تيمۋر سۇلەيمەنوۆ: ۇكىمەتتىڭ تاريف رەفورماسىن ۋاقىتشا شەگەرگەنى ورىندى شەشىم بولدى

استانا. KAZINFORM - ۇلتتىق بانك ءتوراعاسى تيمۋر سۇلەيمەنوۆ ۇكىمەتتىڭ كوممۋنالدىق تاريفتەردى كوتەرۋ شاراسىن كەيىنگە قالدىرۋ تۋرالى شەشىمىن ۋاقتىلى ءارى ورىندى قادام دەپ باعالايتىنىن ايتتى.

ايتۋىنشا، بۇل شەشىم ەلدەگى باعانى تۇراقتاندىرىپ، ينفلياتسياعا تۇسەتىن قىسىمدى باسەڭدەتەدى.

- رەفورما باستالعان كەزدە ءورشىل قارقىن مەجە ەتىپ الىنعان بولاتىن. ەندى سونى قايتا قاراۋ كەرەك بولىپ تۇر. ءبىز ۇكىمەت سولاي ىستەگەنىنە قۋانىشتىمىز. تاريفتىڭ قارقىندى وسپەگەنى ينفلياتسيانىڭ احۋالىنا اسەر ەتەدى، - دەدى تيمۋر سۇلەيمەنوۆ.

سونداي-اق، ول تاريف رەفورماسى باستالعان كەزدە سالىق ساياساتى قالاي وزگەرەتىنى ايقىن بولماعانىن ايتادى. وعان سىرتقى ەكونوميكانىڭ احۋالى، ساۋدا رەجيمدەرىنىڭ قۇبىلۋى قوسىلعان.

- بيزنەس جىلۋدىڭ نەمەسە ەلەكتر قۋاتىنىڭ اقىسىنىڭ وسكەنىن كورگەندە ءوزى كورسەتەتىن قىزمەت پەن وندىرەتىن تاۋارعا دا باعا قوسادى. سوندىقتان تاريفتى بىرتىندەپ، باقىلاي وتىرىپ كوتەرگەن ماڭىزدى، - دەدى ۇلتتىق بانك باسشىسى.

ەسكە سالايىق، بۇگىن ۇلتتىق بانك بازالىق مولشەرلەمەنى تاعى وزگەرىسسىز قالدىردى.