تيمۋر سۇلەيمەنوۆ ورتا مەرزىمدى ارالىقتاعى ۇلتتىق بانكتىڭ نەگىزگى ماقساتىن ايتتى
استانا. KAZINFORM - جاھاندىق ينفلياتسيا باسەڭدەپ كەلەدى. بۇل تۋرالى ەلوردادا وتكەن باسپا ءسوز ءماسليحاتىندا قر ۇلتتىق بانكىنىڭ ءتوراعاسى تيمۋر سۇلەيمەنوۆ ءمالىم ەتتى.
«ۇلتتىق بانكتىڭ اقشا-كرەديت ساياساتى كوميتەتى بازالىق مولشەرلەمەنى %14,25 دەڭگەيىندە ساقتاۋ تۋرالى شەشىم قابىلدادى. شەشىم ناقتى دەرەكتەردى تالداۋ مەن تاۋەكەلدەر بالانسىن ەسكەرە وتىرىپ جاسالدى. سونىمەن قاتار، ينفلياتسيا مەن ەكونوميكانىڭ ءوسۋى بويىنشا بولجامدارىمىز جاڭارتىلدى. شىلدەدە جىلدىق ينفلياتسيا ءوستى، ءبىراق ول ۇلتتىق بانكتىڭ مامىرداعى بولجامى شەگىندە ساقتالدى. بازالىق ينفلياتسيا جانە ماۋسىمدىق فاكتورلاردان تازارتىلعان ينفلياتسيا ەكىنشى اي قاتارىنان جەدەلدەدى. سىرتقى ينفلياتسيالىق جاعداي قالىپتى دەپ باعالانىپ وتىر. جاھاندىق ينفلياتسيا باسەڭدەپ كەلەدى»، - دەدى ت. سۇلەيمەنوۆ
ونىڭ ايتۋىنشا، ىشكى ەكونوميكادا ينفلياتسيالىق قىسىم كۇشەيىپ كەلەدى.
«قازىرگى كەزدە ايىرباستاۋ باعامىنىڭ جاقىندا عانا السىرەگەنىن ەسكەرسەك، اعىمداعى اقشا- كرەديت شارتتارى جۇمسارعانى بايقالادى. اقشا-كرەديت شارتتارىنىڭ جۇمسارۋى اقشا نارىعى مولشەرلەمەسىنىڭ ديناميكاسىمەن دە راستالادى. جۇمسارعان اقشا-كرەديت شارتتارى مولشەرلەمەنى ودان ءارى تومەندەتۋ ءۇشىن كەڭىستىك اشپايدى. مونەتارلىق شارتتاردىڭ ودان ءارى شامادان تىس جۇمسارۋىن بولدىرماي، وتەۋ ءۇشىن بازالىق مولشەرلەمەنى اعىمداعى دەڭگەيدە ساقتاۋدى قاجەت ەتتى. جاڭارتىلعان بولجامدار تاۋەكەل بالانسىنىڭ پروينفلياتسيالىق باعىتقا اۋىسقانىن كورسەتەدى. بۇل بازالىق مولشەرلەمەنى 2024 -جىلدىڭ سوڭىنا دەيىن اعىمداعى دەڭگەيدە ساقتاپ قالۋعا يتەرمەلەيدى»، - دەدى ۇ ب باسشىسى.
ونىڭ سوزىنە قاراعاندا، قازاقستان ەكونوميكاسىنىڭ 2024 -جىلى ءوسۋ بولجامى %3,5-4,5 شەگىندە ساقتالعان. بيىل ىسكەرلىك بەلسەندىلىك فيسكالدىق شارالار، تۇتىنۋ سۇرانىسىنىڭ ءوسۋى جانە مۇناي سالاسىنا جاتپايتىن سەكتورداعى ينۆەستيتسيالىق بەلسەندىلىك ەسەبىنەن ىنتالاندىرىلاتىن بولادى. 2025 -جىلى بولجام %5,1-6,1- كە دەيىن ارتتىرۋ جاعىنا قايتا قارالدى. 2026 -جىلدىڭ سوڭىنا قاراي ەكونوميكانىڭ جىلدىق ءوسىمى %4,9-5,9 شەگىندە قالىپتاسادى دەپ كۇتىلۋدە. 2025-2026 -جىلدارى فيسكالدىق ماسەلەلەرمەن قاتار، جالپى ىشكى ءونىمنىڭ وسىمىنە مۇناي ءوندىرۋدى ۇلعايتۋ، سونداي- اق ۇكىمەت جۇزەگە اسىرۋعا جوسپارلانعان شارالار ارقىلى قوسىمشا ۇلەس قوساتىن بولادى.
«ءبىزدىڭ باستى ماقساتىمىز - ورتامەرزىمدى كەلەشەكتە ينفلياتسيانى %5 دەڭگەيىندە ۇستاۋ. جاڭارتىلعان بولجامدار مەن اعىمداعى ينفلياتسيالىق ۇدەرىس ۇستامدى قاتاڭ اقشا-كرەديت شارتتارىن ۇزاق ۋاقىت ساقتاۋ قاجەتتىگىن كورسەتىپ وتىر. ءبىز ءوز مانداتىمىزعا سايكەس، اقشا- كرەديت ساياساتىن كەلىپ تۇسەتىن دەرەكتەر مەن تاۋەكەلدەر بالانسىنا بەيىمدەي وتىرىپ، ينفلياتسيانى 5 پايىزدىق ماقساتتى دەڭگەيگە جىلدام قايتارۋ ءۇشىن بار كۇشىمىزدى سالامىز»، - دەدى ول.
اۆتور
رۋسلان عابباسوۆ
