تەگىن 10 سوتىق جەر: كەزەكتە قانشا ادام تۇر
استانا. KAZINFORM - جەر كودەكسىنە سايكەس، ءاربىر قازاقستاندىق جەكە تۇرعىن ءۇي قۇرىلىسى ءۇشىن 10 سوتىق جەر ۋچاسكەسىن تەگىن الۋعا قۇقىلى.
«جىلجىمايتىن مۇلىك بويىنشا ءبىرىڭعاي مەملەكەتتىك كاداستر» اقپاراتتىق جۇيەسى نەگىزىندە «جەر ۋچاسكەسىن الۋ كەزەگىنىڭ ءتىزىلىمى» ىسكە اسىرىلعان.
- قازىر اتالعان تىزىلىمدە 4257042 ادام تىركەلگەن. الايدا جەر ۋچاسكەلەرىن بەرۋ ماسەلەلەرى جانە وسىعان سايكەس ءتىزىلىمدى جۇرگىزۋ تىكەلەي جەرگىلىكتى اتقارۋشى ورگانداردىڭ قۇزىرەتىنە جاتادى، - دەگەن جاۋاپ الدىق رەسمي ساۋالعا.
كىمدەر ءوتىنىم بەرە الادى؟
كامەلەت جاسىنا تولعان كەز كەلگەن قازاقستان ازاماتى ءوتىنىم بەرە الادى، ونىڭ مەنشىگىندە باسقا جەر ۋچاسكەسى، پاتەر نەمەسە ءۇيدىڭ بولۋى ماڭىزدى ەمەس.
جەر ۋچاسكەسىن قالاي الۋعا بولادى؟
10 سوتىق جەرگە ءوتىنىم بەرۋ جانە كەزەك كۇتۋ مارتەبەسىن باقىلاۋ قىزمەتىنە ەلەكتروندىق ۇكىمەت پورتالى ارقىلى جۇگىنۋگە بولادى.
ول ءۇشىن «جىلجىمايتىن مۇلىك» بولىمىنە كىرىپ، «جەر قاتىناستارى» ءبولىمىن تاڭداپ، ودان كەيىن «جەكە تۇرعىن ءۇي قۇرىلىسى ءۇشىن جەر ۋچاسكەسىن الۋ كەزەگىن قاراۋ نەمەسە تىركەۋ (10 سوتىق) » تارماعىن تاڭداپ، «قىزمەتكە ونلاين تاپسىرىس بەرۋ» باتىرماسىن باسۋ قاجەت. اۆتوريزاتسيادان وتكەننەن كەيىن «ءوتىنىش ءتۇرى» باعانىندا قاجەتتى قىزمەتتى تاڭداپ، ءتيىستى جولدى تولتىراسىز.
سونداي-اق، كەزەكتەگى مارتەبەنى جەر كاداسترىنىڭ كوپشىلىك كارتاسى ارقىلى دا تەكسەرۋ مۇمكىندىگى بار.
سونىمەن قاتار، جەر ۋچاسكەسى بەرىلگەنى تۋرالى SMS- حابارلاما ارقىلى اۆتوماتتى تۇردە حابارلاۋ فۋنكسياسى ىسكە قوسىلعان. حابارلاما جەرگىلىكتى اتقارۋشى ورگانداردىڭ اۆتوماتتاندىرىلعان «جەر كاداسترىنىڭ ءبىرىڭعاي مەملەكەتتىك اقپاراتتىق جۇيەسى» ارقىلى جىبەرىلەدى.
جەردى كىم، قاشان جانە قالاي بەرەدى؟
- جەر ۋچاسكەلەرى تەك سۋ جانە ەلەكتر جەلىلەرى تارتىلعان اۋماقتاردان عانا بەرىلەدى؛
- جەر بەرۋ تۋرالى شەشىمدى جەرگىلىكتى اكىمدىك قابىلدايدى. ولار جەر ۋچاسكەسىن دايىنداۋ بارىسى جانە كەزەكتەگى ءتىزىم تۋرالى اقپاراتتى سايتتا جانە بۇقارالىق اقپارات قۇرالدارىندا قازاق جانە ورىس تىلدەرىندە توقسان سايىن جاريالاپ وتىرۋعا مىندەتتى؛
- جەردى جەكە مەنشىككە تۇرعىن ءۇي سالىنعاننان كەيىن الۋعا بولادى. ال يگەرۋ كەزەڭىندە جەر جالعا بەرىلەدى؛
- جەكە مەنشىككە بەرۋ تۋرالى شەشىم ءۇيدى پايدالانۋعا قابىلداۋ اكتىسى نەگىزىندە قابىلدانادى؛
- 10 سوتىق تەگىن جەر تەك ءبىر رەت، كەزەك كەلگەن وبلىس/قالا اۋماعىنان عانا بەرىلەدى. قالعان ءوتىنىم جويىلادى.
- مەملەكەتتەن بۇرىن تەگىن جەر العان نەمەسە جەرگىلىكتى بوس جەر جوق بولعان جاعدايدا، كەزەككە تۇرۋ مۇمكىن ەمەس.
ايتا كەتەيىك، تەگىن العان 10 سوتىق جەر ءۇي سالۋعا جارامسىز بولسا، قايتادان كەزەككە تۇرۋعا بولادى.
وتكەن جىلى ءماجىلىس دەپۋتاتى ۇلاسبەك سادىبەكوۆ حالىققا 10 سوتىق جەر تەلىمىن بەرۋ ماسەلەسىن كوتەرىپ، ۇسىنىس ايتقان ەدى.
