توگو ەلىنىڭ باسشىسى: قازاقستانمەن ستراتەگيالىق سەرىكتەس بولۋعا مۇمكىندىك بار
قازاقستانمەن ستراتەگيالىق سەرىكتەس بولۋعا مۇمكىندىك بار. بۇل تۋرالى مەملەكەت باسشىسى قاسىم-جومارت توقايەۆپەن اقوردادا كەڭەيتىلگەن قۇرامدا كەلىسسوز وتكىزگەن توگو رەسپۋبليكاسىنىڭ باسشىسى فور ەسسوزيمنا گناسسينگبە ايتتى، دەپ حابارلايدى Kazinform.
فور گناسسينگبە قۇرمەت كورسەتكەنى ءۇشىن قازاقستان تاراپىنا العىس ايتىپ، ءوزارا مۇددەنى كوزدەيتىن ەكونوميكانىڭ ءتۇرلى سالالارىندا ىنتىماقتاستىق ورناتۋعا بەيىلدى ەكەنىن راستادى
«قازاقستانعا ساپارمەن كەلۋگە شاقىرۋىڭىز ءبىزدىڭ قارىم-قاتىناسىمىزعا تىڭ سەرپىن بەرەدى. قازاقستان مەن توگونىڭ ستراتەگيالىق سەرىكتەس بولۋعا مۇمكىندىگى بار. ءسىزدىڭ ەلىڭىزدىڭ ەكونوميكالىق الەۋەتى زور. ءبىزدىڭ دەلەگاتسيا ساۋدا، ەكونوميكا، تاۋ-كەن، اۋىل شارۋاشىلىعى، كولىك، سيفرلاندىرۋ سالالارىنداعى ىنتىماقتاستىقتى كەڭەيتۋگە مۇددەلى. جان-جاقتى بايلانىس ورناتۋعا باعىتتالعان كەلىسسوزدەرىمىز قوس تاراپتىڭ ءوزارا ىقپالداستىقتى تەرەڭدەتۋگە نيەتتى ەكەنىن ايقىن كورسەتتى»، - دەدى توگو پرەزيدەنتى.
مەملەكەتتەر باسشىلارى قازاقستان مەن توگو اراسىنداعى سەرىكتەستىكتى دامىتۋ پەرسپەكتيۆالارىن تالقىلادى. سونداي-اق كەلىسسوز بارىسىندا ساياسي ديالوگتى جولعا قويۋعا، ساۋدا-ەكونوميكالىق، ينۆەستيتسيالىق، ەنەرگەتيكالىق، كولىك-لوگيستيكالىق جانە مادەني-گۋمانيتارلىق سالالارداعى ىنتىماقتاستىقتى كەڭەيتۋگە، دەنساۋلىق ساقتاۋ جانە اسكەري ونەركاسىپ باعىتىندا ءوزارا ىقپالداستىق ورناتۋعا ەرەكشە نازار اۋدارىلدى.
قاسىم-جومارت توقايەۆتىڭ شاقىرۋىمەن 27-28- قاراشادا توگو رەسپۋبليكاسىنىڭ پرەزيدەنتى فور ەسسوزيمنا گناسسينگبە قازاقستانعا رەسمي ساپارمەن كەلەتىنىن بۇعان دەيىن جازعان بولاتىنبىز. بۇگىن ق ر پرەزيدەنتى اقوردادا فور ەسسوزيمنا گناسسينگبەنى سالتاناتتى تۇردە قارسى الدى.
