تۇيەدەن قۇلاعان ايەل 45 ميلليون تەڭگە ءوندىرىپ الدى

استانا. KAZINFORM - ماروككودا تۇيەدەن قۇلاپ، قابىرعالارىن سىندىرعان اۋستراليالىق تۋريسكە ەمى ءۇشىن 100 مىڭ دوللار (45150040 تەڭگە شاماسىندا) وتەماقى تولەندى، دەپ حابارلايدى EL.kz اقپارات اگەنتتىگى Tengritravel.kz-كە سىلتەمە جاساپ.

63 جاستاعى اۋستراليالىق كەرول حاكەر جيەنى وليۆيامەن بىرگە بۇكىل الەم بويىنشا ساياحاتقا شىققان كورىنەدى. ءبىراق وقىس وقيعا ساحارا شولىندە بولدى. وڭباي قۇلاعان ايەلدىڭ 6 قابىرعاسى، بۇعاناسى، سول بىلەگى سىنعان. سونىمەن قوسا ونىڭ وكپەسى تەسىلىپ قالعان. حاكەر سول كۇنى ومىرىندەگى ەڭ اۋىر ازاپتى باستان وتكەرگەنىن جاسىرمادى.

ساياحاتشى ماروككو اۋرۋحاناسىندا 11 كۇن جاتىپ ەمدەلدى. سودان كەيىن اۋرۋحانا مەديتسينالىق قىزمەت كورسەتكەنى ءۇشىن ۇلكەن ەسەپشوت شىققانىن كورسەتتى. بىرنەشە كۇننەن سوڭ تۋريست وپەراتسيا جاساتۋ ءۇشىن اۋسترالياعا ورالدى.

اۋستراليالىق تۋريست ساياحاتقا شىعار الدىندا 812 دوللارعا ساقتاندىرۋ پوليسىن ساتىپ العان ەكەن. كومپانيا زارداپ شەككەن ايەلدىڭ بارلىق شىعىنىن وتەپ بەردى.