تورەعالي تورەالى تاعى دا قاماۋعا الىنۋى مۇمكىن

الماتىنىڭ تۇركسىب اۋداندىق سوتىندا قازاقستاندىق ءانشى تورەعالي تورەالىگە قاتىستى قىلمىستىق ءىس قارالىپ جاتىر، دەپ حابارلايدى قازاقپارات ءتىلشىسى.

الماتى قالالىق سوتىنىڭ باسپا ءسوز قىزمەتى ءمالىم ەتكەندەي، تۇركسىب اۋداندىق سوتىندا ت. ءاليحانوۆقا (تورەعالي تورەالىگە) قاتىستى ق ر قىلمىستىق كودەكسىنىڭ 378-بابىنىڭ 1-بولىگى بويىنشا قىلمىستىق ءىس قارالىپ جاتىر.

ايتا كەتسەك، ق ر قىلمىستىق كودەكسىنىڭ 378-بابى 1-بولىگىنە سايكەس، بيلىك وكىلىن ءوز قىزمەتتىك مىندەتتەرىن اتقارۋ كەزىندە نەمەسە ولاردى اتقارۋىنا بايلانىستى قورلاۋ – 80 ايلىق ەسەپتىك كورسەتكىشكە دەيىنگى مولشەردە ايىپپۇل سالۋعا نەمەسە 80 ساعاتقا دەيىنگى مەرزىمگە قوعامدىق جۇمىستارعا تارتۋ نە بولماسا 20 تاۋلىككە دەيىنگى مەرزىمگە قاماۋعا الۋ قاراستىرىلعان.

ەسكە سالا كەتەيىك، 14- ماۋسىم كۇنى الماتىدا ەسىرتكىگە ماسايعان كولىك جۇرگىزۋشى پوليتسەيلەرگە بوي بەرمەي، وقيعاعا ورنىنان قاشپاق بولعانى حابارلانعان ەدى.

پاترۋلدىك پوليتسيا قىزمەتكەرلەرى جۇرگىزۋشىنى ۇستاپ، مەديتسينالىق ساراپتاما ناتيجەسىندە ونىڭ ەسىرتكىگە ماس ەكەنى راستالدى. سول كۇنى كولىك جۇرگىزۋشى اكىمشىلىك جاۋاپقا تارتىلدى. ول 20 تاۋلىككە قاماۋعا الىنىپ، 7 جىلعا كولىك جۇرگىزۋ قۇقىعىنان ايىرىلدى.

كەيىن الماتى قالالىق سوتىنىڭ باسپا ءسوز قىزمەتى تورەعالي ءتورالىنىڭ قاماۋدا ۇستاۋ اكىمشىلىك جازاسى 17- شىلدە كۇنى اياقتالعانىن مالىمدەدى.