تىكۇشاق قونا المادى: قاراتال اۋىلىنىڭ تۇرعىندارى سۋ ورتاسىندا قالدى
اقتوبە. KAZINFORM - اقتوبە وبلىسى ويىل اۋدانى قاراتال (بۇرىنعى بەرسيەۆ) اۋىلىنىڭ تۇرعىندارى مەكتەپتە، كەيبىرى ءوز ءۇيىنىڭ شاتىرىندا وتىر. بۇگىن ءبارى سول مەكتەپتە قونىپ شىعۋعا ءماجبۇر. سەبەبى تىكۇشاق ەكى رەت قونا الماي كەتتى.
بەرسيەۆ اۋىلىنا قارعىن سۋ ساعات 12:00 شاماسىندا كىرگەن. سول كەزدە ايەلدەر بالا- شاعاسىن الىپ، مەكتەپتى پانالاسا، ەر ادامدار قوراداعى مالىن ويلاپ ءۇيىنىڭ جانىندا قالعان. سۋ كوتەرىلگەندە ولاردىڭ ءبارى دە ەۆاكۋاتسيالىق بەكەتكە جەتە الماي، ءۇيدىڭ شاتىرىن پانالاپ كەتتى.
— ءبىز قازىر مەكتەپتىڭ ەكىنشى قاباتىندا وتىرمىز. مۇندا جارىق جوق، گاز جوق، جىلۋ جوق. ال جەرتولەسى سۋعا تولىپ تۇر. بالالار توڭىپ قالدى. ءوزىمىز مەكتەپتە وتىرساق، ەر ادامداردىڭ ءبارى ءۇيدىڭ توبەسىندە ءجۇر. ولارمەن بايلانىس ءۇزىلىپ قالدى. تىكۇشاق ەكى رەت سوعىپ، قونا الماي كەتتى. ءبىز قول بۇلعاپ قالدىق. جان-جاققا ايتىپ، كومەكتەسىڭىزدەرشى، - دەدى بەرسيەۆ اۋىلىنىڭ تۇرعىنى گۇلحان.
بەرسيەۆ اۋىلىنداعى جاعدايدان جەرگىلىكتى اكىمدىك حاباردار. تەك قولدان كەلەر قايران جوق.
— مەكتەپ - ەۆاكۋاتسيالىق پۋنكت. ول ادامدار سول جەردە جينالىپ وتىر. سىرتقا شىعا المايدى، سۋعا باتىپ كەتۋى مۇمكىن. جارىق ماسەلەسىنە كەلەر بولساق، ونى قوسۋعا بولمايدى. ەلەكتر توگىن قوسسا، اۆاريالىق جاعداي بولادى، جەردىڭ ءبارى سۋ بولعان سوڭ. بۇگىن كەشكىلىك تىكۇشاقپەن 6 ادام ءتۇسىرىلدى. ولاردىڭ رەزەڭكە كيىمى بار. قولىندا رەزەڭكە قايىعى دا بار. سول قايىقپەن اۋىلدىڭ ۇيلەرىندە قالىپ قويعان ادامداردى جيناپ، مەكتەپتىڭ ەكىنشى قاباتىنا كوتەرەدى. سەبەبى ساماننان سالىنعان ۇيلەر 5-6 ساعاتتان كەيىن وتىرىپ قالۋى مۇمكىن. بەرسييەۆ اۋىلى بويىنشا مەكتەپ ەڭ ءقاۋىپسىز ورىن بولىپ تۇر، - دەدى ويىل اۋدانى اكىمىنىڭ ورىنباسارى مۇراتباي ايداربايەۆ.
ونىڭ ايتۋىنشا، تىكۇشاق جىبەرىلگەنىمەن، ەكى رەت قونا الماي كەتكەن.
- اينالاسىنىڭ ءبارى سۋ، تىكۇشاقتىڭ قونۋى مۇمكىن بولمادى. ول تىكۇشاق كەرى كەتتى. قازىرگى كەزدە ءبىز جىبەرگەن 6 ادام ولارعا تاماق، سۋ اپارادى. بۇگىن حالىق سول مەكتەپتە امالدايدى. مەكتەپ قۇلاپ جاتقان جوق، - دەدى مۇراتباي ايداربايەۆ.
ايتا كەتەيىك، قازىرگى كەزدە ويىل اۋدانىندا توتەنشە جاعداي جاريالانعان. ەۆاكۋاتسيالىق بەكەت دەپ بەكىتىلگەن مەكتەپ- ينتەرناتتا 64، كوللەدجدە 29، ال سپورت مەكتەبىندە 27 ادام بار. سونىمەن بىرگە جۇزدەگەن ادام تۋما-تۋىسىنا كەتتى.
