تىعىز قۇرىلىس: 1- قاڭتاردا قازاقستاندا جاڭا تالاپتار ەنگىزىلەدى
2024-جىلى 1- قاڭتاردا زاڭسىز قۇرىلىستى بولدىرماۋعا باعىتتالعان ءبىرىڭعاي قالا قۇرىلىسى ساراپتاماسى قولدانىسقا ەنەدى.
بۇل تۋرالى ق ر ونەركاسىپ جانە قۇرىلىس مينيسترلىگى قۇرىلىس جانە تۇرعىن ءۇي-كوممۋنالدىق شارۋاشىلىق كوميتەتى ءتوراعاسىنىڭ ورىنباسارى باقىتجان جۇنىسبەكوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ايتتى، دەپ حابارلايدى قازاقپارات ءتىلشىسى.
ونىڭ ايتۋىنشا، بارلىق قۇرىلىس جوبالارى كەشەندى قالا قۇرىلىسىنىڭ مەملەكەتتىك ساراپتاماسىنان وتەدى. مەملەكەتتىك باقىلاۋدى كۇشەيتۋ بويىنشا جاڭا قۇرالدار ازىرلەنىپ، ءىشىنارا ەنگىزىلدى جانە سالانى اۆتوماتتاندىرۋ، سيفرلاندىرۋ جۇمىستارى جۇرگىزىلىپ جاتىر.
«اتاپ ايتقاندا، وڭىرلەردە قالا قۇرىلىسىن دامىتۋدىڭ جۇيەلى جوسپارىنىڭ بولماۋىنان جانە ارحيتەكتورلاردىڭ سالىنىپ بىتكەن تەرريتوريانى ودان سايىن تىعىزداۋىنان جۇمىس ىستەپ تۇرعان ينجەنەرلىك جەلىلەردىڭ قۋاتى جەتپەي، شامادان تىس جۇكتەمە تۇسكەنىن، الەۋمەتتىك نىسانداردىڭ، رەكرەاتسيالىق ايماقتاردىڭ جاقىن قولجەتىمدى بولماۋىن، جول ينفراقۇرىلىمىنداعى كەپتەلىستەردى كورىپ وتىرمىز. اتاپ ايتقاندا، اكىمدىكتەر ەگجەي-تەگجەيلى جوسپار ازىرلەۋ كەزىندە باس جوسپاردىڭ جوبالىق شەشىمدەرىنەن نەگىزسىز اۋىتقىپ كەتەدى، نەگىزگى جوسپاردا جالعان دەرەكتەردى جازادى، ينفراقۇرىلىمسىز بەيبەرەكەت قۇرىلىسقا، ەگجەي-تەگجەيلى جوسپاردى زاڭسىز تۇزەتۋگە جول بەرەدى»، - دەپ سىنعا الدى ب. جۇنىسبەكوۆ.
وسىعان بايلانىستى 2020-جىلدان بەرى كوميتەت ارحيتەكتورلارعا ءتۇرلى بۇزۋشىلىقتار ءۇشىن 218 اكىمشىلىك حاتتاما شىعارعان.
«ساپالى قالا جوسپارلاۋدى قامتاماسىز ەتۋ جانە زاڭسىز بەيبەرەكەت، تىعىز قۇرىلىسقا جول بەرمەۋ ءۇشىن بيىل 5- ساۋىردە قول قويىلعان جىلجىمايتىن مۇلىكتىڭ ءبىرىڭعاي مەملەكەتتىك كاداسترىن ەنگىزۋ جونىندەگى زاڭ شەڭبەرىندە ءبىرىڭعاي قالا قۇرىلىسى ساراپتاماسى ەنگىزىلەدى. ءتيىستى وزگەرىستەر 2024-جىلعى قاڭتاردان باستاپ كۇشىنە ەنەدى، وندا جاڭادان ازىرلەنگەن جانە تۇزەتىلگەن قالا قۇرىلىسى جوبالارى مەملەكەتتىك قالا قۇرىلىسى كاداسترىنىڭ اقپاراتتىق جۇيەسىنە مىندەتتى تۇردە تىركەلىپ، «مەمساراپتاما» ر م ك- دا كەشەندى قالا قۇرىلىسى ساراپتاماسىنان وتەتىن بولادى»، - دەپ ءتۇسىندىردى كوميتەت وكىلى.
قالا قۇرىلىسى ساراپتاماسىنان وتپەگەن جانە وڭ قورىتىندىسىن الماعان بارلىق دەڭگەيدەگى قالا قۇرىلىسى جوبالارى بەكىتىلمەيدى جانە ودان ءارى ىسكە اسىرىلمايدى. وسىلايشا، قابىلدانعان زاڭ ازاماتتاردىڭ وزەكتى جانە قىزىقتىراتىن پروبلەمالارىن، ونىڭ ىشىندە جەر ۋچاسكەلەرىن بەرۋ جانە قالا قۇرىلىسى قۇجاتتاماسى بولماسا دا قۇرىلىسقا رۇقسات بەرۋ سەكىلدى پروبلەمالارىن شەشۋگە مۇمكىندىك بەرمەك.
