ۋتيلالىمدى ەنگىزۋ كولىك باعاسىنىڭ وسۋىنە ەداۋىر اسەر ەتتى - دەپۋتات
استانا. KAZINFORM - بۇگىن سەناتتىڭ جالپى وتىرىسىندا دەپۋتات سۇلتانبەك ماكەجانوۆ كولىك الۋعا پايىزى تومەن نەسيە بەرۋ جانە جالپى اۆتووندىرىس سالاسىنداعى پروبلەمالاردى جاريا ەتتى.
«ەكىنشى دەڭگەيدەگى بانكتەر ۇسىنعان جەڭىلدىكپەن اۆتوكولىك الۋعا نەسيە ءبولۋ كولەمى حالىقتىڭ سۇرانىسىن قاناعاتتاندىرا المادى. ونى autonesie.kz پلاتفورماسىندا 18 سەكۋند ىشىندە اياقتالعان ليميت مولشەرى انىق كورسەتىپ تۇر»، - دەدى س. ماكەجەنوۆ ۇكىمەت باسشىسى ءاليحان سمايىلوۆتىڭ اتىنا جولداعان ساۋالىندا.
ونىڭ ايتۋىنشا، 2015-جىلدان باستاپ مەملەكەت اۆتوكولىك الۋعا جەڭىلدەتىلگەن نەسيە بەرۋ ارقىلى وتاندىق اۆتوكولىك ءوندىرۋشىنى قولداۋدىڭ نارىقتىق تەتىگىن قولدانىپ كەلەدى.
«ءبىزدىڭ مەملەكەت وتاندىق اۆتوكولىك ءوندىرۋشىنى قولداي وتىرىپ، ەلىمىزدە شىعارىلاتىن ءونىمنىڭ قازاقستاندىق قۇرامداس بولىگى ارتا تۇسەتىنىنە سەنىم ارتتى. الايدا مەملەكەت قارجىلاندىراتىن جەڭىلدەتىلگەن نەسيە وتاندىق اۆتوموبيل ءوندىرىسىن دامىتۋعا ءىس جۇزىندە اسەر ەتكەن جوق دەپ ايتۋعا بولادى»، - دەدى دەپۋتات.
سۇلتانبەك ماكەجانوۆ وسىعان بايلانىستى جەڭىلدەتىلگەن نەسيە جانە جالپى اۆتوموبيل ءوندىرىسى سالاسىنىڭ تاعدىرىنا قاتىستى ۇكىمەتتىڭ اتىنا ءبىرقاتار ماسەلە ايتتى.
«ەلىمىزدەگى جەڭىلدەتىلگەن تارتىپتە اۆتوكولىك الۋعا نەسيە بەرۋ ەلىمىزدە اۆتوموبيل پاركىن جاڭارتۋ مەن حالىقتى اۆتوكولىكپەن قامتاماسىز ەتۋدى ارتتىرۋ ماقساتىن ەسكەرگەن. مەملەكەت اۆتوپاركتى جاڭارتۋ ءۇشىن سىرتتان اكەلىنەتىن اۆتوكولىككە باستاپقى تىركەۋ ەنگىزدى. باستاپقى تىركەۋ قۇنى اكەلىنەتىن ءاۆتوموبيلدىڭ شىعارىلعان جىلىنا بايلانىستى. ول بويىنشا ەسكى كولىك اكەلۋ ءتيىمسىز بولۋى كەرەك ەدى، الايدا ءىس جۇزىندە بۇل بارلىق كولىكتىڭ قىمباتتاۋىنا اكەلىپ سوقتى. ۋتيلالىم ەنگىزۋ دە كولىك باعاسىنىڭ وسۋىنە ەداۋىر اسەر ەتتى»، - دەدى سەناتور ماكەجانوۆ.
