توقايەۆ ينۆەستور تارتۋداعى جۇيەسىزدىكتى سىنعا الدى

- الەمدە ينۆەستيتسياعا تالاس كۇشەيىپ كەلەدى. باسەكەگە قابىلەتتى بولۋ ءۇشىن جەدەل شەشىمدەر قابىلداپ، جىلدام ارەكەت ەتۋ قاجەت. ءبىراق ەلىمىزدە ينۆەستور تارتۋ جانە ولاردى جان-جاقتى قولداۋ جۇيەسىندە بىرىزدىلىك جوق. ءاربىر مەكەمە نەمەسە جەكە تۇلعا ويىندا نە بار بولسا، سونى ىستەي بەرەدى. سالدارىنان كەشەندى كوزقاراس تا، ۇيلەسىمدىلىك تە، سابىرلىق تا، ءبىلىم دە جەتىسپەيدى، - دەدى پرەزيدەنت.

سوندىقتان مەملەكەت باسشىسى ينۆەستيتسيا تارتۋ ءىسىن ءبىر ورتالىقتان باسقارۋعا مۇمكىندىك بەرەتىن تۇتاس جۇيەنى جەتىلدىرە ءتۇسۋ كەرەكتىگىن ايتتى.

— مەنىڭ ويىمشا، باياعىدان سورەدە جاتقان ماسەلەنى، ياعني ينۆەستيتسيالارمەن جۇيەلى تۇردە اينالىساتىن مەكەمەنى انىقتاۋ كەرەك. سەبەبى قازىرگى تاڭدا وسى باعىتتا جۇيە جوق. ءبىرقاتار مەملەكەتتىك مەكەمەگە بىردەي قۇزىرەتتەر بەرىلگەن. قازىرگى جاعدايدا بۇل تاسىلدەر زامان تالابىنا ساي كەلمەيدى، ابدەن ەسكىرگەن. بالكىم، ينۆەستيتسياعا قاتىستى ماسەلەلەرمەن «بايتەرەك» حولدينگى بەلسەندىرەك اينالىسقانى دۇرىس شەشىم بولار. ال ەكونوميكا مينيسترلىگى، سىرتقى ىستەر مينيسترلىگى ينۆەستيتسيالارعا بايلانىستى كەيبىر قۇزىرەتىن ورىنداۋدى جالعاستىرادى، - دەدى قاسىم-جومارت توقايەۆ.

پرەزيدەنت شارۋالاردى ينۆەستيتسيالايتىن پارمەندى ءتاسىل ەنگىزۋدى تاپسىردى

 اۋىل شارۋاشىلىعىنىڭ ودان ءارى قارقىندى دامۋىنا بارلىق كۇش-جىگەردى سالۋ قاجەت. بۇل تۋرالى مەملەكەت باسشىسى قاسىم-جومارت توقايەۆ قازاقستان حالقىنا جولداۋىندا ايتتى.

بىلتىر بۇل سالا شامامەن 6 پايىزعا ءوسىپ، اگروونەركاسىپ كەشەنىندە وندىرىلگەن ءونىم كولەمى 15 تريلليون تەڭگەگە جەتكەن.

جەڭىلدەتىلگەن شارتتارمەن قارجىلاندىرۋ كولەمى الدىڭعى جىلمەن سالىستىرعاندا 1 تريلليون تەڭگەدەن 1,5 تريلليون تەڭگەگە دەيىن ۇلعايدى.

- دەگەنمەن بولىنگەن قاراجاتتىڭ ءبىر بولىگى كۇندەلىكتى قاجەتتىلىكتەر مەن اينالىمداعى قاراجاتتى تولىقتىرۋ ءۇشىن جۇمسالىپ وتىر. شارۋالارعا الداعى جۇمىسىن ۇزاق مەرزىمگە جوسپارلاۋعا مۇمكىندىك بەرەتىن كەڭ اۋقىمدى قارجىلاندىرۋ جۇيەسى كەرەك. سوندىقتان ۇكىمەت فەرمەرلەردى ۇزاق مەرزىمگە ارنالعان ينۆەستيتسيالىق رەسۋرستارمەن قامتاماسىز ەتۋ ءۇشىن ءتيىمدى ءارى پارمەندى تاسىلدەردى ەنگىزۋى قاجەت، - دەدى مەملەكەت باسشىسى.