداعى ىنتىماقتاستىققا دەگەن قىزىعۋشىلىعى ءۇشىن العىس ايتامىز. ءبىزدىڭ ستراتەگيالىق سەرىكتەستىگىمىز شىنىمەن دە بولاشاققا ۇمتىلادى، كەڭ ءارى كوپ قىرلى، ۋاقىتپەن تەكسەرىلەدى جانە جوعارى دەڭگەيگە قاراي داميدى. بىزدە ءبىر-بىرىمىزگە كومەكتەسەتىن كوپ نارسە بار. ءبىز ودان ءارى بىرلەسىپ جۇمىس ىستەيمىز، ءوزىمىزدىڭ ەكونوميكالىق جانە تەحنولوگيالىق الەۋەتىمىزبەن ازاماتتارىمىزدىڭ ءومىر ءسۇرۋ ساپاسىن ارتتىرامىز»، - دەدى ۆ. پۋتين.