تىكەلەي ەفيردەگى توي: ساكەن مايعازيەۆ حالىقتان تۇسكەن قاراجاتتان سالىق تولەۋى كەرەك

استانا. KAZINFORM - قارجى مينيسترلىگىنە قاراستى مەملەكەتتىك كىرىستەر كوميتەتى بەلگىلى ءانشى ساكەن مايعازيەۆتىڭ اقىلى توي كورسەتىلىمى تۋرالى حابارلاماسىنا پىكىر ءبىلدىردى.

بەلگىلى بولعانداي، ساكەن مايعازيەۆ ءوز ۇلىنىڭ ۇيلەنۋ تويىن كورگىسى كەلەتىندەرگە جابىق تەلەگرام-كانال اشقان. ول كانالعا جازىلۋ ءۇشىن 1380 تەڭگە تولەۋ كەرەك. بۇل قازاق قوعامىنداعى العاشقى اقىلى ونلاين-توي بولماق.

كوميتەت قازاقستان رەسپۋبليكاسىنىڭ زاڭناماسىنا سايكەس، سالىق تولەۋشىنىڭ سالىقتار مەن بيۋدجەتكە مىندەتتى تولەمدەر بويىنشا سالىقتىق مىندەتتەمەلەرى ونىڭ زاڭدى نىسانىنا، قولدانىلاتىن سالىق سالۋ رەجيمىنە جانە سالىق سالۋ وبەكتىلەرىنىڭ بولۋىنا تىكەلەي بايلانىستى.

− قاراستىرىلىپ وتىرعان جاعدايدا ونلاين-تويعا قاتىسۋ ءۇشىن 1380 تەڭگە كولەمىندە اقى الۋ تابىس تابۋعا باعىتتالعان كاسىپكەرلىك قىزمەت بولىپ سانالادى. ەگەر ءىس-شارانى ۇيىمداستىرۋشى جەكە كاسىپكەر نەمەسە زاڭدى تۇلعا رەتىندە تىركەلسە، الىنعان تابىستى دەكلاراتسيالاپ، قولدانىلاتىن سالىق سالۋ رەجيمىنە بايلانىستى جەكە تابىس سالىعىن تولەۋگە مىندەتتى، − دەپ جازىلعان كوميتەتتىڭ اگەنتتىككە بەرگەن جاۋابىندا.

زاڭعا سايكەس، ۇيىمداستىرۋشى شاعىن بيزنەس سۋبەكتىلەرى ءۇشىن جەڭىلدەتىلگەن دەكلاراتسيا نەگىزىندە ارنايى سالىق رەجيمى قولدانىلعان جاعدايدا - %3؛ جەكە كاسىپكەر ءۇشىن جالپىعا بىردەي بەلگىلەنگەن سالىق سالۋ رەجيمى بولسا - %10؛ زاڭدى تۇلعا بولسا - %20 مولشەرىندە سالىق تولەۋى كەرەك.

وسىعان ۇقساس سالىق سالۋ ءتارتىبى سالتاناتتى ءىس-شارالاردى ۇيىمداستىرۋ سالاسىندا قىزمەت كورسەتەتىن سۋبەكتىلەرگە دە قولدانىلادى. بۇل ساناتقا مەيرامحانالار مەن بانكەت زالدارى، سونداي-اق جۇرگىزۋشىلەر (اسابا)، ارتىستەر، مۋزىكالىق جانە بي ۇجىمدارى، ءىس-شارالاردى وتكىزۋ شەڭبەرىندە قىزمەت كورسەتەتىن كاسىپكەرلەر جاتادى.

ەسكە سالا كەتسەك، بۇدان بىلاي ChatGPT دە قازاقستاندا قوسىمشا قۇن سالىعىن تولەيتىن بولدى.

اۆتور

ايجان سەرىكجان قىزى